ഡോക്ടർ സ്റ്റിക്കർ പതിച്ച കാർ, സംശയം തോന്നി പരിശോധന; സീറ്റിന്റെ അടിയില് ഒളിപ്പിച്ച നിലയിൽ കണ്ടെത്തിയത് 45 കിലോ കഞ്ചാവ്
Synopsis
ഒഡീഷയില് നിന്ന് വാടകയ്ക്കെടുത്താണ് കാര് കൊണ്ടുവന്നത്. ട്രെയിനുകളിലും റെയില്വെ സ്റ്റേഷനുകളിലും ലഹരി പരിശോധന ശക്തമായതോടെ ലഹരി സംഘം ഇപ്പോള് വ്യാപകമായി കാറുകളിലാണ് കഞ്ചാവ് കൊണ്ടു വരുന്നതെന്ന് പൊലീസ് പറയുന്നു.
എറണാകുളം: കാലടിക്കടുത്ത് മാണിക്കമംഗലത്ത് കാറില് കടത്തിയ 45 കിലോ കഞ്ചാവ് പൊലീസ് പിടികൂടി. പശ്ചിമ ബംഗാള് സ്വദേശികളായ മൂന്നു പേരാണ് അറസ്റ്റിലായത്. ഡോക്ടര്മാരുടെ വാഹനങ്ങളില് പതിക്കാറുളള സ്റ്റിക്കര് പതിച്ചായിരുന്നു കഞ്ചാവ് കടത്ത്.
പശ്ചിമ ബംഗാള് സ്വദേശികളായ റഫീക്കുല് ഇസ്ലാളം, സാഹില് മണ്ഡല്, അബ്ദുള് കുദ്ദൂസ് എന്നിവരാണ് പിടിയിലായത്. കാറിന്റെ സീറ്റിന്റെ അടിയില് ഒളിപ്പിച്ച നിലയിലായിരുന്നു കഞ്ചാവ്. ഒഡീഷയില് നിന്ന് വാടകയ്ക്കെടുത്താണ് കാര് കൊണ്ടുവന്നത്. ട്രെയിനുകളിലും റെയില്വെ സ്റ്റേഷനുകളിലും ലഹരി പരിശോധന ശക്തമായതോടെ ലഹരി സംഘം ഇപ്പോള് വ്യാപകമായി കാറുകളിലാണ് കഞ്ചാവ് കൊണ്ടു വരുന്നതെന്ന് പൊലീസ് പറയുന്നു. സമീപ ദിവസങ്ങളില് പെരുമ്പാവൂരില് നിന്ന് ഈ തരത്തില് ലഹരി കടത്തിയ ഒന്നിലേറെ സംഘങ്ങള് പിടിയിലായിരുന്നു.
പൊലീസിന് സംശയം തോന്നാതിരിക്കാനാണ് ഡോക്ടര്മാരുടെ വാഹനങ്ങളില് ഉപയോഗിക്കുന്ന സ്റ്റിക്കര് കഞ്ചാവ് വണ്ടിയില് പതിച്ചത്. പെരുമ്പാവൂര് എ എസ് പി ഹാര്ദിക് മീണയുടെ നേതൃത്വത്തിലുളള പൊലീസ് സംഘമാണ് ലഹരി കടത്തുകാരെ പിടികൂടിയത്. കേസില് കൂടുതല് അറസ്റ്റുണ്ടാകുമെന്ന സൂചനയും പൊലീസ് നല്കി.
കേരളത്തിലെ എല്ലാ Local News അറിയാൻ എപ്പോഴും ഏഷ്യാനെറ്റ് ന്യൂസ് വാർത്തകൾ. Malayalam News അപ്ഡേറ്റുകളും ആഴത്തിലുള്ള വിശകലനവും സമഗ്രമായ റിപ്പോർട്ടിംഗും — എല്ലാം ഒരൊറ്റ സ്ഥലത്ത്. ഏത് സമയത്തും, എവിടെയും വിശ്വസനീയമായ വാർത്തകൾ ലഭിക്കാൻ Asianet News Malayalam