ക്ഷേത്രത്തിൽ പറയെടുപ്പിനായി തയ്യാറാക്കിയ കതിന പൊട്ടിത്തെറിച്ചു; രണ്ടുപേർക്ക് പരിക്ക്

ഒരാളുടെ നില ഗുരുതരമാണ്. അർത്തുങ്കൽ അറവുകാട് ക്ഷേത്രത്തിൽ  ഇന്ന് രാവിലെ ഏഴര മണിയോടെയാണ് സംഭവം. 

ചേർത്തല: ക്ഷേത്രത്തിലെ ഉത്സവത്തോടനുബന്ധിച്ച് പറയെടുപ്പിനായി തയ്യാറാക്കിയ കതിന പൊട്ടിത്തെറിച്ച് രണ്ടുപേർക്ക് പരിക്ക്. ഒരാളുടെ നില ഗുരുതരമാണ്. അർത്തുങ്കൽ അറവുകാട് ക്ഷേത്രത്തിൽ  ഇന്ന് രാവിലെ ഏഴര മണിയോടെയാണ് സംഭവം. 

അർത്തുങ്കൽ ചെത്തികിഴക്കേവെളി വീട്ടിൽ അശോകൻ (46), ചേന്നവേലി പുളിക്കൽച്ചിറ വീട്ടിൽ പ്രകാശൻ (52) എന്നിവർക്കാണ് പൊള്ളലേറ്റത്. രാവിലെ ക്ഷേത്രത്തിലെ പറയെടുപ്പിനായി രണ്ടു കതിന കുറ്റികൾ നിറക്കുന്നതിനിടയാണ് പൊട്ടിത്തെറിച്ചത്. ക്ഷേത്രത്തിൽ ഉണ്ടായിരുന്നവരും നാട്ടുകാരും ഓടിക്കൂടി അപകടത്തിൽപ്പെട്ടവരെ ചേർത്തല താലൂക്ക് ആശുപത്രിയിലും തുടർന്ന് വണ്ടാനം മെഡിക്കൽ കോളേജിലും പ്രവേശിപ്പിച്ചു. 70 ശതമാനത്തിലേറെ പൊള്ളലേറ്റ അശോകനെ വണ്ടാനം മെഡിക്കൽ കോളേജ് ആശുപത്രിയിൽ നിന്നും കോട്ടയം മെഡിക്കൽ കോളേജിലേക്ക് മാറ്റി. അർത്തുങ്കൽ പോലീസ് അന്വേഷണം ആരംഭിച്ചു.