ബൈക്ക് നിയന്ത്രണം വിട്ട് ഇലക്ട്രിക് പോസ്റ്റിലിടിച്ച് അപകടം, യുവതിക്ക് പിന്നാലെ സുഹൃത്തായ യുവാവും മരിച്ചു

തിരുവനന്തപുരം വെങ്ങാനൂരിൽ ബൈക്ക് നിയന്ത്രണം വിട്ട് ഇലക്ട്രിക് പോസ്റ്റിലിടിച്ച് രണ്ടു പേർ മരിച്ചു. സുജി (26), അർച്ചന രാജ് (27) എന്നിവരാണ് മരിച്ചത്. ചൊവ്വാഴ്ച രാത്രി പതിനൊന്നിന് ശേഷമായിരുന്നു അപകടം നടന്നത്.

തിരുവനന്തപുരം: വിഴിഞ്ഞം - പള്ളിച്ചൽ റോഡിൽ വെങ്ങാനൂർ ജംക്‌ഷനു സമീപം ബൈക്ക് നിയന്ത്രണം വിട്ട് ഇലക്ട്രിക് പോസ്റ്റിലിടിച്ചുണ്ടായ അപകടത്തിൽ രണ്ടു പേർ മരിച്ചു. പെരിങ്ങമ്മല കോയിക്കൽകുഴി വീട്ടിൽ സുജി(26), ഒപ്പം യാത്ര ചെയ്ത സുഹൃത്ത് മെഡിക്കൽ കോളെജ് മുറിഞ്ഞ പാലം തോട്ടുവരമ്പ് വീട്ടിൽ അർച്ചന രാജ് ( 27) എന്നിവരാണ് മരിച്ചത്. ചൊവ്വാഴ്ച രാത്രി 11ന് ശേഷമായിരുന്നു അപകടം. വെങ്ങാനൂർ-പള്ളിച്ചൽ റൂട്ടിൽ അയ്യങ്കാളി സ്മൃതിമണ്ഡപത്തിന് സമീപത്തുവെച്ച് ഇവർ സഞ്ചരിച്ച ബൈക്ക് നിയന്ത്രണംവിട്ട് വൈദ്യുതത്തൂണിലിടിച്ച് മറിഞ്ഞാണ് അപകടമുണ്ടായത്. ബൈക്കിന്‍റെ മുൻഭാഗം പൂർണമായും തകർന്നു. യുവതി സംഭവ സ്ഥലത്ത് തന്നെ മരിച്ചിരുന്നു. ഗുരുതര പരിക്കേറ്റ യുവാവ് മെഡിക്കൽ കോളെജ് ആശുപത്രിയിൽ ചികിത്സയിലിരിക്കെ ഇന്നലെ രാവിലെയാണ് മരണപ്പെട്ടത്. വിഴിഞ്ഞം പൊലീസ് കേസെ‌ടുത്തു.