മരണത്തിലും പിരിയാതെ; ഭാര്യയുടെ സംസ്കാരച്ചടങ്ങുകൾക്കിടെ ഭർത്താവും യാത്രയായി

പള്ളിയിൽ ഭാര്യയുടെ സംസ്കാര ശുശ്രൂഷകൾ നടക്കുന്നതിനിടെ ഭർത്താവും മരിച്ചു. അങ്കമാലിയിലാണ് മണിക്കൂറുകളുടെ വ്യത്യാസത്തിൽ ദമ്പതികൾ വിടവാങ്ങിയത്. നായത്തോട് തേതാനത്ത് വീട്ടിൽ ടി വി ഡാനിയേൽ, ഭാര്യ മറിയാമ്മ എന്നിവരാണ് മരിച്ചത്.

നെടുമ്പാശ്ശേരി: അങ്കമാലിയിൽ മണിക്കൂറുകളുടെ വ്യത്യാസത്തിൽ ഭാര്യയും ഭർത്താവും മരിച്ചു. നായത്തോട് തേതാനത്ത് വീട്ടിൽ ടി വി ഡാനിയേൽ (95), ഭാര്യ മറിയാമ്മ (87) എന്നിവരാണ് മരിച്ചത്. വ്യാഴാഴ്ച രാത്രി എട്ടോടെയാണ് മറിയാമ്മ മരിച്ചത്.

വെള്ളിയാഴ്ച ഉച്ചയ്ക്ക് രണ്ടിന് അങ്കമാലി മാർ ഗ്രിഗോറിയോസ് ഓർത്തഡോക്സ് പള്ളിയിൽ മറിയാമ്മയുടെ സംസ്കാര ശുശ്രൂഷകൾ നടക്കുന്നതിനിടെയാണ് വീട്ടിൽ അവശ നിലയിൽ കിടപ്പിലായിരുന്ന ഭർത്താവ് ഡാനിയേലും അന്തരിച്ചത്.

ഡാനിയേലിന്റെ സംസ്കാരം ശനിയാഴ്ച രാവിലെ അങ്കമാലി മാർ ഗ്രിഗോറിയോസ് ഓർത്തഡോക്സ് പള്ളിയിൽ നടക്കും. കിഴക്കമ്പലം മേയ്ക്കാംകുന്നിൽ കുടുംബാംഗമാണ് മറിയാമ്മ. മക്കൾ: ടി ഡി വില്യംസ് (റിട്ട. അപ്പോളോ ടയേഴ്സ്), ടി ഡി തോമസ് (കെഎസ്ആർടിസി), ഡെയ്സി വർഗീസ്. മരുമക്കൾ: ജോളി, ബിജി, പരേതനായ കെ പി വർഗീസ്.