വീട്ടിൽ ഉറങ്ങിക്കിടന്ന പെൺകുട്ടിക്കെതിരെ ലൈംഗികാതിക്രമം: പ്രതിക്ക് 13 വര്ഷം കഠിനതടവും 1,15000 രൂപ പിഴയും ശിക്ഷ
Synopsis
തൃശൂരിൽ വീട്ടിൽ ഉറങ്ങിക്കിടന്ന പ്രായപൂർത്തിയാകാത്ത പെൺകുട്ടിക്കെതിരെ ലൈംഗികാതിക്രമം നടത്തിയ കേസിൽ പ്രതിക്ക് 13 വര്ഷം കഠിനതടവും 1,15000 രൂപ പിഴയും ശിക്ഷ വിധിച്ചു. ഇരിങ്ങാലക്കുട അതിവേഗ സ്പെഷ്യല് കോടതിയുടേതാണ് വിധി.
തൃശൂര്: 11 വയസ്സ് പ്രായമുള്ള പെണ്കുട്ടിയെ ലൈംഗികമായി പീഡിപ്പിച്ച കേസില് പ്രതിക്ക് 13 വര്ഷം കഠിനതടവും 1,15,000 രൂപ പിഴയും ശിക്ഷ. ഇരിങ്ങാലക്കുട അതിവേഗ സ്പെഷ്യല് കോടതി ജഡ്ജ് പി എ സിറാജുദ്ദീന് ആണ് ശിക്ഷ വിധിച്ചത്. കൊടകര പൊലീസ് രജിസ്റ്റർ ചെയ്ത കേസിൽ കൊടകര കൊല്ലംമാവടിയില് രജീഷി (44) നെ ആണ് കോടതി ശിക്ഷിച്ചത്.
2018 സെപ്റ്റംബര് മൂന്നിന് രാത്രിയാണ് കേസിനാസ്പദമായ സംഭവം. മാതാപിതാക്കള് വീട്ടില് ഇല്ലാത്ത സമയം വീടിനുള്ളിലേക്ക് അതിക്രമിച്ച കയറി മുറിയില് ഉറങ്ങുകയായിരുന്ന പെണ്കുട്ടിക്കെതിരെ ലൈംഗികാതിക്രമം നടത്തിയെന്നാണ് കേസ്. പ്രോസിക്യൂഷന് ഭാഗത്തുനിന്ന് 20 സാക്ഷികളെയും 15 രേഖകളും പ്രതിഭാഗത്തുനിന്ന് ഒരു സാക്ഷിയെയും ഹാജരാക്കി തെളിവ് നല്കിയിരുന്നു.
കൊടകര സബ്ബ് ഇന്സ്പെക്ടര് ആയിരുന്ന കെ എസ് സൂരജ് രജിസ്റ്റര് ചെയ്ത കേസില് കൊടകര ഇന്സ്പെക്ടര്മാരായിരുന്ന സുമേഷ്, ടി എ യൂനസ്, വി റോയ് എന്നിവരാണ് അന്വേഷണം നടത്തിയത്. ഇന്സ്പെക്ടര് പി കെ ദാസ് ആണ് അന്തിമ കുറ്റപത്രം സമര്പ്പിച്ചത്. പ്രോസിക്യൂഷനു വേണ്ടി സ്പെഷ്യല് പബ്ലിക് പ്രോസിക്യൂട്ടര് അഡ്വ. ബിജു വാഴക്കാല ഹാജരായി. ലെയ്സണ് ഓഫീസര് ടി ആര് രജനി പ്രോസിക്യൂഷന് നടപടികള് ഏകോപിപ്പിച്ചു.
ഇന്ത്യന് ശിക്ഷാ നിയമത്തിലെയും പോക്സോ നിയമത്തിലെയും വിവിധ വകുപ്പുകള് പ്രകാരം 13 വര്ഷം കഠിനതടവിനും 1,15,000 രൂപ പിഴയും പിഴയൊടുക്കാതിരുന്നാല് അഞ്ചുമാസത്തെ കഠിനതടവിനുമാണ് ശിക്ഷിച്ചത്. പ്രതിയെ റിമാന്ഡ് ചെയ്തു. പിഴത്തുക അതിജീവിതയ്ക്ക് മതിയായ നഷ്ടപരിഹാരമായി നല്കാൻ ജില്ലാ ലീഗല് സര്വീസ് അതോറിറ്റിക്ക് നിര്ദേശം നല്കിയിട്ടുണ്ട്.
കേരളത്തിലെ എല്ലാ Local News അറിയാൻ എപ്പോഴും ഏഷ്യാനെറ്റ് ന്യൂസ് വാർത്തകൾ. Malayalam News അപ്ഡേറ്റുകളും ആഴത്തിലുള്ള വിശകലനവും സമഗ്രമായ റിപ്പോർട്ടിംഗും — എല്ലാം ഒരൊറ്റ സ്ഥലത്ത്. ഏത് സമയത്തും, എവിടെയും വിശ്വസനീയമായ വാർത്തകൾ ലഭിക്കാൻ Asianet News Malayalam