സ്കൂൾ പരിസരങ്ങളിൽ 'ഓപ്പറേഷൻ തണ്ടർ - നിയർ സ്കൂൾ': കൊല്ലത്ത് 5 ചാക്ക് നിരോധിത പുകയില ഉൽപ്പന്നങ്ങൾ പിടികൂടി

സ്കൂൾ പരിസരങ്ങളിലെ ലഹരി വിൽപ്പന തടയാനുള്ള 'ഓപ്പറേഷൻ തണ്ടർ' പദ്ധതിയുടെ ഭാഗമായി കൊല്ലത്ത് വൻ പുകയില ശേഖരം എക്സൈസ് പിടികൂടി. നീണ്ടകരയിലെ ഒരു വീടിന്റെ രഹസ്യമുറിയിൽ നിന്നാണ് ഒരു ലക്ഷം രൂപ വിലവരുന്ന നിരോധിത പുകയില ഉൽപ്പന്നങ്ങൾ കണ്ടെത്തിയത്. സംഭവത്തിൽ ഒരാൾക്കെതിരെ കേസെടുത്തു.

കൊല്ലം: സ്കൂൾ പരിസരങ്ങളിൽ നിരോധിത പുകയില ഉൽപ്പന്നങ്ങളുടെ വിൽപ്പന തടയുന്നതിനായി എക്സൈസ് നടപ്പിലാക്കുന്ന "ഓപ്പറേഷൻ തണ്ടർ - നിയർ സ്കൂൾ" പദ്ധതിയുടെ ഭാഗമായി കൊല്ലത്ത് വൻ പുകയില ശേഖരം പിടികൂടി. കൊല്ലം എക്സൈസ് സ്ക്വാഡ് നടത്തിയ പരിശോധനയിലാണ് 5 ചാക്ക് നിരോധിത പുകയില ഉൽപ്പന്നങ്ങൾ പിടിച്ചെടുത്തത്.

കൊല്ലം എക്സൈസ് സ്ക്വാഡിലെ എക്സൈസ് ഇൻസ്പെക്ടർ എസ്.ബി. വിജയകുമാറിന്റെ നേതൃത്വത്തിൽ നീണ്ടകര ഭാഗത്ത് നടത്തിയ പരിശോധനയിലാണ് പുകയില ഉൽപ്പന്നങ്ങൾ കണ്ടെത്തിയത്. നീണ്ടകര, എസ്.എൻ മന്ദിരം വീട്ടിൽ വിനോദിന്റെ വീട്ടിലെ രഹസ്യമുറിയിൽ നിന്നാണ് ഇവ പിടിച്ചെടുത്തത്.

പിടിച്ചെടുത്ത പുകയില ഉൽപ്പന്നങ്ങൾക്ക് വിപണിയിൽ ഏകദേശം ഒരു ലക്ഷം രൂപ വിലവരുമെന്ന് എക്സൈസ് വ്യക്തമാക്കി. കരുനാഗപ്പള്ളി, തഴവ മേഖലകളിലെ റീട്ടെയിൽ വിതരണത്തിനായി എത്തിച്ചതാണ് ഈ ശേഖരമെന്നും എക്സൈസ് അറിയിച്ചു. സംഭവത്തിൽ വിനോദിനെതിരെ COTPA നിയമപ്രകാരം കേസെടുത്തിട്ടുണ്ട്.

എക്സൈസ് ഇൻസ്പെക്ടർ എസ്.ബി. വിജയകുമാറിനെക്കൂടാതെ പ്രിവന്റീവ് ഓഫീസർ ടി.ആർ. ജ്യോതി, പ്രിവന്റീവ് ഓഫീസർ ഗ്രേഡ് ഗംഗ ബി, സിവിൽ എക്സൈസ് ഓഫീസർ അനന്തു എസ്. രാജ് എന്നിവരാണ് പരിശോധനാ സംഘത്തിൽ പങ്കെടുത്തത്. വരുംദിവസങ്ങളിലും സ്കൂൾ പരിസരങ്ങളിൽ പരിശോധന ശക്തമായി തുടരുമെന്ന് എക്സൈസ് അറിയിച്ചു.