തീരാനോവായി കുരുന്നുകള്‍; അപകടം പാമ്പിനെ കണ്ട് വെട്ടിച്ച ഓട്ടോ 50 അടി താഴ്ചയിലേക്ക് മറിഞ്ഞ്, പോസ്റ്റ്മോർട്ടം ഇന്ന്, ഡ്രൈവർക്കെതിരെ കേസ്

മൂന്നാം ക്ലാസ് വിദ്യാർത്ഥി ആദ്യലക്ഷ്മി (7), എൽകെജി വിദ്യാർത്ഥി യദു കൃഷ്ണൻ (4) എന്നിവരാണ് അപകടത്തിൽ മരിച്ചത്. കുട്ടികളുടെ സംസ്കാരം ഇന്ന് ഉച്ചക്കുശേഷം വീട്ടുവളപ്പിൽ സംസ്കരിക്കും.

പത്തനംതിട്ട: പത്തനംതിട്ട തൂമ്പാക്കുളത്ത് സ്കൂൾ കുട്ടികളുമായി പോയ ഓട്ടോറിക്ഷ മറിഞ്ഞുണ്ടായ അപകടത്തിൽ മരിച്ച കുട്ടികളുടെ പോസ്റ്റുമോർട്ടം ഇന്ന്. മൂന്നാം ക്ലാസ് വിദ്യാർത്ഥി ആദ്യലക്ഷ്മി (7), എൽകെജി വിദ്യാർത്ഥി യദു കൃഷ്ണൻ (4) എന്നിവരാണ് അപകടത്തിൽ മരിച്ചത്. കുട്ടികളുടെ സംസ്കാരം ഇന്ന് ഉച്ചക്കുശേഷം വീട്ടുവളപ്പിൽ സംസ്കരിക്കും. സ്കൂളിലെ പൊതുദർശനത്തിന് ശേഷമാണ് സംസ്കാരം.

ഇന്നലെ വൈകിട്ട് വിദ്യാർത്ഥികളുമായി പോയ ഓട്ടോറിക്ഷയാണ് 50 അടി താഴ്ചയുള്ള തോട്ടിലേക്ക് നിയന്ത്രണം വിട്ട് മറിയുകയായിരുന്നു. മരിച്ച ആദ്യലക്ഷ്മി ഉൾപ്പെടെ ഓട്ടോയിൽ ഉണ്ടായിരുന്ന കുട്ടികളെ ആശുപത്രിയിൽ എത്തിച്ചെങ്കിലും യദുകൃഷ്ണനെ കണ്ടെത്തിയിരുന്നില്ല. മണിക്കൂറുകൾ നീണ്ട തിരച്ചിലിനൊടുവിൽ രാത്രി വൈകി നടത്തിയ തിരച്ചിലാണ് പാറക്കെട്ടിന് ഇടയിൽനിന്ന് മൃതദേഹം കിട്ടിയത്. റോഡിൽ പാമ്പിനെ കണ്ട് വെട്ടിച്ചപ്പോൾ ഓട്ടോ മറിഞ്ഞു എന്നാണ് ഡ്രൈവർ രാജേഷിന്റെ മൊഴി. ഇയാൾക്കെതിരെ പൊലീസ് കേസെടുത്തു. പത്തനംതിട്ട കരുമാൻതോട് ശ്രീനാരായണ സ്‌കൂളിലെ ആറ് കുട്ടികളാണ് ഓട്ടോയിലുണ്ടായിരുന്നത്. പരിക്കേറ്റ മറ്റു നാല് കുട്ടികളും ഡ്രൈവറും ചികിത്സയിലാണ്.