കൊട്ടാരക്കരയിൽ കാറിൽ യാത്ര ചെയ്ത സഹോദരങ്ങൾക്കും സുഹൃത്തിനും നേരെ ആക്രമണം: മൂന്ന് പേരെ നാട്ടുകാർ പിടികൂടി പൊലീസിലേൽപ്പിച്ചു

കൊല്ലം കൊട്ടാരക്കരയിൽ ജോലി കഴിഞ്ഞ് മടങ്ങുകയായിരുന്ന സഹോദരങ്ങളെയും സുഹൃത്തിനെയും ഒരു സംഘം ആക്രമിച്ചു. തങ്ങളുടെ കാറിലിടിച്ച ശേഷം നിർത്താതെ പോയ വാഹനം തടഞ്ഞു നിർത്തിയതിനായിരുന്നു മർദ്ദനം. സംഭവത്തിൽ പരിക്കേറ്റ മൂവരും ആശുപത്രിയിൽ ചികിത്സ തേടുകയും, അക്രമി സംഘത്തിലെ മൂന്ന് പേരെ നാട്ടുകാർ പിടികൂടി പോലീസിൽ ഏൽപ്പിക്കുകയും ചെയ്തു.

കൊല്ലം കൊട്ടാരക്കരയിൽ സഹോദരനെയും സഹോദരിയെയും ഇവർക്കൊപ്പമുണ്ടായിരുന്ന സുഹൃത്തിനെയും സംഘം ചേർന്ന് ആക്രമിച്ചു. ഓയൂർ സ്വദേശികളായ ശ്രീനാഥ്, രമ്യ, ഇവർക്കൊപ്പം ഉണ്ടായിരുന്ന സുഹൃത്ത് എന്നിവർക്കാണ് മർദ്ദനമേറ്റത്.

ജോലി കഴിഞ്ഞ് മൂവരും കാറിൽ വീട്ടിലേക്ക് മടങ്ങുന്നതിനിടെയാണ് സംഭവം നടന്നത്. അക്രമി സംഘം സഞ്ചരിച്ച വാഹനം എതിർ ദിശയിൽ നിന്ന് വന്ന് ഇവരുടെ കാറിൽ ഇടിക്കുകയായിരുന്നു. അപകടമുണ്ടാക്കിയ ശേഷം നിർത്താതെ പോയ വാഹനത്തെ ഇവർ പിന്തുടർന്ന് തടഞ്ഞു നിർത്തി. തുടർന്ന് വാഹനത്തിലുണ്ടായിരുന്ന സംഘം മൂവരെയും ആക്രമിക്കുകയായിരുന്നു.

അക്രമത്തിൽ പരിക്കേറ്റ ശ്രീനാഥ്, രമ്യ, സുഹൃത്ത് എന്നിവർ കൊട്ടാരക്കര താലൂക്ക് ആശുപത്രിയിൽ ചികിത്സ തേടി. മർദ്ദനമേറ്റവർ നൽകുന്ന വിവരമനുസരിച്ച് അക്രമി സംഘം മദ്യലഹരിയിലായിരുന്നു. ആക്രമണം നടത്തിയ സംഘത്തിലെ മൂന്ന് പേരെ നാട്ടുകാർ തടഞ്ഞു വെച്ച് പൊലീസിൽ ഏൽപ്പിച്ചു.