പേരാമ്പ്രയില് സ്വകാര്യ ബസിടിച്ച് വിദ്യാര്ത്ഥി മരിച്ച സംഭവം: ബസ് പെര്മിറ്റ് 3 മാസത്തേക്ക് റദ്ദ് ചെയ്യാൻ നിർദേശം
Synopsis
പേരാമ്പ്രയിൽ സ്വകാര്യ ബസ് ഇടിച്ച് വിദ്യാർത്ഥി മരിച്ച സംഭവത്തിൽ ബസിന്റെ പെർമിറ്റ് മൂന്ന് മാസത്തേക്ക് റദ്ദ് ചെയ്തു. ജില്ലാ കളക്ടർ സ്നേഹിൽ കുമാർ സിംഗാണ് ഉത്തരവിട്ടത്. ബസ് ഡ്രൈവറുടെ ലൈസൻസും ആറ് മാസത്തേക്ക് സസ്പെൻഡ് ചെയ്തിട്ടുണ്ട്.
കോഴിക്കോട്: പേരാമ്പ്രയില് സ്വകാര്യ ബസിടിച്ച് സ്കൂട്ടര് യാത്രികനായ വിദ്യാര്ത്ഥി മരിച്ച സംഭവത്തില് പേരാമ്പ്ര-കോഴിക്കോട് റൂട്ടില് ഓടുന്ന കെഎല് 11 എജി 3339 ബസിന്റെ പെര്മിറ്റ് മൂന്നുമാസത്തേക്ക് റദ്ദ് ചെയ്യാന് ബന്ധപ്പെട്ട ഉദ്യോഗസ്ഥര്ക്ക് ജില്ലാ കളക്ടര് സ്നേഹില് കുമാര് സിംഗ് നിര്ദ്ദേശം നല്കി. കളക്ടറേറ്റില് ചേര്ന്ന റീജ്യനല് ട്രാന്സ്പോര്ട്ട് അതോറിറ്റി യോഗത്തിലാണ് ട്രാന്സ്പോര്ട്ട് അതോറിറ്റി ചെയര്മാന് കൂടിയായ ജില്ല കളക്ടര് ഇതു സംബന്ധിച്ച് ഉത്തരവിട്ടത്.
ജുലൈ 19 ന് വൈകീട്ട് നടന്ന അപകടത്തിലാണ് മരുതോങ്കര മൊയിലോത്തറ താഴത്തു വളപ്പില് അബ്ദുള് ജലീലിന്റെ മകന് 19-കാരന് അബ്ദുള് ജവാദിന് ജീവന് നഷ്ടമായത്. പേരാമ്പ്ര കക്കാട് ബസ് സ്റ്റോപ്പിന് സമീപം പേരാമ്പ്ര ഭാഗത്തേക്ക് പോവുകയായിരുന്ന ബസ് ജവാദ് ഓടിച്ച ബൈക്കില് ഇടിച്ചായിരുന്ന അപകടം. സംഭവത്തില് ബസ് ഡ്രൈവറുടെ ലൈസന്സും ആറ് മാസത്തേക്ക് സസ്പെന്ഡ് ചെയ്തിരുന്നു.
കേരളത്തിലെ എല്ലാ Local News അറിയാൻ എപ്പോഴും ഏഷ്യാനെറ്റ് ന്യൂസ് വാർത്തകൾ. Malayalam News അപ്ഡേറ്റുകളും ആഴത്തിലുള്ള വിശകലനവും സമഗ്രമായ റിപ്പോർട്ടിംഗും — എല്ലാം ഒരൊറ്റ സ്ഥലത്ത്. ഏത് സമയത്തും, എവിടെയും വിശ്വസനീയമായ വാർത്തകൾ ലഭിക്കാൻ Asianet News Malayalam