അഞ്ചുവര്‍ഷം മുന്‍പ് വീട്ടുമുറ്റത്തു നട്ടു, കീടനാശിനിയൊന്നും തളിച്ചില്ല, കാത്തിരിപ്പിന് വിരാമം; വയനാട്ടിൽ മുന്തിരി വിളയിച്ച് റിട്ടയേര്‍ഡ് അധ്യാപകൻ

കീടനാശിനികളൊന്നും ഉപയോഗിക്കാതെ വീട്ടുവളപ്പിൽ ഒന്നാന്തരം മുന്തിരി വിളയിച്ച് റിട്ടയേര്‍ഡ് അധ്യാപകനായ ജേക്കബ്. 5 വർഷത്തെ കാത്തിരിപ്പിനൊടുവിൽ വിജയം കണ്ട ഈ ജൈവകൃഷി, വയനാട്ടിലെ കാലാവസ്ഥ മുന്തിരിക്ക് അനുയോജ്യമാണെന്ന് തെളിയിക്കുന്നു. 

കൽപ്പറ്റ: കീടനാശിനിയൊന്നും ഉപയോഗിക്കാതെ നല്ല ഒന്നാന്തരം മുന്തിരി വിളയിച്ചെടുത്ത് മാതൃകയാകുകയാണ് ജേക്കബ് എന്ന റിട്ടയേര്‍ഡ് അധ്യാപകൻ. വയനാട്ടിലാണ് സംഭവം. അമ്പലവയല്‍ കൊച്ചംകോട്ടെ വീട്ടുപരിസരത്താണ് ജേക്കബ് മുന്തിരി കൃഷി ചെയ്തിരിക്കുന്നത്. കീടനാശിനിയൊന്നും ഉപയോഗിക്കാതെ വിളയിച്ചെടുത്ത മുന്തിരിക്ക് മാധുര്യമേറെയാണ്.

അഞ്ചുവര്‍ഷം മുന്‍പ് വീട്ടു മുറ്റത്തുനട്ട മുന്തിരിവള്ളി ആദ്യമായാണ് ഇത്തവണ വിളവുനല്‍കിയതെന്ന് ജേക്കബ് പറയുന്നു. ജൈവരീതിയില്‍ ഉത്പാദിപ്പിച്ചെടുത്ത കറുത്ത മുന്തിരികള്‍ കുലകളായി ഇദ്ദേഹം പറിച്ചെടുത്തിട്ടുണ്ട്. വ്യാവസായിക അടിസ്ഥാനത്തില്‍ പുറംനാടുകളില്‍ വിളയിച്ചെടുക്കുന്നത് പോലെ തന്നെ നല്ല ഗുണമേന്മയുള്ള പഴങ്ങളാണ് കുലകളിലുള്ളത്. വയനാട്ടിലെ തണുത്ത കാലാവസ്ഥ മുന്തിരിക്കൃഷിക്ക് അനുയോജ്യമാണെന്ന് ജേക്കബ് പറയുന്നു. കീടാനാശിനികള്‍ ഒന്നും ചേര്‍ക്കാതെ തന്നെ മുന്തിരി വള്ളികള്‍ വീട്ടുമുറ്റത്ത് കൃഷിചെയ്ത് വിജയമായതോടെ കൂടുതല്‍ സ്ഥലത്തേക്ക് വ്യാപിപ്പിക്കാനുള്ള ഒരുക്കത്തിലാണ് ജേക്കബ്.