ഓഹരികള്‍ നിക്ഷേപത്തിന് മാത്രമല്ല; വായ്പയ്ക്കും..പലിശയും കുറവ്, നേട്ടങ്ങളറിയാം

നിക്ഷേപകന്റെ പക്കലുള്ള ഓഹരികള്‍ ഈടായി നല്‍കിയാണ് വായ്പ എടുക്കുന്നത്. വായ്പാ തുക തിരിച്ചടച്ചു കഴിയുമ്പോള്‍ ഓഹരികള്‍ ഉടമസ്ഥന് തിരികെ ലഭിക്കും. പ്രധാന നേട്ടങ്ങള്‍

സ്വര്‍ണം, സ്ഥലം തുടങ്ങിയ ആസ്തികള്‍ക്ക് പുറമെ ഇന്ന് ഓഹരി വിപണിയിലെ നിക്ഷേപങ്ങള്‍ ഉപയോഗിച്ചും വായ്പ കണ്ടെത്താന്‍ സാധിക്കും. ഓഹരി ഈടായി നല്‍കി വായ്പ എടുക്കാനുള്ള സംവിധാനമാണിത്. വ്യക്തിഗത വായ്പയെക്കാളോ മറ്റ് ഈടില്ലാത്ത വായ്പകളെക്കാളോ കുറഞ്ഞ പലിശയില്‍ ലഭിക്കും എന്നതാണ് ഈ രീതിയുടെ പ്രധാന ആകര്‍ഷണം. സ്വര്‍ണം പണയം വെക്കുന്നതിന് സമാനമാണിത്. നിക്ഷേപകന്റെ പക്കലുള്ള ഓഹരികള്‍ ഈടായി നല്‍കിയാണ് വായ്പ എടുക്കുന്നത്. വായ്പാ തുക തിരിച്ചടച്ചു കഴിയുമ്പോള്‍ ഓഹരികള്‍ ഉടമസ്ഥന് തിരികെ ലഭിക്കും. പ്രധാന നേട്ടങ്ങള്‍

ഉടമസ്ഥാവകാശം: വായ്പാ കാലയളവില്‍ ഓഹരികളുടെ ഉടമസ്ഥാവകാശം നിക്ഷേപകനില്‍ തന്നെ നിലനില്‍ക്കും.

ആനുകൂല്യങ്ങള്‍: ഓഹരികള്‍ പണയത്തിലായിരിക്കുമ്പോഴും ഡിവിഡന്റ്, ബോണസ് ഷെയറുകള്‍, സ്റ്റോക്ക് സ്പ്ലിറ്റ് തുടങ്ങിയ എല്ലാ സാമ്പത്തിക ആനുകൂല്യങ്ങളും നിക്ഷേപകന്റെ അക്കൗണ്ടില്‍ തന്നെ ലഭിക്കും.

നിയന്ത്രണം: ഡീമാറ്റ് അക്കൗണ്ടില്‍ ഒരു 'ലിയന്‍' രേഖപ്പെടുത്തും. വായ്പ പൂര്‍ണ്ണമായും അടച്ചുതീര്‍ക്കുന്നതുവരെ ഈ ഓഹരികള്‍ കൈമാറ്റം ചെയ്യാന്‍ സാധിക്കില്ല.

എത്ര തുക ലഭിക്കും? ശ്രദ്ധിക്കേണ്ട കാര്യങ്ങള്‍

നിലവിലെ റിസര്‍വ് ബാങ്ക് മാര്‍ഗ്ഗനിര്‍ദ്ദേശങ്ങള്‍ അനുസരിച്ച്, പണയം വെക്കുന്ന ഓഹരികളുടെ മൂല്യത്തിന്റെ പരമാവധി 50% വരെയാണ് വായ്പയായി ലഭിക്കുക . അതായത്, 10 ലക്ഷം രൂപയുടെ ഓഹരിക്ക് ഏകദേശം 5 ലക്ഷം രൂപ വരെ വായ്പ ലഭിക്കാന്‍ സാധ്യതയുണ്ട്. അവസാന ആറ് മാസത്തിനുള്ളില്‍ 80 ശതമാനം വ്യാപാര ദിനങ്ങളിലും സജീവമായി ട്രേഡ് ചെയ്യപ്പെട്ട നാഷണല്‍ സ്റ്റോക്ക് എക്‌സ്‌ചേഞ്ചിലെ ഗ്രൂപ്പ് 1 ഓഹരികള്‍ മാത്രമേ ഈടായി സ്വീകരിക്കുകയുള്ളൂ. ഓഹരിക്ക് പകരമുള്ള വായ്പയുടെ പരമാവധി പരിധി 50 ശതമാനത്തില്‍ നിന്ന് 60 ശതമാനമായി ഉയര്‍ത്താനും വായ്പയുടെ പരമാവധി തുക 1 കോടി രൂപയായി വര്‍ദ്ധിപ്പിക്കാനും ആര്‍ബിഐ നിര്‍ദ്ദേശിച്ചിട്ടുണ്ട്.

വിപണി ഇടിഞ്ഞാല്‍ എന്ത് സംഭവിക്കും?

സ്വര്‍ണം, റിയല്‍ എസ്റ്റേറ്റ് എന്നിവയില്‍ നിന്ന് വ്യത്യസ്തമായി ഓഹരി വിലകള്‍ പെട്ടെന്ന് കുറയാന്‍ സാധ്യതയുണ്ട്. ഇവിടെയാണ് ഏറ്റവും വലിയ വെല്ലുവിളി.

മാര്‍ജിന്‍ കോള്‍ : വിപണി ഇടിഞ്ഞ് ഓഹരി മൂല്യം കുറയുമ്പോള്‍ എന്ത് സംഭവിക്കുമെന്ന് നോക്കാം. ഉദാഹരണത്തിന്, 20 ലക്ഷം രൂപയുടെ ഓഹരിക്ക് 10 ലക്ഷം രൂപ വായ്പയെടുത്ത ശേഷം ഓഹരിക്ക് 20% വില കുറഞ്ഞാല്‍, എല്‍ടിവി 63% ആയി ഉയരും. ഇത് പരിധിക്ക് പുറത്തായതിനാല്‍ ഓഹരി മൂല്യത്തിലെ കുറവ് നികത്താന്‍ ഉടന്‍ തന്നെ അധിക പണം നിക്ഷേപകനോട് ആവശ്യപ്പെടും. ഇതിനെയാണ് മാര്‍ജിന്‍ കോള്‍ എന്ന് പറയുന്നത്.

നിര്‍ബന്ധിത വില്‍പ്പന: ഓഹരി മൂല്യത്തിലെ ഈ കുറവ് പണമായി തന്നെ നികത്തേണ്ടതുണ്ട്. നിക്ഷേപകന്‍ കൃത്യസമയത്ത് ഈ തുക നല്‍കിയില്ലെങ്കില്‍, കടം നല്‍കിയ സ്ഥാപനത്തിന് പണയം വെച്ച ഓഹരികള്‍ വില്‍ക്കാന്‍ പൂര്‍ണ്ണ അധികാരമുണ്ട്.