റിപ്പബ്ലിക് ദിന പ്രസം​ഗം വായിക്കാനാകാതെ കുഴങ്ങി മധ്യപ്രദേശ് മന്ത്രി; രക്ഷകനായത് കലക്ടര്‍

പ്രസം​ഗത്തിന്റെ ആദ്യഭാ​ഗം തപ്പിത്തടഞ്ഞായിരുന്നു ഇമാര്‍തി ദേവി വയിച്ചൊപ്പിച്ചത്. ശേഷം വീണ്ടും വായിക്കാൻ ശ്രമിച്ചുവെങ്കിലും സാധിച്ചില്ല.       തുടർന്ന് കലക്ടർ വായിക്കുമെന്ന് പറഞ്ഞ് പ്രസം​ഗം കൈമാറുകയായിരുന്നു.

ഭോപ്പാൽ: റിപ്പബ്ലിക് ദിന ആഘോഷ പരിപാടിക്കിടെ പ്രസംഗം വായിക്കാനാകാതെ കുഴങ്ങി മധ്യപ്രദേശ് മന്ത്രി. ശിശുക്ഷേമ മന്ത്രിയായ ഇമാര്‍തി ദേവിയാണ് പരിപാടിയിൽ പ്രസം​ഗം വായിക്കാനാകാതെ കുഴങ്ങിയത്. ഗ്വാളിയാറിലെ സാഫ് ഗ്രൗണ്ടിൽ നടന്ന പരിപാടിയ്ക്കിടെയായിരുന്നു സംഭവം. പ്രസം​ഗം വായിക്കാനാകാതെ വന്നതോടെ മന്ത്രി വേദിയിൽ ഉണ്ടായിരുന്ന കലക്ടറെ ബാക്കി വായിക്കുന്നതിന് വേണ്ടി ഏൽപ്പിക്കുകയും ചെയ്തു.

പ്രസം​ഗത്തിന്റെ ആദ്യഭാ​ഗം തപ്പിത്തടഞ്ഞായിരുന്നു ഇമാര്‍തി ദേവി വയിച്ചൊപ്പിച്ചത്. ശേഷം വീണ്ടും വായിക്കാൻ ശ്രമിച്ചുവെങ്കിലും സാധിച്ചില്ല.തുടർന്ന് കലക്ടർ വായിക്കുമെന്ന് പറഞ്ഞ് പ്രസം​ഗം കൈമാറുകയായിരുന്നു. സംഭവത്തിന്റെ വീഡിയോ സമൂഹമാധ്യമങ്ങളിൽ വ്യാപകമായി പ്രചരിക്കുന്നുണ്ട്.

അതേ സമയം കഴിഞ്ഞ രണ്ട് ദിവസമായി തനിക്ക് ‍സുഖമില്ലായിരുന്നുവെന്നും അതിന്റെ ബുദ്ധിമുട്ടുകൾ ഉണ്ടായിരുന്നുവെന്നും അതിനാലാണ്  പ്രസം​ഗം വായിക്കാൻ സാധിക്കാത്തതെന്നും ഇമാര്‍തി പറഞ്ഞതായി വാർത്താ ഏജൻസിയായ എഎൻഐ റിപ്പോർട്ട് ചെയ്യുന്നു. നിങ്ങൾക്ക് വേണമെങ്കിൽ തന്നെ ചികിത്സിച്ച ഡോക്ടറോട് ചോദിക്കാം. പക്ഷേ അതു കുഴപ്പമില്ല. കലക്ടര്‍ പ്രസം​ഗം നന്നായി വായിച്ചല്ലോയെന്നും അവര്‍ കൂട്ടിച്ചേർത്തു.

2008ലാണ് നിയമസഭയിലേയ്ക്ക് ഇമാര്‍തി ദേവി തെരഞ്ഞെടുക്കപ്പെടുന്നത്. മധ്യപ്രദേശ് നിയമസഭയിൽ ഇത് മൂന്നാം തവണയാണ് അവർ അം​ഗമാകുന്നത്. ഗ്വാളിയറിലെ യൂത്ത് കോൺഗ്രസ് കമ്മിറ്റിയിലും നിരവധി സ്ഥാനങ്ങൾ വഹിച്ചിട്ടുണ്ട്.