''നമ്മുടെ പെൺകുട്ടികൾക്ക് നീതി കൊടുക്കുന്നത് ഇങ്ങനെയാണോ മിസ്റ്റർ 56?'' മോദിക്കെതിരെ രാഹുൽ

ബലാത്സം​ഗക്കേസിലെ പ്രതികൾക്കെതിരെ കർശനനടപടി സ്വീകരിക്കുമെന്നും രാജ്യത്തിന് തന്നെ ഇത്തരം കേസുകൾ അപമാനമാണെന്നും മോദി മുമ്പ് പറ‍ഞ്ഞിരുന്നു. ഇക്കാര്യം ഓർമ്മിപ്പിച്ചു കൊണ്ടാണ് രാഹുലിന്റെ വിമർശനം. 

ദില്ലി: ഉന്നാവോ കേസിലെ പ്രധാന സാക്ഷിയുടെ ദുരൂഹമരണത്തിൽ മോദിക്കെതിരെ രൂക്ഷവിമർശനമുന്നയിച്ച് കോൺ​​ഗ്രസ് അധ്യക്ഷൻ രാഹുൽ ​ഗാന്ധി. ഇങ്ങനെയാണോ പെൺകുട്ടികൾക്ക് നീതി നേടിക്കൊടുക്കുന്നതെന്നാണ് മോദിയോടുള്ള രാഹുലിന്റെ ചോദ്യം.‌‌‌‌‌ പോസ്റ്റ്മോർട്ടം നടത്താതെയാണ് ഇദ്ദേഹത്തിന്റെ മൃതസംസ്കാരം നടത്തിയതെന്നും ഇതിന് പിന്നിൽ​ ​ഗൂഢാലോചനയാണെന്നും രാഹുൽ ആരോപിക്കുന്നു. തന്റെ ട്വിറ്ററിലൂടെയാണ് രാഹുൽ ഈ വിമർശനങ്ങളുന്നയിച്ചിരിക്കുന്നത്. 

ബിജെപി എംഎൽഎ കുൽദിപ് സിം​ഗ് സെങ്ങാറാണ് ഉന്നാവോ കേസിലെ മുഖ്യപ്രതിസ്ഥാനത്തുള്ളത്. ബലാത്സം​ഗക്കേസിലെ പ്രതികൾക്കെതിരെ കർശനനടപടി സ്വീകരിക്കുമെന്നും രാജ്യത്തിന് തന്നെ ഇത്തരം കേസുകൾ അപമാനമാണെന്നും മോദി മുമ്പ് പറ‍ഞ്ഞിരുന്നു. ഇക്കാര്യം ഓർമ്മിപ്പിച്ചു കൊണ്ടാണ് രാഹുലിന്റെ വിമർശനം. പ്രായപൂർത്തിയാകാത്ത പെൺകുട്ടിയെ എംഎൽഎ ബലാത്സം​ഗം ചെയ്തതായാണ് കേസ്. പെൺകുട്ടിയുടെ കുടുംബാം​ഗങ്ങൾ ഉത്തർപ്രദേശ് മുഖ്യമന്ത്രി യോ​ഗി ആദിത്യനാഥിന്റെ വസതിക്ക് മുന്നിൽ സമരം നടത്തിയിരുന്നു. പെൺകുട്ടിയുടെ പിതാവ് ഇതിനിടയിൽ മരണപ്പെടുകയും ചെയ്തിരുന്നു. 

ഇതിനിടയിൽ പ്രതിയായ എംഎൽഎയുടെ സഹോദരൻ പെൺകുട്ടിയുടെ പിതാവിനെ മർദ്ദിച്ചതായും ആരോപണമുണ്ട്. ഈ സംഭവം നേരിട്ട് കണ്ട സാക്ഷി യൂനുസാണ് മരണപ്പെട്ടത്. ദേഹാസ്വാസ്ഥ്യം അനുഭവപ്പെട്ടതിനെ തുടർന്ന് യൂനുസിനെ ഹോസ്പിറ്റലിൽ എത്തിച്ചെങ്കിലും മരണം സംഭവിച്ചിരുന്നു. അതുപോലെ തന്നെ പെൺകുട്ടിയുടെ കുടുംബത്തെ പ്രതികൾ നിരന്തരമായി ഭീഷണിപ്പെടുത്തുന്നതായും ആരോപണമുണ്ട്.