നാന പടേക്കർ ആഭാസനാണ്; എന്നാൽ ലൈം​ഗികാരോപണവിവാദത്തിൽ നിരപരാധി: രാജ് താക്കറെ

''നാനാ പടേക്കറെ വളരക്കാലമായി എനിക്കറിയാം. അയാൾ ഭ്രാന്തമായി ചിന്തിക്കുകയും പ്രവർത്തിക്കുകയും ചെയ്യുന്ന ആഭാസനാണ്. എന്നാൽ ഇത്തരമൊരു കാര്യം അയാൾ ചെയ്യുമെന്ന് ഞാൻ വിശ്വസിക്കുന്നില്ല.'' രാജ് താക്കറേ പറയുന്നു. 

അമരാവതി: നടനും ദേശീയ പുരസ്കാര ജേതാവുമായ നാനാ പടേക്കർ ആഭാസനാണെന്ന് തനിക്കറിയാമെന്ന് മഹാരാഷ്ട്ര നവനിർമ്മാൺ സേന മേധാവി രാജ് താക്കറേ. എന്നാൽ ബോളിവുഡ് നടി തനുശ്രീ ദത്ത നാനാ പടേക്കറിനെതിരെ ഉന്നയിച്ച ലൈം​ഗികാരോപണത്തിൽ അദ്ദേഹം നിരപരാധിയാണെന്നും രാജ് താക്കറെ പറയുന്നു.

''നാനാ പടേക്കറെ വളരക്കാലമായി എനിക്കറിയാം. അയാൾ ഭ്രാന്തമായി ചിന്തിക്കുകയും പ്രവർത്തിക്കുകയും ചെയ്യുന്ന ആഭാസനാണ്. എന്നാൽ ഇത്തരമൊരു കാര്യം അയാൾ ചെയ്യുമെന്ന് ഞാൻ വിശ്വസിക്കുന്നില്ല. ഈ വിഷയത്തിൽ മാധ്യമങ്ങൾ എങ്ങനെയാണ് പ്രവർത്തിക്കുന്നത്? മീടൂ വളരെ ​ഗുരുതരമായ വിഷയമാണ്. എന്നാൽ ട്വിറ്ററിലൂടെ ഈ വിഷയത്തെ കൈകാര്യം ചെയ്യുന്നത് ശരിയായ രീതിയല്ല'' അമരാവതിയിൽ നടന്ന ഒരു പരിപാടിയിലാണ് രാജ് താക്കറേ ഇപ്രകാരം പറഞ്ഞത്. 

സമൂഹമാധ്യമങ്ങളിൽ സംവാദം നടത്തേണ്ട ഒന്നല്ല ലൈം​ഗികാരോപണ വിവാദം എന്നും താക്കറേ കൂട്ടിച്ചേർക്കുന്നു. രാജ്യത്തെ മറ്റ് പ്രതിസന്ധികളെ മറച്ച് പിടിക്കാൻ വേണ്ടിയാണ് ഇത്തരം വിഷയങ്ങൾ രൂക്ഷമാക്കുന്നത്. രൂപയുടെ മൂല്യം ഇടിയുകയും പെട്രോളിന്റെ ഡീസലിന്റെയും വില വർദ്ധിക്കുകയും തൊഴിലില്ലായ്മ രൂക്ഷമാകുകയും ചെയ്യുന്ന അവസ്ഥയിലൂടെയാണ് രാജ്യം ഇപ്പോൾ കടന്നു പോകുന്നത്. ഈ പ്രശ്നങ്ങളിൽ നിന്നും ശ്രദ്ധ തിരിക്കുകയാണ് ലക്ഷ്യം. 

അതുപോലെ ദുരനുഭവം നേരിട്ട സ്ത്രീകൾ അപ്പോൾത്തന്നെ പ്രതികരിക്കണം. അല്ലാതെ പത്ത് വർഷങ്ങൾക്ക് ശേഷമല്ല പ്രതികരിക്കേണ്ടത്. ഏതെങ്കിലും രീതിയിൽ പ്രതിസന്ധികൾ നേരിടുന്ന സ്ത്രീകൾക്ക് സഹായത്തിനായി മഹാരാഷ്ട്ര നവനിർമ്മാൺ സേനയെ സമീപിക്കാമെന്നും അദ്ദേഹം വ്യക്തമാക്കി. 2008 ൽ സിനിമയുടെ ഷൂട്ടിം​ഗ് സൈറ്റിൽ വച്ച് നാനാ പടേക്കർ തന്നെ ലൈം​ഗികമായി സമീപിച്ചുവെന്നായിരുന്നു തനുശ്രീ ദത്തയുടെ ആരോപണം.