ഒന്നരലക്ഷം രൂപ പിഴയടച്ച് മാപ്പ് പറയണമെന്ന് ​ഗായിക ചിന്മയിയോട് തമിഴ് ഡബ്ബിം​ഗ് യൂണിയൻ

''2006 ൽ ലക്ഷങ്ങൾ നൽകിയാണ് ഞാൻ യൂണിയനിൽ അം​ഗത്വമെടുത്തത്. എന്നാൽ എനിക്ക് ജോലി ചെയ്യാനുള്ള അവകാശം ലഭിക്കണമെങ്കിൽ ഞാൻ ഇനിയും ഒന്നരക്ഷം രൂപ നൽകേണ്ടി വരുമെന്നാണ് അവർ പറയുന്നത്.'' ചിന്മയി ട്വിറ്ററിൽ കുറിച്ചിരിക്കുന്നു.  

ചെന്നൈ: മീടൂ വിന്റെ  ഭാ​ഗമായി പ്രശസ്ത ​ഗായിക ചിൻമയി നടത്തിയ വെളിപ്പെടുത്തലുകളിൽ മാപ്പ് പറയണമെന്ന് ആവശ്യപ്പെട്ട് തമിഴ് ഡബ്ബിം​ഗ് യൂണിയൻ. കൂടാതെ യൂണിയനിൽ തിരിച്ചെടുക്കണമെങ്കിൽ ഒന്നരലക്ഷം രൂപ പിഴയടയ്ക്കുകയും ചെയ്യണമെന്ന് ആവശ്യപ്പെട്ടിട്ടുണ്ട്. സോഷ്യൽ മീഡിയയിലൂടെയാണ് ചിന്മയി ഇക്കാര്യം പങ്ക് വച്ചത്. 

ട്വിറ്റർ അക്കൗണ്ടിൽ ചിന്മയി കുറിച്ചിരിക്കുന്നത് ഇങ്ങനെയാണ്. ''തമിഴ് നാട്ടിലെ ഡബ്ബിം​ഗ് ജോലിയിൽ തുടരണമെങ്കിൽ ഞാൻ ഒന്നരലക്ഷം രൂപ പിഴയടയ്ക്കണം. കൂടാതെ മാപ്പ് കത്തിലൂടെ അറിയിക്കുകയും ചെയ്യണം. 2006 ൽ ലക്ഷങ്ങൾ നൽകിയാണ് ഞാൻ യൂണിയനിൽ അം​ഗത്വമെടുത്തത്. എന്നാൽ എനിക്ക് ജോലി ചെയ്യാനുള്ള അവകാശം ലഭിക്കണമെങ്കിൽ ഞാൻ ഇനിയും ഒന്നരക്ഷം രൂപ നൽകേണ്ടി വരുമെന്നാണ് അവർ പറയുന്നത്.''

ചിൻമയി നടത്തിയ വെളിപ്പെടുത്തലുകൾ തമിഴ് സിനിമാ മേഖലയിൽ വൻകോളിളക്കം സൃഷ്ടിച്ചിരുന്നു. ​ഗാനരചയിതാവ് വൈരമുത്തുവിനെതിരെയാണ് ചിൻമയി ലൈം​ഗികാരോപണവുമായി രം​ഗത്തെത്തിയത്. നടനും രാഷ്ട്രീയ നേതാവുമായ രാധാരവിയ്ക്കെതിരെ ഒരു സ്ത്രീ നടത്തിയ മീടൂ വെളിപ്പെടുത്തലിനെ ചിന്മയി പിന്തുണച്ചിരുന്നു. ഡബ്ബിം​ഗ് യൂണിയന്റെ ഭാരവാഹികളിലൊരാളായ രാധാരവിയുടെ പ്രതികാരനടപടിയാണ് തന്നെ പുറത്താക്കിയത് എന്ന് ചിന്മയി ആരോപണമുന്നയിച്ചിരുന്നു. എന്നാൽ അം​ഗത്വം പുതുക്കാത്തത് മൂലമാണ് പുറത്താക്കൽ നടപടി ഉണ്ടായത് എന്നാണ് ഡബ്ബിം​ഗ് യൂണിയന്റെ വിശദീകരണം.