കള്ളൻമാരെ ഈ കാവൽക്കാരൻ വെറുതെ വിടില്ല; മോദി

കഴിഞ്ഞ നാൽപത്  വർഷമായി വൺ റാങ്ക് വൺ പെൻഷന് വേണ്ടി സൈനികർ കാത്തിരിക്കുകയാണ്. വെറും അഞ്ഞൂറ് കോടി രൂപ മാത്രമാണ് അന്ന് കോൺ​ഗ്രസ് സർക്കാർ ഈ പദ്ധതിയ്ക്കായി മാറ്റി വച്ചത്. ഞങ്ങൾ അധികാരത്തിലെത്തി ഈ പദ്ധതിയുടെ ഫയൽ ആവശ്യപ്പെട്ടപ്പോൾ ഉദ്യോ​ഗസ്ഥർ അത്ഭുതപ്പെട്ടു പോയി. 

ദില്ലി: മൂന്ന് സംസ്ഥാനങ്ങളിൽ കർഷക വായ്പകൾ എഴുതിതള്ളിയ കോൺ​ഗ്രസ് കർഷകരെ തെറ്റിദ്ധരിപ്പിക്കുകയാണെന്ന് പ്രധാനമന്ത്രി മോദി. ഹിമാചൽ പ്രദേശിലെ ധർമ്മശാലയിൽ സംഘടിപ്പിക്കുന്ന ജ്ഞാൻ അഭർ റാലിയെ അഭിസംബോധന ചെയ്ത് സംസാരിക്കുകയായിരുന്നു പ്രധാനമന്ത്രി. വൺ റാങ്ക് വൺ പെൻഷൻ വിഷയത്തിൽ അന്നത്തെ കോൺ​ഗ്രസ്  സൈനികരെ വിഡ്ഡികളാക്കിയെന്നും മോദി വിമർശിച്ചു.

''കഴിഞ്ഞ നാൽപത്  വർഷമായി വൺ റാങ്ക് വൺ പെൻഷന് വേണ്ടി സൈനികർ കാത്തിരിക്കുകയാണ്. വെറും അഞ്ഞൂറ് കോടി രൂപ മാത്രമാണ് അന്ന് കോൺ​ഗ്രസ് സർക്കാർ ഈ പദ്ധതിയ്ക്കായി മാറ്റി വച്ചത്. ഞങ്ങൾ അധികാരത്തിലെത്തി ഈ പദ്ധതിയുടെ ഫയൽ ആവശ്യപ്പെട്ടപ്പോൾ ഉദ്യോ​ഗസ്ഥർ അത്ഭുതപ്പെട്ടു പോയി.'' മോദി വിശദീകരിച്ചു. 

''പന്ത്രണ്ടായിരം കോടി രൂപയാണ് ഈ പദ്ധതിയ്ക്ക് വേണ്ടിവരുന്നതെന്ന് ഞങ്ങൾ മനസ്സിലാക്കി. ഇത്രയും തുക കണ്ടെത്തുക അസാധ്യമായതിനാൽ സൈനികരെ വിളിച്ച് സംസാരിച്ചു. അവസാനം നാല് ​ഗഡുക്കളായി ഈ തുക അവർക്ക് നൽകാമെന്ന് ഞങ്ങൾ തീരുമാനിച്ചു.'' പണം കൊള്ളയടിക്കുന്നവർക്ക് രാജ്യത്തിന്റെ കാവൽക്കാരനെ പേടിയാണെന്നും മോദി കൂട്ടിച്ചേർത്തു. അതുകൊണ്ടാണ് ഇപ്പോൾ ചീത്ത വിളിക്കുന്നതെന്നും എന്നാൽ ഒരു കാരണവശാലും അവരെ വെറുതെ വിടില്ലെന്നും മോദി പറഞ്ഞു.