പ്രൈം വോളിബോള് ലീഗിന് പിന്തുണയുമായി തെലങ്കാന മുഖ്യമന്ത്രി; സീസണ് 4ന് ആതിഥേയത്വം വഹിക്കാന് ഹൈദരാബാദ് ഒരുങ്ങുന്നു
Synopsis
ഒക്ടോബർ 2ന് ഹൈദരാബാദിൽ പ്രൈം വോളിബോൾ ലീഗിന്റെ നാലാം സീസണിന് തുടക്കമാകും.
ഹൈദരാബാദ്: മൂന്ന് സീസണുകളിലായി വോളിബോള് ആരാധകരെ ആവേശത്തിലാക്കിയ പ്രൈം വോളിബോള് ലീഗിന്റെ 2025 സീസണിന് ഒക്ടോബര് രണ്ടിന് ഹൈദരാബാദില് തുടക്കമാകും. തെലങ്കാന സര്ക്കാരിന്റെ പൂര്ണ പിന്തുണയോടെയാണ് പിവിഎലിന്റെ നാലാം പതിപ്പ് അരങ്ങേറുന്നത്. കഴിഞ്ഞ ദിവസം നടന്ന ചടങ്ങില് തെലങ്കാന മുഖ്യമന്ത്രി എ.രേവന്ത് റെഡ്ഡി, കായിക യുവജനക്ഷേമ മന്ത്രി വകിതി ശ്രീഹരി, കായിക വകുപ്പ് സ്പെഷ്യല് ചീഫ് സെക്രട്ടറി ജയേഷ് രഞ്ജന് ഐഎസ്, സ്പോര്ട്സ് അതോറിറ്റി ഓഫ് തെലങ്കാന ചെയര്മാന് ശിവ സേന റെഡ്ഡി, സ്പോര്ട്സ് അതോറിറ്റി ഓഫ് തെലങ്കാന വൈസ് ചെയര്പേഴ്സണും എംഡിയുമായ എ.സോണിബാല ദേവി ഐഎഎസ് എന്നിവര് ചേര്ന്ന് പിവിഎല് സീസണ് 4ന്റെ പോസ്റ്റര് പ്രകാശനം ചെയ്തു.
തെലങ്കാന കായികരംഗത്തെ അതീവ താല്പ്പര്യത്തോടെ കാണുന്ന ഒരു സംസ്ഥാനമാണെന്ന് പ്രൈം വോളിബോള് ലീഗിന് പിന്തുണ പ്രഖ്യാപിച്ചുകൊണ്ട് തെലങ്കാന മുഖ്യമന്ത്രി എ.രേവന്ത് റെഡ്ഡി പറഞ്ഞു. പ്രൈം വോളിബോള് ലീഗിന്റെ നാലാം സീസണ് ഹൈദരാബാദിലേക്ക് സ്വാഗതം ചെയ്യുന്നതില് ഞങ്ങള്ക്ക് അതിയായ സന്തോഷമുണ്ട്. ഇത്തരം ടൂര്ണമെന്റുകള്ക്ക് ആതിഥേയത്വം വഹിക്കുന്നത് നമ്മുടെ ലോകോത്തര കായിക സൗകര്യങ്ങള് പ്രദര്ശിപ്പിക്കാന് മാത്രമല്ല, നമ്മുടെ യുവജനങ്ങളെ കായികരംഗവുമായി കൂടുതല് ബന്ധിപ്പിക്കാനും സഹായിക്കും. പിവിഎല് ടീമിന് ഞങ്ങളുടെ പൂര്ണ പിന്തുണ നല്കുന്നു, വോളിബോളിന്റെയും കായിക വിനോദത്തിന്റെയും ആവേശം ഉയര്ത്തിപ്പിടിക്കുന്ന ഒരു വിജയകരമായ സീസണിനായി ഞങ്ങള് കാത്തിരിക്കുകയാണന്നും അദ്ദേഹം കൂട്ടിച്ചേര്ത്തു.
പ്രൈം വോളിബോള് ലീഗിന്റെ സംഘാടകരുടെ അര്പ്പണബോധം കാണുമ്പോള് ഏറെ സന്തോഷമുണ്ടെന്നും, നഗരത്തിലെ ഏറ്റവും മികച്ച കായിക ഇനങ്ങളിലൊന്നായി പിവിഎലിനെ ഒരുക്കുന്നതിനുള്ള അവരുടെ ശ്രമങ്ങളെ അഭിനന്ദിക്കുന്നുവെന്നും തെലങ്കാന കായിക യുവജനക്ഷേമ മന്ത്രി വകിതി ശ്രീഹരി പറഞ്ഞു. ഹൈദരാബാദിലേക്ക് ലീഗിനെ വീണ്ടും സ്വാഗതം ചെയ്യുന്നതില് ഞങ്ങള് അതീവ സന്തുഷ്ടരാണ്. കായികതാരങ്ങള്ക്കും ആരാധകര്ക്കും വോളിബോള് പ്രേമികള്ക്കും ആവേശം പൂര്ണമായി ആസ്വദിക്കാന് സാധ്യമായതെല്ലാം ഞങ്ങള് ചെയ്യുമെന്നും ചടങ്ങില് അദ്ദേഹം ഉറപ്പുനല്കി.
പിവിഎല് സീസണ് 4 ഹൈദരാബാദിലേക്ക് കൊണ്ടുവരുന്നതില് തെലങ്കാന സര്ക്കാര് നല്കിയ അചഞ്ചലമായ പിന്തുണയ്ക്ക് ചടങ്ങില് സംസാരിച്ച ഹൈദരാബാദ് ബ്ലാക്ക് ഹോക്സിന്റെ മുഖ്യഉടമ അഭിഷേക് റെഡ്ഡി ഹൃദ്യമായ നന്ദി അറിയിച്ചു. കായികരംഗം പ്രോത്സാഹിപ്പിക്കുന്നതിനുള്ള സര്ക്കാരിന്റെ പ്രതിബദ്ധത ഇതിനെ യാഥാര്ഥ്യമാക്കുന്നതില് നിര്ണായക പങ്ക് വഹിച്ചു. സംസ്ഥാനത്തേക്ക് മികച്ച കായിക മത്സരങ്ങള് ആകര്ഷിക്കാനുള്ള നമ്മുടെ സര്ക്കാരിന്റെ ശക്തമായ നീക്കമാണ് ഇത് കാണിക്കുന്നതെന്നും അദ്ദേഹം പറഞ്ഞു.
പ്രൈം വോളിബോള്
10 ടീം ഫ്രാഞ്ചൈസികള് പങ്കെടുക്കുന്ന ഇന്ത്യയിലെ ആദ്യത്തെ പ്രൊഫഷണല് വോളിബോള് ലീഗാണ് പ്രൈം വോളിബോള് ലീഗ്. ഇന്ത്യയിലെ മുന്നിര കായിക വിപണന സ്ഥാപനമായ ബേസ്ലൈന് വെഞ്ച്വേഴ്സിന്റെ സഹഉടമസ്ഥതയിലുള്ളതും അവര് തന്നെ എക്സ്ക്ലൂസീവ് മാര്ക്കറ്റിങ് നിര്വഹിക്കുകയും ചെയ്യുന്ന ലീഗിന്റെ സീസണ് 1, 2, 3 എന്നിവ വിജയകരമായി പൂര്ത്തിയാക്കിയാണ് നാലാം സീസണിലേക്ക് കടക്കുന്നത്. വോളിബോളിന്റെ ആഗോള ബോഡിയായ ഫെഡറേഷന് ഇന്റര്നാഷണല് ഡി വോളി ബാളുമായി (എഫ്ഐവിബി) ചേര്ന്ന് പ്രവര്ത്തിക്കുന്ന പ്രൈം വോളിബോള് ലീഗിന്റെ നാലാം സീസണ് 2025 ഒക്ടോബര് 2ന് ഹൈദരാബാദില് ആരംഭിക്കും. ഇന്ത്യയില് നിന്നും ലോകമെമ്പാടുമുള്ള താരങ്ങള് പങ്കെടുക്കുന്ന ലീഗിലേക്ക് എഫ്ഐവിബിയുടെ അന്താരാഷ്ട്ര ട്രാന്സ്ഫര് നടപടിക്രമങ്ങളിലൂടെയാണ് കളിക്കാരെ തിരഞ്ഞെടുത്തത്.