അണി നിരന്നത് 633 കലാകാരന്മാർ, ഗിന്നസ് വേൾഡ് റെക്കോർഡ് നേടി മെ​ഗാ അർദ സൗദിയ

റിയാദിലെ അൽ ഹുക്കും പാലസ് ഏരിയയിലെ അൽ അദ്ൽ സ്ക്വയറിലാണ് പരിപാടി അരങ്ങേറിയത്.

റിയാദ്: സൗദി സ്ഥാപക ദിനാഘോഷത്തിന്റെ ഭാ​ഗമായി നടന്ന മെ​ഗാ `അർദ സൗദിയ' പരമ്പരാ​ഗത നാടോടി നൃത്തത്തിന് ​ഗിന്നസ് ബുക്ക് ഓഫ് വേൾഡ് റെക്കോഡ്. റിയാദിലെ അൽ ഹുക്കും പാലസ് ഏരിയയിലെ അൽ അദ്ൽ സ്ക്വയറിലാണ് പരിപാടി അരങ്ങേറിയത്. നാലു ദിവസം നീണ്ട സ്ഥാപക ദിനാഘോഷത്തിന് സമാപനം കുറിച്ചുകൊണ്ടാണ് മെ​ഗാ അർദ സൗദിയ നടന്നത്. ഏകദേശം 50,000 സന്ദർശകരാണ് ഇവിടേക്കെത്തിയത്. റിയാദ് റോയൽ കമ്മീഷനാണ് പരിപാടി സംഘടിപ്പിച്ചത്. 

633 കലാകാരന്മാർ പങ്കെടുത്ത ഏറ്റവും വലിയ സൗദി നൃത്ത പരിപാടി എന്ന നിലയിലാണ് ​ഗിന്നസ് ബുക്ക് ഓഫ് വേൾഡ് റെക്കോഡ് നേടിയത്. രാജ്യത്തിന്റെ പാരമ്പര്യവും സംസ്കാരവും വിളിച്ചോതുന്നതായിരുന്നു ഈ പരിപാടി. ​ഗവർണർ അമീർ ഫൈസൽ ബിൻ ബന്ദറിന്റെ മേൽനോട്ടത്തിലായിരുന്നു നൃത്തം സംഘടിപ്പിച്ചത്. അർദയോടനുബന്ധിച്ച് സൗദിയുടെ ചരിത്രം കാണിച്ചുകൊണ്ടുള്ള പ്രദർശനവും നടന്നിരുന്നു. ഇത് കാണാനും രാജ്യത്തിന്റെ ചരിത്രം മനസ്സിലാക്കാനും നിരവധി സന്ദർശകരാണ് ഇവിടേക്ക് എത്തിയത്.