'ചിൽ' ആക്കാൻ 20,000 കി.മി ദൂരത്ത് നിന്നൊരു ഐസ് ക്യൂബ്, അത്യപൂർവ്വം; ആർട്ടിക് ഐസ് ക്യൂബുകൾ എത്തുന്നു, വില ഇതാ

​ഗ്രീൻലാൻഡിൽ 1,00,000 വർഷം കൊണ്ട് രൂപം കൊണ്ട ​​ഗ്ലേസിയറുകളിൽ നിന്ന് കൊത്തിയെടുക്കുന്നവയാണ് ഇത്തരം ഐസ് ക്യൂബുകൾ

ദുബൈ: ഈ ഐസ് ക്യൂബുകൾക്ക് പറയാനുള്ളത് ഇമ്മിണി വല്യ യാത്രയുടെ കഥയാണ്. ഒന്നും രണ്ടുമല്ല, 20,000 കിലോ മീറ്ററുകളാണ് ഇവർ നിങ്ങളുടെ മനസ്സിനെയും വയറിനെയും `ചിൽ' ആക്കാൻ താണ്ടിയെത്തുന്നത്. പറഞ്ഞുവരുന്നത് ദുബൈയിലെ പാനീയങ്ങളിൽ വൈകാതെ തന്നെ ഇടം പിടിക്കാനെത്തുന്ന `ഏറ്റവും ശുദ്ധമായ' എന്ന ഖ്യാതി ലഭിച്ച ഐസ് ക്യൂബുകളെ പറ്റിയാണ്. ​ഗ്രീൻലാൻഡിൽ 1,00,000 വർഷം കൊണ്ട് രൂപം കൊണ്ട ​​ഗ്ലേസിയറുകളിൽ നിന്ന് കൊത്തിയെടുക്കുന്നവയാണ് ഇത്തരം ഐസ് ക്യൂബുകൾ. ആർട്ടിക് ഐസ് ക്യൂബുകൾ എന്നറിയപ്പെടുന്ന ഇവ ഉടൻ തന്നെ ദുബൈയിൽ എല്ലായിടത്തും ലഭ്യമാകുമെന്നാണ് വിവരങ്ങൾ സൂചിപ്പിക്കുന്നത്. ഇനി വില കേൾക്കാൻ തയാറായിക്കോളൂ, ആറ് ക്യൂബുകൾക്ക് 249 ദിർഹമാണ് വില വരുന്നത്. 
​
ഗ്ലേസിയറിൽ നിന്ന് വേർപെട്ട 22 ടൺ വരുന്ന കട്ടയിൽ നിന്നാണ് ആർട്ടിക് ഐസ് ക്യൂബുകൾ ഉൽപ്പാദിപ്പിക്കുന്നത്. കഴിഞ്ഞ വർഷം ജനുവരിയിലാണ് ഈ ഐസ് കട്ട ദുബൈയിൽ എത്തിച്ചത്. അൽ ഖോസിലുള്ള നാച്ചുറൽ ഐസ് ഫാക്ടറിയിലാണ് ഐസ് ക്യൂബുകളുടെ നിർമാണം നടക്കുന്നതെന്നും ഇത് സംബന്ധിച്ച റിപ്പോർട്ടുകൾ പുറത്തുവന്നതോടെ `ശുദ്ധമായ' ഐസിന്റെ ആവശ്യം വർധിച്ചതായും ഫാക്ടറിയുടെ സഹ ഉടമയായ അഹമ്മദ് അൽ മസ്റൂയി പറഞ്ഞു. 

ആരെയും ആകർഷിക്കുന്ന രീതിയിലാണ് ഈ ഐസ് ക്യൂബുകളുടെ പാക്കേജിങ്. ആകാശ നീല നിറത്തിലുള്ള ത്രികോണാകൃതിയിലുള്ള പെട്ടിയിലാണ് ആർട്ടിക് ഐസ് ക്യൂബുകൾ ലഭ്യമാകുക. ഇതിന്റെ പാക്കേജിങ്ങിനായി ഏതാണ്ട് ഒരു വർഷത്തോളം ചെലവഴിച്ചിട്ടുണ്ടെന്ന് ആർട്ടിക് ഐസ് ചെയർമാൻ സമീർ ബെൻ തബീബ് പറഞ്ഞു. ഈ ഐസ് ക്യൂബുകൾക്ക് പ്രത്യേകമായ രുചി ഉണ്ടാകില്ല. ഒരിക്കൽ ​ഗ്രീൻലാൻഡിലൂടെ താൻ സഞ്ചരിച്ചിരുന്ന സമയത്ത് ബോട്ട് ഒരു ​ഗ്ലേസിയറിൽ ഇടിക്കുകയുണ്ടായി. കപ്പിത്താന് ആ ​ഗ്ലേസിയർ കാണാൻ പോലും കഴിഞ്ഞിരുന്നില്ല. അത് അത്രക്കും ശുദ്ധമായിരുന്നു. ഈ ഒരു സംഭവത്തിന് ശേഷമാണ് ​ഗ്രീൻലാൻഡിലെ ​ഗ്ലേസിയറുകളിൽ നിന്നും അതി ശുദ്ധമായ ഐസ് ക്യൂബുകൾ നിർമിക്കാം എന്ന ആശയമുദിച്ചത്. അത് പിന്നീട് ഒരു ബിസിനസ് ആക്കി വളർത്തുകയായിരുന്നു - സമീർ ബെൻ തബീബ് പറയുന്നു.

ദുബൈയിലെ റസ്റ്റോറന്റ് ആയ നഹാതെയിലെ പ്രീമിയം കോക്ക്ടെയിലുകളിൽ ആർട്ടിക് ഐസ് ക്യൂബുകൾ ഉപയോ​ഗിക്കുമെന്നാണ് അധികൃതർ നൽകുന്ന വിവരങ്ങൾ. നഹാതെയിലെ അത്യാഡംബര മെനുവിന്റെ ഭാ​ഗമായി വികസിപ്പിച്ചെടുത്ത ഇത്തരം പാനീയങ്ങൾക്ക് 300 മുതൽ 700 ദിർഹം വരെയായിരിക്കും വില വരുന്നത്. നിലവിൽ ഇതിന്റെ വില 100 മുതൽ 200 ദിർഹം വരെയാണ്.