യുഎഇയിൽ ഇന്ന് വിവിധയിടങ്ങളിൽ മഴക്ക് സാധ്യത

ഇന്ന് രാജ്യത്ത് വിവിധയിടങ്ങളിൽ മഴയ്ക്കും ശനിയാഴ്ച രാവിലെ മൂടൽമഞ്ഞ് രൂപപ്പെടാനും സാധ്യതയുണ്ടെന്ന് കാലാവസ്ഥ വകുപ്പ് മുന്നറിയിപ്പ്  

ദുബായ്: ഇന്ന് യുഎഇയിലെ താപനിലയിൽ കുറവ് രേഖപ്പെടുത്തുമെന്നും വിവിധയിടങ്ങളിൽ മഴയ്ക്ക് സാധ്യതയുള്ളതായും കാലാവസ്ഥ വകുപ്പ് അറിയിച്ചു. രാത്രിയിൽ ഈർപ്പമുള്ള കാലാവസ്ഥയായിരിക്കും. ശനിയാഴ്ച രാവിലെ മൂടൽമഞ്ഞ് രൂപപ്പെടാനും സാധ്യതയുണ്ട്. തീരപ്രദേശ മേഖലകളിൽ താപനില ഏറ്റവും കൂടിയത് 22 മുതൽ 26 ഡി​ഗ്രി സെൽഷ്യസ് വരെയും ഏറ്റവും കുറഞ്ഞത് 13 മുതൽ 18 ​ഡി​ഗ്രി സെൽഷ്യസ് വരെയും രേഖപ്പെടുത്തും.

മണിക്കൂറിൽ 45 കിലോമീറ്റർ വേ​ഗതയിൽ വീശുന്ന കാറ്റിനും സാധ്യതയുണ്ട്. കാറ്റ് ശക്തമാകാനും പൊടിപടലങ്ങൾ ഉയരാനും സാധ്യതയുള്ളതിനാൽ പൗരന്മാരും താമസക്കാരും ശ്രദ്ധ പുലർത്തണമെന്ന് കാലാവസ്ഥ വകുപ്പ് മുന്നറിയിപ്പ് നൽകിയിട്ടുണ്ട്.