കുവൈത്തിൽ കടൽ വഴിയുള്ള മയക്കുമരുന്ന് കടത്ത് 90 ശതമാനവും തടഞ്ഞു, തീരദേശ സംരക്ഷണത്തിലെ നേട്ടങ്ങൾ വ്യക്തമാക്കി അധികൃതർ

കടൽ വഴിയുള്ള കടത്ത് 90 ശതമാനം വരെ കുറയ്ക്കാൻ കുവൈത്തിന് കഴിഞ്ഞതായി അധികൃതർ. ഏറ്റവും താഴ്ന്ന റാങ്ക് മുതൽ ഉയർന്ന റാങ്ക് വരെയുള്ള ഉദ്യോഗസ്ഥർ ഒരു ടീമായി പ്രവർത്തിച്ചാണ് ഈ നേട്ടം കൈവരിച്ചത്. 

കുവൈത്ത് സിറ്റി: കടൽ വഴിയുള്ള മയക്കുമരുന്ന് കടത്ത് തടയുന്നതിൽ കുവൈത്ത് ശ്രദ്ധേയമായ പുരോഗതി കൈവരിച്ചതായി കോസ്റ്റ് ഗാർഡ് ജനറൽ ഡയറക്ടറേറ്റ് ഡയറക്ടർ ജനറൽ ബ്രിഗേഡിയർ ജനറൽ ഷെയ്ഖ് മുബാറക് അൽ-യൂസഫ്. കടൽ വഴിയുള്ള കടത്ത് 90 ശതമാനം വരെ കുറയ്ക്കാൻ രാജ്യത്തിന് കഴിഞ്ഞെന്നും അദ്ദേഹം വ്യക്തമാക്കി.

ഏറ്റവും താഴ്ന്ന റാങ്ക് മുതൽ ഉയർന്ന റാങ്ക് വരെയുള്ള ഉദ്യോഗസ്ഥർ ഒരു ടീമായി പ്രവർത്തിച്ചാണ് ഈ നേട്ടം കൈവരിച്ചതെന്ന് അദ്ദേഹം പറഞ്ഞു. കൂടാതെ, തീരദേശ നിരീക്ഷണ സംവിധാനവും പട്രോളിംഗ് ബോട്ടുകളുടെ പദ്ധതിയും 2026-ഓടെ പൂർണ്ണമായും പ്രവർത്തനക്ഷമമാകും എന്നും അദ്ദേഹം കൂട്ടിച്ചേർത്തു. ഗൾഫ് സഹകരണ കൗൺസിൽ (ജിസിസി) രാജ്യങ്ങളിലെ കോസ്റ്റ് ഗാർഡ്, അതിർത്തി സേനാ മേധാവികളുടെ വാർഷിക യോഗത്തിന് കുവൈത്ത് ആതിഥേയത്വം വഹിച്ചതിൻ്റെ ഭാഗമായി സബാഹ് അൽ-അഹമ്മദ് നാവിക താവളത്തിൽ വെച്ചാണ് ഷെയ്ഖ് മുബാറക് അൽ-യൂസഫ് ഇക്കാര്യങ്ങൾ അറിയിച്ചത്.