യുഎഇയില് ദേശീയ ദിനാഘോഷങ്ങള്ക്കിടെ നിയമലംഘനം; 1,469 ഡ്രൈവര്മാര്ക്ക് പിഴ, വാഹനങ്ങള് പിടിച്ചെടുത്തു
Synopsis
ലൈസന്സില് ബ്ലാക്ക് പോയിന്റുകള്, 2,000 ദിര്ഹം പിഴ, വാഹനം കണ്ടുകെട്ടല് എന്നീ നടപടികളാണ് നിയമലംഘകര്ക്കെതിരെ സ്വീകരിച്ചത്.
ഫുജൈറ: യുഎഇയുടെ 51-ാമത് ദേശീയ ദിനാഘോഷങ്ങള്ക്കിടെ നിയമലംഘനങ്ങള് നടത്തിയ വാഹന ഡ്രൈവര്മാര്ക്കെതിരെ നടപടി. ഇതിന്റെ ഭാഗമായി നിയമലംഘനം കണ്ടെത്തിയ 43 വാഹനങ്ങളാണ് ഫുജൈറ പൊലീസ് പിടിച്ചെടുത്തത്. 1,469 ഡ്രൈവര്മാര്ക്ക് പിഴ ചുമത്തിയ ഗതാഗത നിയമലംഘനങ്ങള്ക്കാണ് ഇവര്ക്ക് പിഴ ചുമത്തിയത്.
സ്പ്രേയിങ് വസ്തുക്കള് ഉപയോഗിക്കുക, വാഹനത്തിന്റെ നിറത്തില് മാറ്റം വരുത്തുക, കാഴ്ചയെയും സുരക്ഷയെയും ബാധിക്കുന്ന രീതിയില് വാഹനത്തില് സ്റ്റിക്കറുകള് പതിപ്പിക്കുക, അശ്രദ്ധമായ ഡ്രൈവിങ്, വാഹനത്തിന്റെ സണ്റൂഫിലൂടെ യാത്രക്കാര് പുറത്തേക്ക് നില്ക്കുക എന്നിങ്ങനെ വിവിധ നിയമലംഘനങ്ങള്ക്കാണ് ഡ്രൈവര്മാര്ക്ക് പിഴ ചുമത്തിയത്. ലൈസന്സില് ബ്ലാക്ക് പോയിന്റുകള്, 2,000 ദിര്ഹം പിഴ, വാഹനം കണ്ടുകെട്ടല് എന്നീ നടപടികളാണ് നിയമലംഘകര്ക്കെതിരെ സ്വീകരിച്ചത്. വാഹനം അലങ്കരിക്കുന്നതിനുള്ള മാര്ഗനിര്ദ്ദേശങ്ങളും ഗതാഗത നിയമങ്ങളും ലംഘിച്ച വാഹനങ്ങളാണ് പിടിച്ചെടുത്തതെന്ന് ബ്രിഗേഡിയര് ജനറല് അല് യമഹി പറഞ്ഞു. വാഹനങ്ങള് അലങ്കരിക്കുന്നതിനുള്ള മാര്ഗനിര്ദ്ദേശങ്ങളെ കുറിച്ച് മാധ്യമങ്ങള് വഴി ബോധവത്കരണം നടത്തിയിരുന്നു.
Read More - യുഎഇയില് പ്രവാസി യുവാവ് പാലത്തില് നിന്ന് ചാടി ആത്മഹത്യക്ക് ശ്രമിച്ചു, തക്കസമയത്ത് രക്ഷിച്ച് പൊലീസ്
അതേസമയം യുഎഇയിലെ 51-ാം ദേശീയ ദിനാഘോഷങ്ങള്ക്കിടെ നിയമ ലംഘനങ്ങള് നടത്തിയ 132 വാഹനങ്ങള് പിടിച്ചെടുത്തതായി ദുബൈ പൊലീസ് അറിയിച്ചിരുന്നു. പൊതുജനങ്ങള്ക്ക് ശല്യമുണ്ടാക്കുക, വാഹനങ്ങളുടെ നിറം മാറ്റുക, അനുമതിയില്ലാതെ വാഹനങ്ങള് നിറയെ സ്റ്റിക്കറുകള് പതിക്കുക, വാഹനങ്ങളില് നിന്ന് മാലിന്യങ്ങള് വലിച്ചെറിയുക, സ്വന്തം ജീവനും മറ്റുള്ളവരുടെ ജീവനും അപകടത്തിലാക്കുന്ന തരത്തില് അശ്രദ്ധമായി വാഹനം ഓടിക്കുക തുടങ്ങിയ കുറ്റങ്ങള് ചെയ്തവര്ക്ക് ബ്ലാക്ക് പോയിന്റുകളും നല്കിയിട്ടുണ്ട്.
Read More - ഉടമ അറിയാതെ കാര് എടുത്തുകൊണ്ടുപോയ സുഹൃത്ത് വരുത്തിവെച്ചത് 13 ലക്ഷത്തിന്റെ ട്രാഫിക് ഫൈന്; കേസ് കോടതിയില്
രാജ്യത്ത് ദേശീയ ദിനാഘോഷങ്ങള് നടന്ന മൂന്ന് ദിവസത്തിനിടെ നിയമലംഘനങ്ങള് നടത്തിയ ആകെ 4697 ഡ്രൈവര്മാര്ക്ക് പിഴ ചുമത്തിയതായി ദുബൈ പൊലീസിലെ ട്രാഫിക് ജനറല് ഡിപ്പാര്ട്ട്മെന്റ് ആക്ടിങ് ഡയറക്ടര് ബ്രിഗേഡിയര് ജുമ സലീം ബിന് സുവൈദാന് പറഞ്ഞു. ബര്ദുബൈയില് 72 വാഹനങ്ങളും ദേറയില് 60 വാഹനങ്ങളും ഗതാഗത നിയമ ലംഘനങ്ങളുടെ പേരില് പിടിച്ചെടുത്തതായും അദ്ദേഹം പറഞ്ഞു.
ഏഷ്യാനെറ്റ് ന്യൂസ് മലയാളത്തിലൂടെ Pravasi Malayali News ലോകവുമായി ബന്ധപ്പെടൂ. Gulf News in Malayalam ജീവിതാനുഭവങ്ങളും, അവരുടെ വിജയകഥകളും വെല്ലുവിളികളുമൊക്കെ — പ്രവാസലോകത്തിന്റെ സ്പന്ദനം നേരിട്ട് അനുഭവിക്കാൻ Asianet News Malayalam