പ്രവാസി മലയാളിയെ താമസസ്ഥലത്ത് തൂങ്ങിമരിച്ച നിലയില്‍ കണ്ടെത്തി

അലക്കിയ വസ്ത്രങ്ങൾ വിരിക്കാനായി  വെള്ളിയാഴ്ച പുലർച്ചെ മുകളിലെ നിലയിലേക്ക്​ പോയ സഹപ്രവർത്തകരാണ് തൂങ്ങിമരിച്ച നിലയിൽ ഇദ്ദേഹത്തെ കണ്ടത്. ഉടൻ പൊലീസിനെ വിവരം അറിയിച്ചു. 

റിയാദ്: മലയാളിയെ താമസസ്ഥലത്ത്​ തൂങ്ങിമരിച്ച നിലയിൽ കണ്ടെത്തി. സൗദി തലസ്ഥാനമായ റിയാദിൽനിന്ന്​ 1200 കിലോമീറ്ററകലെ വടക്കൻ അതിർത്തി പട്ടണമായ അൽഖുറയാത്തിലെ സനാഇയ ഏരിയയിൽ തിരുവനന്തപുരം കൊല്ലോട്​ സ്വദേശി കുഴിവിള റോഡരികത്ത്​ വീട്ടിൽ വനജകുമാർ രഘുവരനെ (49) ആണ്​ മരിച്ച നിലയിൽ കണ്ടത്. 

ഏഴുവർഷമായിരുന്നു അദ്ദേഹം നാട്ടിൽ പോയിട്ട്. സാമ്പത്തിക പ്രയാസങ്ങൾ നേരിട്ടിരുന്നുവെന്നാണ് വിവരം. 25 വർഷമായി ഇവിടെ പ്രവാസിയായിരുന്ന അദ്ദേഹം അൽഖുറയാത്തിലെ സനാഇയ ഏരിയയിൽ അലൂമിനിയം ഫാബ്രിക്കേഷൻ വർക്ക്​ഷോപ്പ്​ നടത്തുകയായിരുന്നു. വ്യാഴാഴ്​ച ഉച്ചകഴിഞ്ഞത് മുതൽ അദ്ദേഹത്തെ കാണാതായിരുന്നുവത്രെ.  അലക്കിയ വസ്ത്രങ്ങൾ വിരിക്കാനായി  വെള്ളിയാഴ്ച പുലർച്ചെ മുകളിലെ നിലയിലേക്ക്​ പോയ സഹപ്രവർത്തകരാണ് തൂങ്ങിമരിച്ച നിലയിൽ ഇദ്ദേഹത്തെ കണ്ടത്. ഉടൻ പൊലീസിനെ വിവരം അറിയിച്ചു. 

ഒപ്പം ജോലി ചെയ്യുന്ന മൂന്നുപേരോടൊപ്പം കെട്ടിടത്തിന്റെ താഴത്തെ നിലയിലാണ് വനജകുമാറും താമസിച്ചിരുന്നത്. സംഭവത്തെ തുടർന്ന്​ മറ്റ്​ മൂന്നുപേരെയും സ്റ്റേഷനിലേക്ക്​ കൊണ്ടുപോയി പൊലീസ്​ മൊഴിയെടുത്തിട്ടുണ്ട്. മൃതദേഹം അൽഖുറയാത്ത് ജനറൽ ആശുപത്രി മോർച്ചറിയിൽ സൂക്ഷിച്ചിരിക്കുകയാണ്.

മരണാനന്തര നിയമനടപടികൾ പൂർത്തിയാക്കാനും മൃതദേഹം നാട്ടിൽ അയക്കുന്നതിനുള്ള പ്രവർത്തനങ്ങൾക്കും ഇന്ത്യൻ കൾച്ചറൽ ഫൗണ്ടേഷൻ (ഐ.സി.എഫ്​) ഭാരവാഹി സലീം കൊടുങ്ങല്ലൂർ രംഗത്തുണ്ട്. വനജകുമാറിന് നാട്ടിൽ ഭാര്യയും മക്കളുമുണ്ട്. എസ്. രഘുവരനാണ് പിതാവ്. മാതാവ്​- രത്നമ്മ.