കുവൈത്തിൽ ചികിത്സാ പിഴവ്; ഡോക്ടർക്കെതിരെ കർശന നടപടി, 7,000 ദിനാർ പിഴയും മൂന്ന് മാസത്തെ സസ്‌പെൻഷനും

കുവൈത്തിലെ സ്വകാര്യ ആരോഗ്യ സ്ഥാപനങ്ങളിൽ ചികിത്സാ പിഴവുകൾ കണ്ടെത്തിയതിനെ തുടർന്ന് രണ്ട് കൺസൾട്ടന്റ് ഡോക്ടർമാർക്കെതിരെ കർശന നടപടി സ്വീകരിച്ചു. ഒരാൾക്ക് 7,000 ദിനാർ പിഴയും സസ്‌പെൻഷനും ലഭിച്ചപ്പോൾ, മറ്റൊരു ഡോക്ടറുടെ ലൈസൻസ് ഒരു വർഷത്തേക്ക് റദ്ദാക്കി.

കുവൈത്ത് സിറ്റി: കുവൈത്തിലെ സ്വകാര്യ ആരോഗ്യ സ്ഥാപനങ്ങളിൽ തൊഴിൽപരമായ നിയമലംഘനങ്ങൾ കണ്ടെത്തിയതിനെ തുടർന്ന് രണ്ട് കൺസൾട്ടന്റ് ഡോക്ടർമാർക്കെതിരെ കർശന നടപടി. ചികിത്സാ പിഴവ് കണ്ടെത്തിയതിനെ തുടർന്ന് സ്വകാര്യ ആരോഗ്യ സ്ഥാപനങ്ങളുടെ ലൈസൻസ് ഉടമയും മെഡിക്കൽ ഡയറക്ടറുമായ ഇന്റേണൽ മെഡിസിൻ കൺസൾട്ടന്റിന് 7,000 കുവൈത്ത് ദിനാർ പിഴയും മൂന്ന് മാസത്തെ ജോലി വിലക്കും ഏർപ്പെടുത്തി.

പ്രത്യേക സാങ്കേതിക സമിതിയുടെ അന്വേഷണത്തിൽ നിരവധി തൊഴിൽപരമായ നിയമലംഘനങ്ങൾ കണ്ടെത്തിയതിനെ തുടർന്നാണ് നടപടി. 3,000 ദിനാറും 4,000 ദിനാറും വീതം രണ്ട് പിഴകളും മൂന്ന് മാസത്തെ സസ്‌പെൻഷനുമാണ് ഏർപ്പെടുത്തിയത്. അതേസമയം, സ്വകാര്യ മെഡിക്കൽ സെന്ററിൽ ജോലി ചെയ്യുന്ന നേത്രരോഗ വിദഗ്ധനായ മറ്റൊരു കൺസൾട്ടന്റ് ഡോക്ടറുടെ മെഡിക്കൽ ലൈസൻസ് ഒരു വർഷത്തേക്ക് സസ്‌പെൻഡ് ചെയ്തു. ചികിത്സാ പിഴവും തൊഴിൽപരമായ നിയമലംഘനവും കണ്ടെത്തിയതിനെ തുടർന്നാണ് നടപടി.

രോഗികളുടെ സുരക്ഷയും അവകാശങ്ങളും സംരക്ഷിക്കുന്നതിൽ വിട്ടുവീഴ്ചയുണ്ടാകില്ലെന്ന് ആരോഗ്യ മന്ത്രാലയം വ്യക്തമാക്കി. ആരോഗ്യമന്ത്രി ഡോ. അഹമ്മദ് അൽ അവാദിയുടെ നിർദേശപ്രകാരം സ്വകാര്യ ആശുപത്രികളിലും ക്ലിനിക്കുകളിലും മെഡിക്കൽ സെന്ററുകളിലും പരിശോധനയും നിരീക്ഷണവും ശക്തമാക്കുമെന്നും നിയമലംഘനങ്ങൾ കണ്ടെത്തുന്നവർക്കെതിരെ കർശന നടപടി തുടരുമെന്നും മന്ത്രാലയം അറിയിച്ചു.