ഇനി അൽപ്പം സാഹസികതയാകാം, ദോഫാറിൽ വരുന്നത് മൂന്ന് പർവത പാതകൾ, ഒപ്പം വിയ ഫെറാറ്റ ട്രാക്കും

ഐൻ ഹഷീർ, തബൽദി, ഐൻ ​ഗയ്ദ് എന്നിവിടങ്ങളിലാണ് പുതിയ പാതകൾ നിർമിക്കുന്നത്.

സലാല: ദോഫാർ ​ഗവർണറേറ്റിലെ സാഹസിക ടൂറിസം മേഖലയെ കൂടുതൽ ശക്തിപ്പെടുത്തുന്നതിനുള്ള പുതിയ പദ്ധതിയുമായി പൈതൃക, ടൂറിസം മന്ത്രാലയം. മൂന്ന് മലയോര പാതകൾ വികസിപ്പിക്കുന്നതാണ് പുതിയ പദ്ധതി. സാഹസിക ടൂറിസത്തിൽ ശ്രദ്ധ കേന്ദ്രീകരിച്ചുള്ള പ്രാദേശിക കമ്പനികളുമായി സഹകരിച്ചായിരിക്കും പാതകളുടെ നിർമാണം. ഇതോടെ ​ഗവർണറേറ്റിലേക്ക് കൂടുതൽ സന്ദർശകരെ ആകർഷിക്കാനാകുമെന്നാണ് പ്രതീക്ഷിക്കുന്നത്. 

ഐൻ ഹഷീർ, തബൽദി, ഐൻ ​ഗയ്ദ് എന്നിവിടങ്ങളിലാണ് പുതിയ പാതകൾ നിർമിക്കുന്നത്. ഇവിടെയെത്തുന്ന സഞ്ചാരികൾക്ക് യാത്ര സു​ഗമമാക്കുന്നതിനായി പാതകളിലുടനീളം അടയാളങ്ങളും ദിശാസൂചകങ്ങളും സ്ഥാപിക്കും. റോ‍ഡുകളിലൂടെയുള്ള യാത്ര കൂടുതൽ മെച്ചപ്പെടുത്തുന്നതിന്റെ ഭാ​ഗമായി പുതിയ റോഡുകൾ നിർമിക്കുകയും നിലവിലെ റോ‍ഡുകൾ നവീകരിക്കുകയും ചെയ്യും. ദോഫാറിന്റെ പ്രകൃതി ഭം​ഗി ആസ്വദിച്ച് സാഹസിക യാത്രകൾ ചെയ്യാൻ സന്ദർശകർക്ക് അവസരമൊരുക്കുകയാണ് ഇതിലൂടെ ലക്ഷ്യം വെക്കുന്നത്. 

പദ്ധതി പ്രകാരം, ജബൽ സംഹാനിൽ വിയ ഫെറാറ്റ ട്രാക്ക് അവതരിപ്പിക്കുന്നതിനായുള്ള നടപടികളും മന്ത്രാലയത്തിന്റെ നേതൃത്വത്തിൽ പുരോ​ഗമിക്കുന്നുണ്ട്. ദോഫാറിലെ ധാരാളമായുള്ള മലനിരകളുടെ ഉയരങ്ങളിൽ അത്യു​ഗ്രൻ സാഹസികത ആസ്വദിക്കാൻ ഇതിലൂടെ സന്ദർശകർക്ക് കഴിയും. കടൽത്തീരങ്ങൾ, മലനിരകൾ, കൃഷിയിടം, മരുഭൂമി എന്നിങ്ങനെ വൈവിധ്യമാർന്ന ഭൂപ്രകൃതിയാണ് ദോഫാറിനെ സഞ്ചാരികളുടെ പറുദീസയാക്കുന്നത്. നാൽപ്പതിലധികം പ്രശസ്തമായ മലയോര പാതകളാണ് ദോഫാറിലുള്ളത്. ലോക പൈതൃക പട്ടികയിൽ ഉൾപ്പെടുത്തിയിട്ടുള്ള ചരിത്ര, പുരാവസ്തു സ്ഥലങ്ങളും ​ഗവർണറേറ്റിലുണ്ട്. ദോഫാറിനെ പ്രധാന സാഹസിക ടൂറിസം കേന്ദ്രമാക്കി മാറ്റാനുള്ള സുപ്രധാന ചുവടുവെപ്പിന്റെ ഭാ​ഗമായാണ് പുതിയ പദ്ധതികൾ നടപ്പാക്കുന്നതെന്നും പൈതൃക, ടൂറിസം മന്ത്രാലയം വ്യക്തമാക്കിയിട്ടുണ്ട്.