ലോകത്തിന്‍റെ വിമാനത്താവളമായി ദുബൈ എയർപോർട്ട്, പുതിയ റെക്കോർഡ്; ക​ഴി​ഞ്ഞ വ​ർ​ഷം 9.2 കോ​ടി യാത്രക്കാ‍ർ

9.23 കോടി യാത്രക്കാരാണ് കഴിഞ്ഞ വര്‍ഷം ദുബൈ അന്താരാഷ്ട്ര വിമാനത്താവളം വഴി സഞ്ചരിച്ചത്. 

ദുബൈ: കഴിഞ്ഞ വര്‍ഷം ദുബൈ അന്താരാഷ്ട്ര വിമാനത്താവളം വഴി സഞ്ചരിച്ച യാത്രക്കാരുടെ എണ്ണത്തിൽ വന്‍ വര്‍ധന. കഴിഞ്ഞ വര്‍ഷം 9.23 കോടി യാത്രക്കാരാണ് ദുബൈ അന്താരാഷ്ട്ര വിമാനത്താവളം വഴി സഞ്ചരിച്ചത്. മുന്‍ വര്‍ഷത്തെ അപേക്ഷിച്ച് 6 ശതമാനം വര്‍ധനവാണ് ഉണ്ടായത്. 

കൊവിഡിന് മുമ്പ് 2018ല്‍ 8.91 കോടി യാത്രക്കാരാണ് ദുബൈ അന്താരാഷ്ട്ര വിമാനത്താവളത്തിലൂടെ സഞ്ചരിച്ചത്. ഈ റെക്കോര്‍ഡും മറികടന്നിരിക്കുകയാണ്. ലോകത്തിലെ ഏറ്റവും തിരക്കേറിയ വിമാനത്താവളമെന്ന നേട്ടം നിലനിര്‍ത്തിയിരിക്കുകയാണ് ദുബൈ അന്താരാഷ്ട്ര വിമാനത്താവളം. ലോകത്തിന്‍റെ എയര്‍പോര്‍ട്ടാണ് ദുബൈയെന്നും വ്യോമയാന മേഖലയിലെ പുതിയ ലോകമാണിതെന്നും യുഎഇ വൈസ് പ്രസിഡന്‍റും പ്രധാനമന്ത്രിയും ദുബൈ ഭരണാധികാരിയുമായി ശൈഖ് മുഹമ്മദ് ബിന്‍ റാഷിദ് അല്‍ മക്തൂം എക്സ് പ്ലാറ്റ്ഫോമില്‍ കുറിച്ചു.

ഇ​മാ​റാ​ത്തി നിലവാരം​ അ​നു​സ​രി​ച്ച്​ ആ​ഗോ​ള വ്യോ​മ​യാ​ന രം​ഗം നവീകരിക്കുന്നതിന്​ അ​ടു​ത്ത പ​ത്തു വ​ർ​ഷ​ത്തി​ൽ 12,800 കോ​ടി ദി​ർ​ഹം നി​ക്ഷേ​പി​ക്കു​മെ​ന്നും അ​ദ്ദേ​ഹം വെ​ളി​പ്പെ​ടു​ത്തി. മൂ​ന്ന്​ ല​ക്ഷം വി​മാ​ന സ​ർ​വി​സു​ക​ളാ​ണ്​ ക​ഴി​ഞ്ഞ വ​ർ​ഷം ദുബൈ അന്താരാഷ്ട്ര വിമാനത്താവളത്തിൽ  രേ​ഖ​പ്പെ​ടു​ത്തി​യ​ത്. 106 വി​മാ​ന​ക്ക​മ്പ​നി​ക​ൾ 107 രാ​ജ്യ​ങ്ങ​ളി​ലെ 272 ന​ഗ​ര​ങ്ങ​ളി​ലേ​ക്ക്​ വി​മാ​ന സ​ർ​വി​സു​ക​ൾ ദു​ബൈ​യി​ൽ​ നി​ന്ന്​ ന​ട​ത്തു​ന്നു​ണ്ട്. ഇ​ന്ത്യ, സൗ​ദി അ​റേ​ബ്യ, യു.കെ, പാ​കി​സ്താ​ൻ എ​ന്നി​വി​ട​ങ്ങ​ളി​ലേ​ക്കാ​ണ് ദു​ബൈ​യി​ൽ​ നി​ന്ന്​ കൂടുതൽ വി​മാ​ന​ങ്ങ​ളും സർവീസ് നടത്തുന്നത്. ഈ ​വ​ർ​ഷം ജ​നു​വ​രി​യി​ൽ ആ​ദ്യ 15 ദി​വ​സം ദു​ബൈ വി​മാ​ന​ത്താ​വ​ളം വ​ഴി യാ​ത്ര ചെ​യ്ത​ത്​ 43 ല​ക്ഷം പേ​രാ​ണ്. കഴിഞ്ഞ വര്‍ഷം ആദ്യ 11 മാസങ്ങളില്‍ ദുബൈ വിമാനത്താവളം വഴി 1.7 കോടി അന്താരാഷ്ട്ര യാത്രക്കാര്‍ യാത്ര ചെയ്തതായി ദുബൈ എക്കണോമി ആന്‍ഡ് ടൂറിസം വകുപ്പിന്‍റെ ഏറ്റവും പുതിയ ഡേറ്റയില്‍ വ്യക്തമാക്കുന്നു. 

ഏഷ്യാനെറ്റ് ന്യൂസ് ലൈവ് യൂട്യൂബിൽ കാണാം