സംഘർഷ സാഹചര്യം മുൻനിർത്തി പുതിയ ക്രമീകരണങ്ങൾ; ഈദ്ഗാഹുകൾ ഒഴിവാക്കി, ഖത്തറിൽ ചെറിയ പെരുന്നാൾ നാളെ

ഖത്തറിൽ ഈ വർഷത്തെ ചെറിയ പെരുന്നാൾ മാർച്ച് 20 വെള്ളിയാഴ്ച ആഘോഷിക്കാൻ ഔഖാഫ് മന്ത്രാലയം തീരുമാനിച്ചു. മാസപ്പിറവി ദൃശ്യമാകാത്തതിനാൽ റമദാൻ 30 പൂർത്തിയാക്കിയാണ് പെരുന്നാൾ. രാജ്യത്തെ നിലവിലെ സാഹചര്യങ്ങൾ പരിഗണിച്ച് ഈദ് ഗാഹുകൾ ഒഴിവാക്കി, അംഗീകൃത പള്ളികളിൽ മാത്രമായി പെരുന്നാൾ നമസ്കാരം പരിമിതപ്പെടുത്തിയിട്ടുണ്ട്.

ദോഹ: ഖത്തറിൽ ഈ വർഷത്തെ ചെറിയ പെരുന്നാൾ മാർച്ച് 20ന് വെള്ളിയാഴ്ച ആഘോഷിക്കും. ഔഖാഫ് മന്ത്രാലയത്തിന് കീഴിലുള്ള ക്രസന്റ് സൈറ്റിംഗ് കമ്മിറ്റിയാണ് ബുധനാഴ്ച വൈകുന്നേരം ചേർന്ന യോഗത്തിന് ശേഷം ഔദ്യോഗിക പ്രഖ്യാപനം നടത്തിയത്. ബുധനാഴ്ച മാസപ്പിറവി ദൃശ്യമാകാത്ത സാഹചര്യത്തിൽ വ്യാഴാഴ്ച റമദാൻ 30 പൂർത്തിയാക്കിയായിരിക്കും വെള്ളിയാഴ്ച ഈദുൽ ഫിത്വർ ആഘോഷിക്കുന്നത്. രാജ്യത്തെ നിലവിലെ സാഹചര്യങ്ങൾ കണക്കിലെടുത്ത് ഖത്തറിൽ ഈദ് ഗാഹുകൾ ഒഴിവാക്കി ഇത്തവണ പെരുന്നാൾ നമസ്കാരം പള്ളികൾക്കുള്ളിൽ മാത്രമായി പരിമിതപ്പെടുത്തിയിരിക്കുകയാണ്. രാജ്യത്തെ പ്രധാന ഈദ്ഗാഹുകളിലും തുറസ്സായ സ്ഥലങ്ങളിലും നടക്കാറുള്ള പെരുന്നാൾ നമസ്കാരം ഇത്തവണ ഉണ്ടാവില്ലെന്ന് ഔഖാഫ് മന്ത്രാലയം അറിയിച്ചു.

വെള്ളിയാഴ്ച ജുമുഅ നമസ്കാരം നടക്കാറുള്ള അംഗീകൃത പള്ളികളിൽ മാത്രമായിരിക്കും നാളെ പെരുന്നാൾ നമസ്കാരം നടക്കുക. രാവിലെ 5:53-നാണ് നമസ്കാര സമയം നിശ്ചയിച്ചിരിക്കുന്നത്. പ്രാർത്ഥനയും ഖുതുബയും ഉൾപ്പെടെയുള്ള എല്ലാ കർമ്മങ്ങളും 15 മിനിറ്റിനുള്ളിൽ പൂർത്തിയാക്കണമെന്ന് മന്ത്രാലയത്തിന്റെ കർശന നിർദ്ദേശമുണ്ട്. സുരക്ഷാ കാരണങ്ങളാൽ തിരക്ക് ഒഴിവാക്കാൻ വിശ്വാസികൾ നേരത്തെ തന്നെ പള്ളികളിൽ എത്തണമെന്ന് മന്ത്രാലയം അഭ്യർത്ഥിച്ചു. ഒരു പള്ളിയിൽ ശേഷിയിൽ കൂടുതൽ ആളുകൾ എത്തിയാൽ ഉടൻ തന്നെ അടുത്തുള്ള മറ്റ് പള്ളികളിലേക്ക് മാറാൻ ശ്രദ്ധിക്കണം. നമസ്കാരം കഴിഞ്ഞാലുടൻ പള്ളികളിൽ തങ്ങാതെ എത്രയും വേഗം മടങ്ങണമെന്നും അധികൃതർ നിർദ്ദേശിച്ചു. ആഘോഷങ്ങളും ഒത്തുചേരലുകളും ഇൻഡോർ ഹാളുകളിൽ മാത്രമായി പരിമിതപ്പെടുത്തണമെന്ന് ആഭ്യന്തര മന്ത്രാലയവും നിർദ്ദേശിച്ചിട്ടുണ്ട്.

ഈദ് നമസ്കാരം നടക്കുന്ന പള്ളികളുടെ പട്ടിക പിന്നീട് പ്രഖ്യാപിക്കും. പെരുന്നാളിനോടനുബന്ധിച്ച് ഖത്തറിലെ മന്ത്രാലയങ്ങൾക്കും മറ്റ് സർക്കാർ പൊതുമേഖല സ്ഥാപനങ്ങൾക്കും മാർച്ച് 17 ചൊവ്വാഴ്ച മുതൽ മാർച്ച് 23 തിങ്കളാഴ്ച വരെയാണ് ഔദ്യോഗിക അവധി പ്രഖ്യാപിച്ചിരിക്കുന്നത്. അവധിക്ക് ശേഷം മാർച്ച് 24 ചൊവ്വാഴ്ച ഓഫീസുകൾ പുനരാരംഭിക്കും. ഖത്തർ സെൻട്രൽ ബാങ്കിന്റെ കീഴിലുള്ള ബാങ്കുകൾക്കും ധനകാര്യ സ്ഥാപനങ്ങൾക്കും മാർച്ച് 19 വ്യാഴാഴ്ച മുതൽ മാർച്ച് 23 തിങ്കളാഴ്ച വരെയാണ് അവധി. ഈ മേഖലയിലും മാർച്ച് 24 മുതൽ ജോലി പുനരാരംഭിക്കുന്നതാണ്. സ്വകാര്യ മേഖലയിലെ സ്ഥാപനങ്ങളിൽ ജോലി ചെയ്യുന്നവർക്ക് മൂന്ന് ദിവസത്തെ ശമ്പളത്തോടുകൂടിയ അവധിയായിരിക്കും ലഭിക്കുക.