ഇന്ന് സൗദി സ്ഥാപക ദിനം, രാജ്യത്ത് പൊതു അവധി

സ്ഥാപക ദിനത്തോട് അനുബന്ധിച്ച് രാജ്യത്ത് വിവിധ നഗരങ്ങളില്‍ വ്യത്യസ്ത പരിപാടികള്‍ സംഘടിപ്പിക്കുന്നുണ്ട്. 

റിയാദ്: സൗദി അറേബ്യയിൽ ഇന്ന് സ്ഥാപക ദിനം. ഹിജ്റ 1139ൽ ദിരിയയിൽ ഇമാം മുഹമ്മദ് ബിൻ സൗദ് ആദ്യമായി സൗദി രാഷ്ട്രം സ്ഥാപിച്ചതിന്റെ സ്മരണയ്ക്കായാണ് ഫെബ്രുവരി 22ന് സൗദി അറേബ്യ സ്ഥാപക ദിനം ആഘോഷിക്കുന്നത്. 

സൗദി സ്ഥാപക ദിനത്തോട് അനുബന്ധിച്ച് രാജ്യത്തെ 15ലേറെ നഗരങ്ങളില്‍ വിവിധ പരിപാടികള്‍ സംഘടിപ്പിക്കുന്നുണ്ട്. രാജ്യത്തിന്‍റെ പാരമ്പര്യവും ചരിത്രവും പ്രതിഫലിപ്പിക്കുന്നതാണ് ഫെബ്രുവരി 20 മുതല്‍ 23 വരെ നീളുന്ന പരിപാടികൾ.  സ്ഥാപക ദിനാഘോഷം പ്രമാണിച്ച് ഫെബ്രുവരി 22, 23 തീയതികളിൽ പൊതുഅവധി പ്രഖ്യാപിച്ചിട്ടുണ്ട്. സ്വകാര്യ മേഖലയില്‍ ജോലി ചെയ്യുന്നവര്‍ക്കും, സർക്കാര്‍ ജീവനക്കാർക്കും നോണ്‍-പ്രോഫിറ്റ് സെക്ടര്‍ ജീവനക്കാർക്കും 22ന് ഔദ്യോഗിക അവധിയായിരിക്കും. വെള്ളിയും ശനിയും വാരാന്ത്യ അവധി ദിനങ്ങളിയതിനാല്‍ സ്ഥാപകദിനാവധിക്കു ശേഷമുള്ള വ്യാഴം കൂടി സർക്കാര്‍ ജീവനക്കാർക്ക് ഔദ്യോഗിക അവധിയായിരിക്കുമെന്ന് അധികൃതർ അറിയിച്ചിരുന്നു.

ഫെബ്രുവരി 21ന് തുടങ്ങി 23 വരെ നീളുന്ന അല്‍ഉലയിലെ അല്‍ സറായ്യ ഫെസ്റ്റിവലാണ് സ്ഥാപക ദിനം പ്രമാണിച്ചുള്ള പരിപാടികളില്‍ പ്രധാനപ്പെട്ടത്. റിയാദിനെ ബോളിവാഡ് സിറ്റിയില്‍ ഫെബ്രുനരി 21 മുതല്‍ 23 വരെ സ്ട്രോങ് ടൈസ് എന്നി പേരില്‍ പരിപാടികള്‍ സംഘടിപ്പിക്കുന്നുണ്ട്. 

ഏഷ്യാനെറ്റ് ന്യൂസ് വാർത്തകൾ തത്സമയം കാണാം