​ബഹ്റൈൻ പ്രവാസിയും ഗായകൻ അഫ്സലിന്റെ സഹോദരനുമായ ഷംസ് കൊച്ചിൻ അന്തരിച്ചു

ബഹ്റൈനിലെ സം​ഗീത വേദികളിൽ ഒട്ടേറെ പ്രശസ്ത ​ഗായകർക്ക് പിന്നണിയൊരുക്കിയിട്ടുണ്ട്

മനാമ: ദീർഘകാല ബഹ്റൈൻ പ്രവാസിയും കലാ, സാമൂഹിക, സാംസ്കാരിക രം​ഗത്തെ നിറസാന്നിധ്യവുമായിരുന്ന ഷംസ് കൊച്ചിൻ അന്തരിച്ചു. 65 വയസ്സായിരുന്നു. പ്രശസ്ത ​ഗായകൻ അഫ്സലിന്റെ സഹോദരനാണ്. നാട്ടിലായിരുന്നു അന്ത്യം. വൃക്ക, ഹൃദയ സംബന്ധമായ രോ​ഗങ്ങളെ തുടർന്ന് കഴിഞ്ഞ കുറച്ച് മാസങ്ങളായി ചികിത്സയിലായിരുന്നു. 

ബഹ്റൈനിലെ സം​ഗീത വേദികളിൽ ഒട്ടേറെ പ്രശസ്ത ​ഗായകർക്ക് പിന്നണിയൊരുക്കിയിട്ടുണ്ട്. ബഹ്റൈൻ കേരളീയ സമാജം, ഇന്ത്യൻ ക്ലബ്, ഇന്ത്യൻ സ്കൂൾ ഉൾപ്പടെ വിവിധയിടങ്ങളിൽ സം​ഗീത വിരുന്നുകൾ സംഘടിപ്പിച്ചിട്ടുള്ള ഇദ്ദേഹം ബഹ്റൈനിൽ സം​ഗീതം പഠിപ്പിക്കുകയും ചെയ്തിരുന്നു. ബഹ്റൈനിലെ സംഘടനയായ പടവ് കുടുംബവേദിയുടെ സ്ഥാപകനും രക്ഷാധികാരിയുമായിരുന്നു. കലാരം​ഗത്ത് നൽകിയിട്ടുള്ള സംഭാവനകളെ മുൻനിർത്തി വിവിധ സംഘടനകൾ ഇദ്ദേഹത്തെ ആദരിച്ചിട്ടുണ്ട്. ഷംസ് കൊച്ചിന്റെ വിയോ​ഗത്തിൽ നിരവധി സംഘടനകൾ അനുശോചനം അറിയിച്ചിട്ടുണ്ട്. മക്കൾ: നഹല, നിദാൽ ഷംസ്. മരുമകൻ: റംഷി. ​ഗായകരായ അഫ്സൽ, അൻസാർ, അഷറഫ്, ഷക്കീർ, സലീം, ശരീഫ്, റംല, ഷംല എന്നിവർ സഹോദരങ്ങളാണ്.