റിയൽമി P4 ലൈറ്റ് ഇന്ത്യയിൽ വിൽപ്പനയ്ക്ക്; വിലയും ഓഫറുകളും പ്രഖ്യാപിച്ചു

ഇ-കൊമേഴ്‌സ് പ്ലാറ്റ്‌ഫോമുകളും കമ്പനിയുടെ ഔദ്യോഗിക ഓൺലൈൻ സ്റ്റോറും വഴിയാണ് ഫോണിന്റെ വിൽപ്പന പുരോഗമിക്കുന്നത്.

ചൈനീസ് സ്‍മാർട്ട്‌ഫോൺ നിർമ്മാതാക്കളായ റിയൽമി ഇന്ത്യയിൽ ഫെബ്രുവരി 20ന് പുറത്തിറക്കിയ പുതിയ മോഡൽ റിയൽമി P4 ലൈറ്റ് ഇപ്പോൾ വിൽപ്പനയ്ക്ക് എത്തി. ഇ-കൊമേഴ്‌സ് പ്ലാറ്റ്‌ഫോമുകളും കമ്പനിയുടെ ഔദ്യോഗിക ഓൺലൈൻ സ്റ്റോറും വഴിയാണ് ഫോണിന്റെ വിൽപ്പന പുരോഗമിക്കുന്നത്. മൂന്ന് നിറങ്ങളിൽ ലഭ്യമാകുന്ന ഈ ഹാൻഡ്‌സെറ്റ് രണ്ട് സ്റ്റോറേജ് വകഭേദങ്ങളിലായാണ് അവതരിപ്പിച്ചിരിക്കുന്നത്.

റിയൽമി P4 ലൈറ്റിന്റെ അടിസ്ഥാന മോഡൽ (4GB റാം + 64GB സ്റ്റോറേജ്) 9,999 രൂപ വിലയിലാണ് ലഭ്യമാകുന്നത്. 4GB റാം + 128GB സ്റ്റോറേജ് ഉള്ള ഉയർന്ന പതിപ്പ് 11,999 രൂപയ്ക്ക് വിപണിയിൽ എത്തി. ലോഞ്ച് ഓഫറിന്റെ ഭാഗമായി 1,000 രൂപ ബാങ്ക് ഡിസ്‍കൌണ്ടോ അതേ മൂല്യമുള്ള കൂപ്പൺ ഓഫറോ ഉപഭോക്താക്കൾക്ക് ലഭ്യമാണ്.

6.74 ഇഞ്ച് HD+ (720x1600 പിക്സൽ) ഡിസ്പ്ലേയോടുകൂടിയ ഈ സ്‍മാർട്ട്‌ഫോൺ 90Hz റിഫ്രെഷ് റേറ്റും 563 നിറ്റ്‌സ് വരെ പീക്ക് ബ്രൈറ്റ്‌നസും നൽകുന്നു. 180Hz ടച്ച് സാംപ്ലിംഗ് റേറ്റും 16.7 മില്യൺ നിറങ്ങളും 83.5 ശതമാനം NTSC കളർ ഗാമറ്റും ഇതിൽ ഉൾപ്പെടുത്തിയിട്ടുണ്ട്. 12nm പ്രോസസിൽ നിർമ്മിച്ച ഒക്ടാ-കോർ യുണിസോക് T7250 ചിപ്സെറ്റാണ് ഫോണിന് കരുത്തേകുന്നത്. 1.8GHz വരെ ക്ലോക്ക് സ്പീഡ് നൽകുന്ന ഈ പ്രോസസറിനൊപ്പം Mali G57 MP1 ജിപിയുവും ലഭ്യമാണ്. 4GB റാം, പരമാവധി 128GB ഇൻറേണൽ സ്റ്റോറേജ് എന്നിവയും ഉൾപ്പെടുത്തിയിട്ടുണ്ട്. IP54 ഡസ്റ്റ് ആൻഡ് സ്പ്ലാഷ് റെസിസ്റ്റൻസ് സപ്പോർട്ടും ഫോണിനുണ്ട്.

ക്യാമറ വിഭാഗത്തിൽ 13 മെഗാപിക്സൽ (f/2.2) പിൻ ക്യാമറയാണ് നൽകിയിരിക്കുന്നത്. 76.5 ഡിഗ്രി ഫീൽഡ് ഓഫ് വ്യൂയും 27 എംഎം ഫോകൽ ലെങ്തും ഇതിന് ഉണ്ട്. സെൽഫിക്കും വീഡിയോ കോളുകൾക്കുമായി അഞ്ച് മെഗാപിക്സൽ ഫ്രണ്ട് ക്യാമറയും ഉൾപ്പെടുത്തിയിട്ടുണ്ട്. 1080p/30fps വരെ വീഡിയോ റെക്കോർഡ് ചെയ്യാൻ കഴിയും. 6,300mAh ശേഷിയുള്ള വലിയ ബാറ്ററിയാണ് ഈ മോഡലിന്റെ പ്രധാന ആകർഷണം. 15W വയർഡ് ചാർജിംഗ് സപ്പോർട്ടും ലഭ്യമാണ്. 4G എൽടിഇ, ബ്ലൂടൂത്ത് 5.2, വൈ-ഫൈ, ജിപിഎസ് തുടങ്ങിയവ ഉൾപ്പെടെയുള്ള കണക്റ്റിവിറ്റി ഓപ്ഷനുകളും സൈഡ്-മൗണ്ടഡ് ഫിംഗർപ്രിന്റ് സെൻസറും ഫോണിൽ ഉൾപ്പെടുത്തിയിട്ടുണ്ട്.