'പച്ചകുത്തിയത് പച്ചത്തെറി, ഇങ്ങനെയൊക്കെ ചെയ്യാമോ നച്യുറല്‍ സ്റ്റാറേ': നാനയുടെ പടത്തിന്‍റെ ടീസര്‍ വിവാദത്തില്‍

നാനിയുടെ പുതിയ ചിത്രം ദ പാരഡൈസിലെ ഒരു രംഗം വിവാദത്തിൽ. നായകന്റെ കയ്യിലെ പച്ചകുത്താണ് വിമർശനത്തിന് കാരണം, ഇത് സോഷ്യൽ മീഡിയയിൽ ചർച്ചയാവുകയാണ്.

കൊച്ചി: ടോളിവുഡില്‍ നിന്നും നാനി നായകനായി എത്തുന്ന പുതിയ ചിത്രമാണ് ദ പാരഡൈസ്. നാനിയുടെ വന്‍ ഹിറ്റായ ദസറ ഒരുക്കിയ ശ്രീകാന്ത് ഒഡേലയാണ് നാനിയുടെ ചിത്രം സംവിധാനം ചെയ്യുന്നത്. ശ്രീലക്ഷ്‍മി വെങ്കടേശ്വര സിനിമാസിന്റെ ചിത്രത്തിന്‍റെ അനൗണ്‍സ്മെന്‍റ് ടീസര്‍ ദൃശ്യങ്ങള്‍ കഴിഞ്ഞ ദിവസം പുറത്തുവിട്ടിരുന്നു. 

എന്നാല്‍ ഈ ദൃശ്യങ്ങളിലെ ഒരു രംഗം വലിയ വിവാദമായിരിക്കുകയാണ്. ഇതില്‍ നായകന്‍റെ കൈയ്യില്‍ പച്ചകുത്തിയിരിക്കുന്നത് വലിയ തെറിയാണ് എന്നതാണ് പ്രശ്നമായിരിക്കുന്നത്. മലയാളത്തില്‍ അടക്കം എല്ലാ ഭാഷകളിലെ ടീസറിലും ഇതുണ്ട്. 

ഇതിനെതിരെ സോഷ്യല്‍ മീഡിയയില്‍ വിമര്‍ശനം ഉയരുന്നുണ്ട്. അടുത്തിടെ സിനിമ രംഗത്തെ വയലന്‍സ് അടക്കമുള്ള ചര്‍ച്ചകള്‍ സജീവമാകുന്നയിടത്താണ് ഇത്തരം ഒരു രംഗം. അതിനാല്‍ തന്നെ നാച്യുറല്‍ സ്റ്റാര്‍ എന്ന് വിശേഷിപ്പിക്കപ്പെടുന്ന നാനിയുടെ ചിത്രത്തില്‍ ആരും ഇത് പ്രതീക്ഷിച്ചില്ല എന്ന രീതിയിലാണ് അഭിപ്രായങ്ങള്‍ വരുന്നത്. എന്തായാലും തെലുങ്കിലും സമാനമായ രംഗം ഉണ്ട്. അവിടെയും വിവാദമായിട്ടുണ്ട് ഇത്. 

ദ പാരഡൈസ് റോ സ്റ്റേറ്റ്മെന്‍റ് എന്ന പേരിലാണ് കഴിഞ്ഞ ദിവസം ദൃശ്യങ്ങള്‍ പുറത്ത് എത്തിയത്. ഒരു ബിഗ് ബജറ്റ് ചിത്രമായിട്ട് ദ പാരഡൈസ് ഒരുങ്ങുമ്പോള്‍ അനിരുദ്ധ് രവിചന്ദറാണ് സംഗീതം നിര്‍വഹിക്കുന്നുവെന്നത് ആകര്‍ഷണമാണ്. ഒരു ആക്ഷന്‍ സബ്ജക്ടാണ് ചിത്രം എന്നാണ് വിവരം. ദ പാരഡൈസിന്റെ മാര്‍ക്കറ്റിംഗ് ഫസ്റ്റ് ഷോയും പിആര്‍ഒ ശബരിയുമാണ്.

ഹിറ്റ് കേസ് 3 എന്ന ചിത്രമാണ് നാനിയുടെതായി ഇറങ്ങാനുള്ളത്. തെലുങ്കിലെ കോപ്പ് യൂണിവേഴ്സായ ഹിറ്റ് പരമ്പരയിലെ മൂന്നാമത്തെ ചിത്രമാണ് ഇത്. കഴിഞ്ഞ രണ്ട് ചിത്രങ്ങളുടെ നിര്‍മ്മാണ പങ്കാളിയായിരുന്നു നാനി. ഈ രണ്ട് ചിത്രങ്ങളും ബോക്സോഫീസ് വിജയമായിരുന്നു.