വാട്‍സ്ആപ്പിൽ നിന്ന് എഐ ചാറ്റ്ബോട്ടുകളെ നിരോധിക്കുന്നു; ചാറ്റ്ജിപിടിയും പെർപ്ലെക്‌സിറ്റിയും ഉൾപ്പെടെ പടിക്ക് പുറത്താകും

പോളിസിയില്‍ മാറ്റം വരുത്തി മെറ്റ, വാട്‍സ്ആപ്പിൽ നിന്ന് ചാറ്റ്ജിപിടിയും പെർപ്ലെക്‌സിറ്റി എഐയുടെ അടക്കമുള്ള ചാറ്റ്‌ബോട്ടുകള്‍ പുറത്താകും. പുതിയ നയംമാറ്റം ബാധിക്കുക ആരെയൊക്കെ? 

കാലിഫോര്‍ണിയ: വാട്‌സ്‌ആപ്പിന്‍റെ മാതൃ കമ്പനിയായ മെറ്റ അതിന്‍റെ ബിസിനസ് നയത്തിൽ കാര്യമായ മാറ്റം വരുത്തി. ചാറ്റ്‍ജിപിടി, പെർപ്ലെക്‌സിറ്റി, ലൂസിയ, പോക്ക് തുടങ്ങിയ സാധാരണ എഐ ചാറ്റ്‌ബോട്ടുകളെ ഇനി വാട്‌സ്ആപ്പില്‍ പ്രവർത്തിക്കാൻ മെറ്റ അനുവദിക്കില്ല. ഈ പുതിയ നിയമം 2026 ജനുവരി 15 മുതൽ പ്രാബല്യത്തിൽ വരും. അതായത് മെറ്റയുടെ സ്വന്തം എഐ അസിസ്റ്റന്‍റ് മാത്രമേ ഇനി വാട്‌സ്ആപ്പില്‍ പ്രവർത്തിക്കൂ. സംഭാഷണത്തിനോ ചാറ്റിനോ വേണ്ടി മാത്രം സൃഷ്‌ടിച്ച ബോട്ടുകൾ വാട്‌സ്ആപ്പില്‍ നിന്ന് നീക്കം ചെയ്യപ്പെടും.

എന്തുകൊണ്ടാണ് മെറ്റയുടെ ഈ തീരുമാനം

കമ്പനികളെ ഉപഭോക്താക്കളുമായി ബന്ധപ്പെടാൻ സഹായിക്കുക എന്നതായിരുന്നു വാട്‌സ്ആപ്പ് ബിസിനസ് എപിഐയുടെ ഉദ്ദേശ്യമെന്നും ഒരു എഐ ചാറ്റ് പ്ലാറ്റ്‌ഫോം സൃഷ്‌ടിക്കുക എന്നതായിരുന്നില്ല എന്നും മെറ്റ പറയുന്നു. എന്നാൽ കഴിഞ്ഞ കുറച്ച് മാസങ്ങളായി, നിരവധി ഡെവലപ്പർമാർ അവരുടെ സ്വന്തം എഐ ചാറ്റ്‌ബോട്ടുകൾ പ്രവർത്തിപ്പിക്കാൻ എപിഐ ഉപയോഗിക്കാൻ തുടങ്ങിയിട്ടുണ്ട്. ഇത് മെറ്റയുടെ നയത്തിന് വിരുദ്ധമാണ്. ബിസിനസുകൾക്കും ഉപഭോക്താക്കൾക്കും ഇടയിൽ പിന്തുണയും അപ്‌ഡേറ്റുകളും നൽകുക എന്നതാണ് വാട്‌സ്ആപ്പ് ബിസിനസ് എപിഐയുടെ ലക്ഷ്യമെന്നും എഐ ചാറ്റ്‌ബോട്ടുകൾ പ്രവർത്തിപ്പിക്കുക എന്നതല്ല എന്നും മെറ്റ വ്യക്തമാക്കി.

മെറ്റയുടെ പുതിയ നയങ്ങൾ എന്താണ് പറയുന്നത്?

വലിയ ഭാഷാ മോഡലുകൾ (എൽഎൽഎമ്മുകൾ), ജനറേറ്റീവ് എഐ അല്ലെങ്കിൽ ചാറ്റ് അസിസ്റ്റന്‍റുമാർ എന്നിവ നിർമ്മിക്കുന്ന ഏതൊരു എഐ ഡെവലപ്പറുടെയും പ്രാഥമിക ലക്ഷ്യം ചാറ്റ് ചെയ്യുകയോ എഐ സേവനം നൽകുകയോ ആണെങ്കിൽ വാട്‌സ്ആപ്പ് ബിസിനസ് എപിഐ ഉപയോഗിക്കാൻ കഴിയില്ലെന്ന് മെറ്റയുടെ പുതിയ നയത്തിൽ പറയുന്നു. അതായത്, ഒരു ബോട്ടിന്‍റെ പ്രാഥമിക ലക്ഷ്യം എഐ സംഭാഷണം ആണെങ്കിൽ അത് ഇനി വാട്‌സ്ആപ്പില്‍ ലഭ്യമാകില്ല.

ഏതൊക്കെ ചാറ്റ്ബോട്ടുകളെ ബാധിക്കും?

2026 ജനുവരി മുതൽ, ഓപ്പൺ‌എഐയുടെ ചാറ്റ്‍ജിപിടി, പെർപ്ലെക്‌സിറ്റി, ലൂസിയ, പോക്ക് ഉൾപ്പെടെയുള്ള ചാറ്റ് ബോട്ടുകൾ വാട്‌സ്ആപ്പില്‍ പ്രവർത്തിക്കില്ല. ഫോട്ടോ വിശകലനം, ഡോക്യുമെന്‍റ് ചോദ്യോത്തരം, വോയ്‌സ് കമാൻഡുകൾ തുടങ്ങിയ സവിശേഷതകൾ പല കമ്പനികളും വാട്‌സ്ആപ്പ് ഉപയോക്താക്കൾക്ക് വാഗ്‌ദാനം ചെയ്‌തിരുന്നു. എന്നാൽ ഇതെല്ലാം ഇപ്പോൾ നിർത്തലാക്കും.

ഏതൊക്കെ ബോട്ടുകളെയാണ് ബാധിക്കാത്തത്?

ഈ നിരോധനം പൊതുവായ എഐ ചാറ്റ്ബോട്ടുകൾക്ക് മാത്രമേ ബാധകമാകൂ എന്ന് മെറ്റ വ്യക്തമാക്കി. അതായത് ഒരു കമ്പനി ഉപഭോക്തൃ സേവനം നൽകാനോ ഉപഭോക്താക്കൾക്ക് അപ്‌ഡേറ്റുകൾ ഓർഡർ ചെയ്യാനോ ഒരു ബോട്ട് ഉപയോഗിക്കുകയാണെങ്കിൽ, അത് തുടരും. ഉദാഹരണത്തിന്, ഒരു എയർലൈനിന്‍റെ ഫ്ലൈറ്റ് സ്റ്റാറ്റസ് ബോട്ട്, അല്ലെങ്കിൽ ഒരു ഹോട്ടലിന്‍റെയോ ട്രാവൽ ഏജൻസിയുടെയോ ബുക്കിംഗ് സപ്പോർട്ട് ബോട്ട് തുടങ്ങിയ കാര്യങ്ങളെ ഈ പുതിയ നിരോധനം ബാധിക്കില്ല.