നിങ്ങളുടെ വാട്‌സ്ആപ്പ് ചാറ്റുകള്‍ സുരക്ഷിതമാണോ? ഈ സെറ്റിംഗ്‌സുകള്‍ ഉടന്‍ പരീക്ഷിക്കൂ!

വാട്‌സ്ആപ്പ് അവതരിപ്പിച്ച ചാറ്റ് ലോക്ക്, പാസ്‌കീ, സ്‌പാം കോൾ ബ്ലോക്കിംഗ് പോലുള്ള ഫീച്ചറുകൾ നിങ്ങളുടെ ഡാറ്റയ്ക്ക് എത്രത്തോളം സുരക്ഷ നൽകുന്നുണ്ട്? വിശദമായി അറിയാം.

ഇന്‍സ്റ്റന്‍റ് മെസേജിംഗ് പ്ലാറ്റ്‌ഫോമായ വാട്‌സ്ആപ്പ് ഇല്ലാത്ത ഒരു ദിവസം പോലും നമുക്ക് ഇപ്പോൾ ചിന്തിക്കാൻ കഴിയില്ല. ലോകമെമ്പാടും കോടിക്കണക്കിന് ആളുകൾ ഉപയോഗിക്കുന്ന വാട്‌സ്ആപ്പില്‍, ഉപയോക്താക്കളുടെ സ്വകാര്യ വിവരങ്ങൾക്ക് കൂടുതൽ സംരക്ഷം നല്‍കുന്ന ശക്തമായ ചില ഫീച്ചറുകളുണ്ട്. പാസ്‌കീകൾ (Passkeys) മുതൽ മെച്ചപ്പെട്ട പ്രൈവസി കൺട്രോളുകൾ വരെ ഇതിലുണ്ട്. എന്നാൽ, ഇവയൊക്കെ നിങ്ങളുടെ ഡാറ്റയ്ക്ക് 100% സുരക്ഷ നൽകുന്നുണ്ടോ? നമുക്ക് വിശദമായി പരിശോധിക്കാം.

രഹസ്യ ചാറ്റുകൾക്ക് ലോക്ക്, എക്സ്പോർട്ടിന് തടയിടാം (Chat Lock & Prevent Export)

നിങ്ങളുടെ സ്വകാര്യവും രഹസ്യവുമായ സംഭാഷണങ്ങൾ മറ്റുള്ളവർ കാണാതിരിക്കാൻ 'ചാറ്റ് ലോക്ക്' (Chat Lock) എന്ന സൗകര്യം വാട്‌സ്ആപ്പ് നൽകുന്നുണ്ട്. ഈ ഫീച്ചർ ഉപയോഗിച്ച് നിങ്ങൾക്ക് ചില പ്രത്യേക ചാറ്റുകൾ ഒരു ഹിഡൻ ഫോൾഡറിലേക്ക് (Hidden Folder) മാറ്റാം. ഫിംഗർപ്രിൻ്റ് (Fingerprint) അല്ലെങ്കിൽ ഫേസ് ഐഡി (Face ID) ഉപയോഗിച്ച് മാത്രമേ ഈ ഫോൾഡർ തുറക്കാൻ കഴിയൂ. അതുകൊണ്ട് നിങ്ങളുടെ ഫോൺ മറ്റൊരാളുടെ കയ്യിൽ കിട്ടിയാലും ചാറ്റുകള്‍ കാണുമോ എന്ന ഭയം ആവശ്യമില്ല. 

ഇതു കൂടാതെ, മറ്റൊരു കിടിലൻ പ്രൈവസി ഓപ്ഷൻ കൂടി വാട്‌സ്ആപ്പിലുണ്ട്. ഇതുവഴി നിങ്ങളുടെ ചാറ്റുകൾ മറ്റുള്ളവര്‍ എക്സ്പോർട്ട് ചെയ്യുന്നത് തടയാം. വാട്‌സ്ആപ്പ് വഴി നിങ്ങൾ അയക്കുന്ന ഫോട്ടോകളും വീഡിയോകളും സ്വീകരിക്കുന്നയാളുടെ ഫോൺ ഗാലറിയിൽ ഓട്ടോമാറ്റിക്കായി സേവാവണോ വേണ്ടയോ എന്നും തീരുമാനിക്കാനുള്ള സൗകര്യമുണ്ട്. ഡാറ്റാ മോഷണം ഒരു പരിധി വരെ തടയാൻ ഇത് സഹായിക്കും.

സുരക്ഷിതമായ ബാക്കപ്പും എൻഡ്-ടു-എൻഡ് എൻക്രിപ്ഷനും (Passkey & E2E)

വാട്സ്ആപ്പിൽ നിങ്ങൾ അയക്കുന്ന ഓരോ മെസേജും 'എൻഡ്-ടു-എൻഡ് എൻക്രിപ്ഷൻ' (End-to-End Encryption) സാങ്കേതികവിദ്യ ഉപയോഗിച്ച് സുരക്ഷിതമാക്കിയിട്ടുണ്ട് എന്നാണ് മാതൃകമ്പനിയായ മെറ്റയുടെ വാദം. അതായത്, സന്ദേശം അയക്കുന്നയാൾക്കും സ്വീകരിക്കുന്നയാൾക്കും അല്ലാതെ, വാട്‌സ്ആപ്പ് കമ്പനിക്ക് പോലും അത് വായിക്കാൻ കഴിയില്ലെന്നാണ് ഇതിനര്‍ഥം.

എന്നാൽ, മുൻപ് വാട്‌സ്ആപ്പ് ബാക്കപ്പുകൾക്ക് (Backups) ഇത്രയും സുരക്ഷയില്ലെന്നൊരു പരാതിയുണ്ടായിരുന്നു. അത് പരിഹരിക്കാനായി ഇപ്പോൾ 'പാസ്‌കീ-എൻക്രിപ്റ്റഡ് ബാക്കപ്പുകൾ' (Passkey-Encrypted Backups) വാട്‌സ്ആപ്പില്‍ അവതരിപ്പിച്ചിട്ടുണ്ട്. ഇതുവഴി നിങ്ങൾ ക്ലൗഡിൽ സൂക്ഷിക്കുന്ന ബാക്കപ്പുകൾ ഫിംഗർപ്രിൻ്റ്, ഫേസ് ഐഡി, അല്ലെങ്കിൽ സ്ക്രീൻ ലോക്ക് ഉപയോഗിച്ച് സംരക്ഷിക്കാം. 

സ്‌പാം കോളുകൾക്ക് പൂട്ട്, ലൊക്കേഷൻ മറയ്ക്കാം (Hide Location & Silence Callers)

അടുത്തിടെയായി, വാട്‌സ്ആപ്പില്‍ അറിയാത്ത നമ്പറുകളിൽ നിന്ന് വരുന്ന സ്പാം, തട്ടിപ്പ് കോളുകളുടെ (Scam Calls) എണ്ണം കൂടിയിട്ടുണ്ട്. ഇതിൽ നിന്ന് ഉപയോക്താക്കളെ രക്ഷിക്കാൻ “Silence Unknown Callers” എന്നൊരു ഫീച്ചർ വന്നിട്ടുണ്ട്. ഇത് ഓൺ ചെയ്‌താല്‍, നിങ്ങളുടെ കോൺടാക്‌‌ട് ലിസ്റ്റിൽ ഇല്ലാത്ത നമ്പറുകളിൽ നിന്ന് വരുന്ന കോളുകൾ ഓട്ടോമാറ്റിക്കായി സൈലൻ്റ് ആകും.

അതുപോലെ, വാട്സ്ആപ്പ് കോളുകൾ ചെയ്യുമ്പോൾ നിങ്ങളുടെ ഐപി അഡ്രസ്സും (IP Address) നിങ്ങൾ എവിടെയാണെന്നുള്ള വിവരവും ഹാക്കർമാർക്ക് കണ്ടെത്താൻ സാധിക്കാത്ത രീതിയിലുള്ള പുതിയൊരു അപ്ഡേറ്റും വന്നിട്ടുണ്ട്. ഇതിലൂടെ നിങ്ങളുടെ കോളുകൾ വാട്‌സ്ആപ്പ് സെർവറുകൾ വഴി റൂട്ട് ചെയ്‌ത്, നിങ്ങളുടെ യഥാർഥ ലൊക്കേഷൻ (Location) പൂർണ്ണമായും മറച്ചുവെക്കുന്നു.

വാട്‌സ്ആപ്പിലെ അധിക സുരക്ഷാ മോഡ് (Extra Security Mode)

നിങ്ങൾ അയക്കുന്ന മെസേജുകൾ ഒരു നിശ്ചിത സമയത്തിന് ശേഷം തനിയെ ഡിലീറ്റ് ആവുന്ന 'Disappearing Messages' ഫീച്ചർ ഇപ്പോൾ വാട്‌സ്ആപ്പ് കൂടുതൽ മെച്ചപ്പെടുത്തിയിട്ടുണ്ട്. 24 മണിക്കൂർ, 7 ദിവസം, 90 ദിവസം എന്നിങ്ങനെ നിങ്ങളുടെ ഇഷ്‌ടത്തിനനുസരിച്ച് സമയം സെറ്റ് ചെയ്യാം.

ഇതിനെല്ലാം പുറമെ, വളരെ സെൻസിറ്റീവായ ഡാറ്റ കൈകാര്യം ചെയ്യുന്നവർക്കായി 'എക്‌സ്‌ട്രാ സെക്യൂരിറ്റി മോഡ്' (Extra Security Mode) എന്നൊരു ഓപ്ഷൻ കൂടി വാട്‌സ്ആപ്പ് കൊണ്ടുവന്നിട്ടുണ്ട്. ഈ ഹൈ-സെക്യൂരിറ്റി മോഡ് ഓൺ ചെയ്യുന്നതിലൂടെ, അപരിചിതമായ കോൺടാക്‌ടുകളെ ബ്ലോക്ക് ചെയ്യാനും റിസ്ക്കുള്ള ചില ഫീച്ചറുകൾ പ്രവർത്തനരഹിതമാക്കാനും സാധിക്കും. ഇതോടെ നിങ്ങളുടെ വാട്‌സ്ആപ്പ് അക്കൗണ്ട് ഒരു ഡിജിറ്റൽ കോട്ട പോലെ സുരക്ഷിതമാക്കാം.