'ആ ജോലിയും പോയി': മെഹന്ദി ഇടുന്ന മെഷീന്‍റെ വീഡിയോ പങ്കുവെച്ച് ഹർഷ് ഗോയങ്ക; സോഷ്യൽ മീഡിയയിൽ വൻ ചർച്ച

പ്രമുഖ വ്യവസായി ഹർഷ് ഗോയങ്ക പങ്കുവെച്ച എഐ മെഹന്ദി മെഷീന്‍റെ വീഡിയോ, ഓട്ടോമേഷനും സാങ്കേതികവിദ്യയും പരമ്പരാഗത തൊഴിലുകളെ ഇല്ലാതാക്കുമോ എന്ന വിഷയത്തിൽ സോഷ്യൽ മീഡിയയിൽ പുതിയ ചർച്ചയ്ക്ക് തുടക്കമിട്ടു.

പരമ്പരാഗത തൊഴിൽ മേഖലകളിലേക്ക് കടന്നുകയറുന്ന ഓട്ടോമേഷനും എഐ സാങ്കേതികവിദ്യയും സൃഷ്ടിക്കുന്ന ആശങ്കകളെക്കുറിച്ച് സോഷ്യൽ മീഡിയയിൽ പുതിയ ചർച്ചയ്ക്ക് വഴിതുറന്ന് പ്രമുഖ വ്യവസായി ഹർഷ് ഗോയങ്ക. കൈകളിൽ വളരെ പെട്ടെന്ന് മെഹന്ദി അണിയിക്കുന്ന ഒരു മെഷീന്‍റെ എഐ നിർമ്മിത വീഡിയോ പങ്കുവെച്ച് കൊണ്ടാണ് അദ്ദേഹം ഈ വിഷയം വീണ്ടും സജീവമാക്കിയത്. "ചില ജോലികൾ കൂടി ഇല്ലാതായി" എന്ന അടിക്കുറിപ്പോടെയാണ് ഗോയങ്ക എക്സിൽ ഈ വീഡിയോ പോസ്റ്റ് ചെയ്തത്. വീഡിയോയിൽ ഒരു സ്ത്രീ തന്‍റെ കൈ മെഷീനിൽ വെക്കുമ്പോൾ, അത് തൊലിപ്പുറത്ത് സങ്കീർണ്ണവും മനോഹരവുമായ മെഹന്ദി ഡിസൈനുകൾ മനുഷ്യസഹായമില്ലാതെ തനിയെ വരയ്ക്കുന്നത് കാണാം.

ഓട്ടോമേഷൻ സേവന മേഖലയിലേക്കും

വിവാഹങ്ങൾ, ആഘോഷങ്ങൾ തുടങ്ങിയ അവസരങ്ങളിൽ ഏറെ ആവശ്യക്കാരുള്ള ഒന്നാണ് മെഹന്ദി ആർട്ടിസ്റ്റുകളുടെ ജോലി. ഫാക്ടറികളിലും വ്യവസായ ശാലകളിലും മാത്രം കണ്ടിരുന്ന യാന്ത്രികവൽക്കരണം ഇപ്പോൾ വ്യക്തിഗത സേവനങ്ങളിലേക്കും പരമ്പരാഗത കരകൗശല മേഖലകളിലേക്കും വ്യാപിപ്പിക്കുന്നതിന്‍റെ ഉദാഹരണമാണ് ഈ സാങ്കേതികവിദ്യ. ഇത് തൊഴിലവസരങ്ങൾ കുറയ്ക്കുമോയെന്ന ആശങ്കയാണ് ഹർഷ് ഗോയങ്ക ചൂണ്ടിക്കാണിച്ചത്.

Some more jobs gone 🙈 pic.twitter.com/jKiUzB8gOA

— Harsh Goenka (@hvgoenka) September 9, 2026

സോഷ്യൽ മീഡിയയിൽ സമ്മിശ്ര പ്രതികരണം

വീഡിയോ വൈറലായതോടെ ഇന്‍റർനെറ്റിൽ വൻ ചർച്ചകളാണ് നടക്കുന്നത്. കൈത്തൊഴിലിന്‍റെ ഭംഗി മെഷീന് ലഭിക്കില്ല, മെഹന്ദി ആർട്ടിസ്റ്റുകളുടെ ഉപജീവനത്തിന് വലിയ ഭീഷണിയുണ്ടാകില്ലെന്നൊക്കെയാണ് ഭൂരിഭാഗം പേരുടെയും വാദം. മനുഷ്യരുടെ കൈകളാൽ തീർക്കുന്ന ഡിസൈനുകളുടെ ഭംഗിയും സൂക്ഷ്മതയും പകർത്താൻ ഇത്തരം റോബോട്ടിക് മെഷീനുകൾക്ക് കഴിയില്ലെന്ന് പലരും ചൂണ്ടിക്കാട്ടുന്നു. "പ്രത്യേകിച്ച് വിവാഹങ്ങൾ പോലെയുള്ള അവസരങ്ങളിൽ സൂചി പോലുള്ള ഈ മെഷീന്‍റെ അടിയിൽ കൈവെക്കാൻ സ്ത്രീകൾ മടിക്കും" എന്ന് ഒരു ഉപയോക്താവ് കുറിച്ചു. അതേസമയം, സാങ്കേതികവിദ്യ തൊഴിലവസരങ്ങൾ ഇല്ലാതാക്കുകയല്ല, മറിച്ച് പുതിയ മേഖലകൾ തുറക്കുകയാണെന്നാണ് മറ്റൊരു വിഭാഗത്തിന്‍റെ അഭിപ്രായം. ഇത്തരം മെഷീനുകൾ രൂപകൽപ്പന ചെയ്യുന്നതിനും പ്രോഗ്രാം ചെയ്യുന്നതിനും പരിപാലിക്കുന്നതിനും എഞ്ചിനീയറിംഗ് രംഗത്ത് പുതിയ തൊഴിലവസരങ്ങൾ സൃഷ്ടിക്കപ്പെടുമെന്നും അവർ വാദിക്കുന്നു.