‘അൽഗോരിതങ്ങൾക്ക് ആ സ്‍പാർക്ക് ഇല്ല’; എഐ സൃഷ്‍ടികളെക്കുറിച്ച് പോപ്പ് ലിയോ

ആർട്ടിഫിഷ്യൽ ഇന്റലിജൻസിന്റെ അതിവേഗ വളർച്ച മനുഷ്യരാശിക്ക് ഭീഷണിയാകുന്ന പശ്ചാത്തലത്തിൽ സഭയും കലാകാരന്മാരും ഒന്നിക്കണമെന്ന് പോപ്പ് ലിയോ പതിനാലാമൻ ആഹ്വാനം ചെയ്തു. എഐ സൃഷ്ടികൾക്ക് മനുഷ്യന്റെ സർഗാത്മകതയോ ആത്മാവോ ഇല്ലെന്ന് അദ്ദേഹം വ്യക്തമാക്കി. എഐയുടെ കടന്നുകയറ്റത്തിൽ നിന്ന് മനുഷ്യനെ സംരക്ഷിക്കാൻ ലക്ഷ്യമിട്ടുള്ളതാണ് അദ്ദേഹത്തിന്റെ പുതിയ നിലപാടുകൾ.

ആർട്ടിഫിഷ്യൽ ഇന്റലിജൻസിന്റെ അതിവേഗ വളർച്ചയ്ക്കിടെ മനുഷ്യരാശിയുടെ ഭാവി സംരക്ഷിക്കാൻ കലാകാരന്മാരും സഭയും കൈകോർക്കണമെന്ന് ആഹ്വാനം ചെയ്ത് പോപ്പ് ലിയോ പതിനാലാമൻ. കലാകാരന്മാരും സഭയും സാംസ്‍കാരിക സ്ഥാപനങ്ങളും തമ്മിലുള്ള സഹകരണം ശക്തമാക്കേണ്ട സമയമാണിതെന്നും അദ്ദേഹം വ്യക്തമാക്കി. മനുഷ്യന്റെ ആന്തരിക ലോകത്തുനിന്ന് ആശയങ്ങളും വികാരങ്ങളും പ്രകടിപ്പിക്കുന്നതിനുള്ള മാർഗമായാണ് പരമ്പരാഗതമായി കലയെ കണക്കാക്കുന്നത്. എന്നാൽ ആർട്ടിഫിഷ്യൽ ഇന്റലിജൻസിന്റെ സഹായത്തോടെ മനുഷ്യൻ സൃഷ്ടിച്ചതുപോലെ തോന്നിക്കുന്ന ചിത്രങ്ങളും മറ്റ് ഉള്ളടക്കങ്ങളും അതിവേഗം നിർമിക്കാൻ സാധിക്കുന്ന സാഹചര്യമാണുള്ളത്. ഇതാണ് പോപ്പ് ലിയോ ആശങ്കയായി ചൂണ്ടിക്കാട്ടുന്നത്.

'മനുഷ്യ കലയും എഐ സൃഷ്‍ടിയും തമ്മിൽ അടിസ്ഥാന വ്യത്യാസമുണ്ട്'

എക്സ് പ്ലാറ്റ്‌ഫോമിൽ പങ്കുവച്ച കുറിപ്പിലാണ് പോപ്പ് ലിയോ തന്റെ നിലപാട് വ്യക്തമാക്കിയത്. മനുഷ്യൻ സൃഷ്ടിക്കുന്ന കലയും യന്ത്രങ്ങൾ സൃഷ്ടിക്കുന്ന ഉള്ളടക്കവും തമ്മിൽ അടിസ്ഥാനപരമായ വ്യത്യാസമുണ്ടെന്നാണ് അദ്ദേഹത്തിന്റെ വാദം. "സൗന്ദര്യശാസ്ത്രപരമായ വ്യത്യാസത്തിന് മുമ്പുതന്നെ അവയുടെ അസ്തിത്വപരമായ വ്യത്യാസമുണ്ട്," അദ്ദേഹം കുറിച്ചു. ഒരു കലാസൃഷ്ടി എങ്ങനെയിരിക്കുന്നു, എങ്ങനെ അനുഭവപ്പെടുന്നു എന്നതിനു മുമ്പ് അത് എന്താണെന്നും എങ്ങനെയാണ് ഉണ്ടായതെന്നും പരിഗണിക്കണമെന്നാണ് പോപ്പ് ലിയോ ചൂണ്ടിക്കാട്ടുന്നത്. മനുഷ്യന്റെ അനുഭവങ്ങളും ഉദ്ദേശ്യങ്ങളും മനുഷ്യനിലെ പ്രത്യേകമായ സർഗാത്മകതയുമാണ് മനുഷ്യകലയുടെ അടിസ്ഥാനം എന്നാണ് അദ്ദേഹത്തിന്റെ നിലപാട്.

'അൽഗോരിതങ്ങൾക്ക് മനുഷ്യന്റെ സർഗാത്മകതയില്ല'

മനുഷ്യർ സൃഷ്ടിച്ച ദശലക്ഷക്കണക്കിന് ചിത്രങ്ങളിൽ നിന്നുള്ള കണക്കുകൂട്ടലുകളുടെ അടിസ്ഥാനത്തിലാണ് എഐയുടെ സൃഷ്ടികൾ ഉണ്ടാകുന്നതെന്നാണ് പോപ്പ് ലിയോ പറയുന്നത്. "അൽഗോരിതങ്ങൾക്ക് മനുഷ്യന്റെ ആ സർഗാത്മക സ്പാർക്ക് ഇല്ല," എന്നായിരുന്നു അദ്ദേഹത്തിന്റെ വാക്കുകൾ. സഭയും കലാകാരന്മാരും സാംസ്കാരിക സ്ഥാപനങ്ങളും തമ്മിൽ പുതിയൊരു സഖ്യം രൂപീകരിച്ച് മനുഷ്യരാശിയെ സംരക്ഷിക്കണമെന്നും അദ്ദേഹം ആഹ്വാനം ചെയ്തു. എന്നാൽ ഇത് പ്രായോഗികമായി എങ്ങനെ നടപ്പാക്കണമെന്നതിനെക്കുറിച്ച് അദ്ദേഹം വിശദമായ നിർദേശങ്ങൾ നൽകിയിട്ടില്ല. കലാരംഗവും സഭയും തമ്മിൽ എഐയെക്കുറിച്ച് കൂടുതൽ വിശാലമായ സംവാദത്തിന് തുടക്കമിടാനുള്ള ശ്രമമായാണ് ഇതിനെ കാണുന്നത്.

എഐയെക്കുറിച്ച് നേരത്തെയും പോപ്പ് ലിയോ മുന്നറിയിപ്പ് നൽകിയിരുന്നു

ആർട്ടിഫിഷ്യൽ ഇന്റലിജൻസിന്റെ സ്വാധീനത്തെക്കുറിച്ച് പോപ്പ് ലിയോ പതിനാലാമൻ നേരത്തെയും പ്രതികരിച്ചിട്ടുണ്ട്. 2025ൽ മാർപാപ്പയായി തിരഞ്ഞെടുക്കപ്പെട്ടതിന് രണ്ട് ദിവസങ്ങൾക്ക് ശേഷം നടത്തിയ പ്രസംഗത്തിൽ തന്നെ എഐയെക്കുറിച്ചുള്ള ആശങ്ക അദ്ദേഹം പങ്കുവച്ചിരുന്നു. മറ്റൊരു വ്യാവസായിക വിപ്ലവത്തെയും എഐയുടെ വളർച്ചയെയും നേരിടുമ്പോൾ മനുഷ്യന്റെ അന്തസ്സ്, നീതി, തൊഴിൽ എന്നിവ സംരക്ഷിക്കുന്നതിനുള്ള സാമൂഹിക പഠനമാണ് സഭ മുന്നോട്ടുവയ്ക്കുന്നതെന്ന് അദ്ദേഹം അന്ന് വ്യക്തമാക്കിയിരുന്നു. അദ്ദേഹം സ്വീകരിച്ച 'ലിയോ' എന്ന പേര് മുൻ മാർപാപ്പയായ ലിയോ പതിമൂന്നാമനെയും ഓർമിപ്പിക്കുന്നതാണ്. ഒന്നാം വ്യാവസായിക വിപ്ലവത്തിന്റെ കാലത്ത് 1891ൽ തൊഴിലുമായി ബന്ധപ്പെട്ട സുപ്രധാന ചാക്രിക ലേഖനമായ 'റെറും നോവാരം' ലിയോ പതിമൂന്നാമനാണ് പുറത്തിറക്കിയത്.

'മനുഷ്യനെ സംരക്ഷിക്കുക' എന്നതിൽ ഊന്നൽ

2026 മേയിൽ പോപ്പ് ലിയോയുടെ ആദ്യ ചാക്രിക ലേഖനമായ 'മാഗ്നിഫിക്ക ഹ്യൂമാനിറ്റാസ്' പ്രസിദ്ധീകരിച്ചതോടെ എഐ സംബന്ധിച്ച അദ്ദേഹത്തിന്റെ നിലപാട് കൂടുതൽ വ്യക്തമായി. 'ആർട്ടിഫിഷ്യൽ ഇന്റലിജൻസിന്റെ കാലത്ത് മനുഷ്യവ്യക്തിയെ സംരക്ഷിക്കുന്നതിനെക്കുറിച്ച്' എന്ന ഉപശീർഷകത്തോടെയാണ് ലേഖനം പുറത്തിറക്കിയത്. മേയ് 15ന് ഒപ്പുവച്ച രേഖ മേയ് 25നാണ് പുറത്തുവന്നത്. 'റെറും നോവാരം' പ്രസിദ്ധീകരിച്ച് 135 വർഷം പൂർത്തിയാകുന്ന വേളയിലായിരുന്നു ഇത്. വത്തിക്കാനിൽ നടന്ന ചടങ്ങിൽ എഐ കമ്പനിയായ ആന്ത്രോപിക്കിന്റെ സഹസ്ഥാപകരിലൊരാളായ ക്രിസ് ഒലായ്ക്കൊപ്പമാണ് പോപ്പ് ലിയോ രേഖ അവതരിപ്പിച്ചത്.

'ആർട്ടിഫിഷ്യൽ ഇന്റലിജൻസ് നിരായുധമാക്കണം'

എഐയുടെ വളർച്ചയെക്കുറിച്ച് നേരത്തെയുള്ള ഒരു പ്രസ്‍താവനയിലും പോപ്പ് ലിയോ ശക്തമായ ഭാഷയാണ് ഉപയോഗിച്ചത്. "ആർട്ടിഫിഷ്യൽ ഇന്റലിജൻസ് നിരായുധമാക്കേണ്ടതുണ്ട്. വാക്ക് ശക്തമാണെന്ന് എനിക്കറിയാം. എന്നാൽ ശ്രദ്ധ ആകർഷിക്കാനും മനഃസാക്ഷിയെ ഉണർത്താനും മനുഷ്യരാശിക്ക് മുന്നോട്ടുള്ള വഴികൾ ചൂണ്ടിക്കാണിക്കാനും കഴിയുന്ന വാക്കുകൾ ആവശ്യമായതിനാലാണ് അത് മനഃപൂർവം തിരഞ്ഞെടുത്തത്," അദ്ദേഹം പറഞ്ഞു.