കോഡിംഗ് എഐക്ക്; ശ്രീധർ വെമ്പു നൽകുന്ന സൂചനയെന്ത്?

സോഫ്റ്റ്‌വെയർ കോഡുകളുടെ വലിയൊരു ഭാഗം ഭാവിയിൽ ആർട്ടിഫിഷ്യൽ ഇന്റലിജൻസ് കാര്യക്ഷമമായി നിർമ്മിക്കുമെന്ന് സോഹോ സ്ഥാപകൻ ശ്രീധർ വെമ്പു മുന്നറിയിപ്പ് നൽകുന്നു. എഐ കൂടുതൽ ജോലികൾ ഏറ്റെടുക്കുമ്പോൾ, സോഫ്റ്റ്‌വെയർ മേഖലയിൽ പ്രവർത്തിക്കുന്നവർ പ്രസക്തരായി തുടരാൻ പുതിയ വഴികൾ കണ്ടെത്തേണ്ടിവരുമെന്നും അദ്ദേഹം അഭിപ്രായപ്പെട്ടു.

ഗണിതശാസ്ത്രത്തിൽ ആർട്ടിഫിഷ്യൽ ഇന്‍റലിജൻസ് മനുഷ്യരെ മറികടക്കുമെന്ന ചർച്ചകൾക്കിടെ സോഫ്റ്റ്‌വെയർ മേഖലയിലും വലിയ മാറ്റങ്ങൾ വരാനിടയുണ്ടെന്ന മുന്നറിയിപ്പുമായി സോഹോ സ്ഥാപകൻ ശ്രീധർ വെമ്പു. സോഫ്റ്റ്‌വെയർ കോഡുകളുടെ വളരെ വലിയൊരു ഭാഗം ഭാവിയിൽ കൃത്യമായും കാര്യക്ഷമമായും നിർമ്മിക്കാൻ ആർട്ടിഫിഷ്യൽ ഇന്‍റലിജൻസിന് കഴിയുമെന്നാണ് വെമ്പുവിന്റെ വിലയിരുത്തൽ.

ഗണിതമേഖല എഐ കീഴടക്കുമോ?

എക്സ എഐ ലാബ്‍സ് മേധാവി വിൽ ബ്രൈക്കിന്റെ സോഷ്യൽ മീഡിയ കുറിപ്പിന് മറുപടിയായാണ് വെമ്പു ഇക്കാര്യം പറഞ്ഞത്. അമൂർത്തമായ ചിഹ്നങ്ങളും ആശയങ്ങളും കൈകാര്യം ചെയ്യുന്നത് മനുഷ്യർക്ക് സ്വാഭാവികമായി ബുദ്ധിമുട്ടുള്ള കാര്യമാണെന്നും എന്നാൽ കൃത്രിമ ബുദ്ധിയുടെ ശേഷി അതിവേഗം വർധിച്ചുകൊണ്ടിരിക്കുകയാണെന്നും ബ്രൈക്ക് അഭിപ്രായപ്പെട്ടിരുന്നു. അതേസമയം നിലവിലുള്ള നിയമങ്ങൾക്കുള്ളിൽ കൂടുതൽ മികച്ച നീക്കങ്ങൾ കണ്ടെത്തുന്നത് ചെസ് കളിയിൽ വിജയിക്കുന്നതുപോലെയാണെന്ന് വെമ്പു ചൂണ്ടിക്കാട്ടി. ഇത്തരം പ്രശ്‍നപരിഹാരങ്ങൾ എഐ കീഴടക്കുന്നത് ഇപ്പോൾ തന്നെ വ്യക്തമായിക്കൊണ്ടിരിക്കുകയാണെന്നും അദ്ദേഹം പറഞ്ഞു.

പുതിയ ഗെയിം സൃഷ്‍ടിക്കുന്നതാണ് കൂടുതൽ പ്രയാസം

എന്നാൽ നിലവിലുള്ള നിയമങ്ങൾക്കുള്ളിൽ മികച്ച പരിഹാരം കണ്ടെത്തുന്നതും മനുഷ്യർക്ക് താൽപര്യമുണർത്തുന്ന പൂർണമായും പുതിയൊരു ഗണിതരീതി അല്ലെങ്കിൽ “ഗെയിം” സൃഷ്ടിക്കുന്നതും രണ്ടാണെന്ന് വെമ്പു വ്യക്തമാക്കി. പുതിയ ആശയങ്ങളും പുതിയ മേഖലകളും സൃഷ്‍ടിക്കുന്ന ജോലി മനുഷ്യർ പോലും വളരെ അപൂർവമായാണ് ചെയ്യുന്നതെന്നും അദ്ദേഹം അഭിപ്രായപ്പെട്ടു. അതുകൊണ്ടുതന്നെ ഈ മേഖലയിൽ മനുഷ്യരുടെ പങ്ക് ഉടൻ അവസാനിക്കുമെന്ന് പറയാനാകില്ലെന്നും സൂചനയുണ്ട്.

സോഫ്റ്റ്‌വെയർ കോഡുകളും എഐയുടെ കൈകളിലേക്ക്

ഗണിതത്തിൽ നിന്നാണ് വെമ്പു സോഫ്റ്റ്‌വെയർ മേഖലയിലേക്കുള്ള നിർണായക ബന്ധം ചൂണ്ടിക്കാട്ടുന്നത്. സോഫ്റ്റ്‌വെയർ കോഡുകളുടെ വളരെ വലിയൊരു ഭാഗം മികച്ചതും കൃത്യവുമായ വിധത്തിൽ നിർമ്മിക്കാൻ എഐക്ക് കഴിയുന്ന സാഹചര്യം അതിവേഗം അടുത്തുവരികയാണെന്നാണ് അദ്ദേഹത്തിന്റെ വിലയിരുത്തൽ. എഐ എഴുതുന്ന കോഡ് ശരിയാണോ എന്ന് ഉറപ്പാക്കുന്നതാണ് അടുത്ത പ്രധാന ഘട്ടം. ഗണിതശാസ്ത്രത്തിലെ സിദ്ധാന്തങ്ങൾ ഔപചാരികമായി പരിശോധിക്കാൻ ഉപയോഗിക്കുന്ന ലീൻ പോലുള്ള സംവിധാനങ്ങൾ ഭാവിയിൽ എഐ തയ്യാറാക്കുന്ന സോഫ്റ്റ്‌വെയർ കോഡുകളുടെ കൃത്യത പരിശോധിക്കാനും ഉപയോഗിക്കാനാകുമെന്ന് വെമ്പു ചൂണ്ടിക്കാട്ടി.

ചോദ്യം എഐ എല്ലാം ചെയ്യുമോ എന്നതല്ല

എഐ ഭാവിയിൽ മനുഷ്യരെ പൂർണമായും ഒഴിവാക്കുമെന്നല്ല വെമ്പുവിന്റെ വാദം. മറിച്ച്, എഐ കൂടുതൽ ജോലികൾ ഏറ്റെടുക്കുമ്പോൾ എത്ര മനുഷ്യർ യഥാർത്ഥത്തിൽ ആവശ്യമായി വരും എന്നതാണ് പ്രധാന ചോദ്യമെന്ന് അദ്ദേഹം പറയുന്നു. സോഫ്റ്റ്‌വെയർ കോഡ് എഴുതുക, പരിശോധിക്കുക, തിരുത്തുക തുടങ്ങിയ ജോലികളുടെ വലിയൊരു ഭാഗം എഐ ഏറ്റെടുത്താൽ നിലവിലുള്ള തൊഴിൽരീതിയിൽ വലിയ മാറ്റം ഉണ്ടാകാനിടയുണ്ട്.

പ്രസക്തരായി തുടരാൻ വഴി കണ്ടെത്തണം

സോഫ്റ്റ്‌വെയർ മേഖലയിലുള്ളവർക്കായി വെമ്പു നൽകിയ സന്ദേശമാണ് ഇപ്പോൾ ഏറെ ചർച്ചയാകുന്നത്. “സോഫ്റ്റ്‌വെയറിൽ പ്രവർത്തിക്കുന്ന നാമെല്ലാവരും പ്രസക്തരായി തുടരാൻ വഴി കണ്ടെത്തണം” എന്നാണ് അദ്ദേഹത്തിന്റെ മുന്നറിയിപ്പ്.

“ഞാൻ ജോലിയിലേക്ക് മടങ്ങട്ടെ. ഞങ്ങൾക്ക് ഭാഗ്യം ആശംസിക്കൂ” എന്നായിരുന്നു വെമ്പുവിന്റെ അവസാന പ്രതികരണം. എഐയുടെ വളർച്ച സോഫ്റ്റ്‌വെയർ തൊഴിൽ മേഖലയെ എത്രത്തോളം മാറ്റിമറിക്കും എന്നതിനെക്കുറിച്ച് വ്യവസായ രംഗത്ത് തന്നെ നിലനിൽക്കുന്ന ആശങ്കയാണ് വെമ്പുവിന്റെ വാക്കുകളിലൂടെ പുറത്തുവരുന്നത്.