വിജയ് ഹസാരേ ട്രോഫി: ഉത്തപ്പയിലും ശ്രീശാന്തിലും പ്രതീക്ഷ, ജയം തുടരാന്‍ കേരളം

രാവിലെ ഒൻപതിന് ബെംഗളൂരുവിൽ തുടങ്ങുന്ന കളിയിൽ റെയിൽവേസാണ് കേരളത്തിന്‍റെ എതിരാളികൾ. 

ബെംഗളൂരു: വിജയ് ഹസാരേ ട്രോഫി ഏകദിനത്തിൽ തുട‍ർച്ചയായ മൂന്നാം ജയത്തിനായി കേരളം ഇന്നിറങ്ങും. രാവിലെ ഒൻപതിന് ബെംഗളൂരുവിൽ തുടങ്ങുന്ന കളിയിൽ റെയിൽവേസാണ് എതിരാളികൾ. 

ഒഡിഷയെയും ഉത്തർ പ്രദേശിനെയും തോൽപിച്ച ആത്മവിശ്വാസത്തിലാണ് കേരളം ഇറങ്ങുന്നത്. രണ്ട് കളിയിലും റോബിൻ ഉത്തപ്പയുടെ ഇന്നിംഗ്സുകൾ നിർണായക പങ്കുവഹിച്ചു. അഞ്ച് വിക്കറ്റ് നേട്ടവുമായി ശ്രീശാന്തും ഫോമിലേക്ക് തിരിച്ചെത്തിയിട്ടുണ്ട്. ക്യാപ്റ്റൻ സച്ചിൻ ബേബി, സഞ്ജു സാംസൺ, ജലജ് സക്സേന തുടങ്ങിയവരുടെ പ്രകടനവും കേരള നിരയിൽ നിർണായകമാവും. 

റെയിൽവേസും ആദ്യ രണ്ട് കളിയിലും ജയിച്ചു. എട്ട് പോയിന്റ് വീതമാണെങ്കിലും ഗ്രൂപ്പിൽ റൺ ശരാശരിയിൽ റെയിൽവേസ് ഒന്നും കേരളം രണ്ടും സ്ഥാനങ്ങളിലാണ്.