'ആ ചിത്രത്തിന് ശേഷം ഒന്നും ചെയ്യാനുണ്ടാകില്ല' : ആമിർ ഖാന്‍ തന്‍റെ അവസാന ചിത്രത്തെക്കുറിച്ച് പറയുന്നു !

സീതാരേ സമീൻ പറിന് ശേഷം മഹാഭാരതത്തിൽ ശ്രദ്ധ കേന്ദ്രീകരിക്കുമെന്ന് ആമിർ ഖാൻ. ഈ ബൃഹത് പദ്ധതി തന്‍റെ അവസാന ചിത്രമായി മാറിയേക്കാമെന്നും താരം സൂചന നൽകി.

മുംബൈ: ബോളിവുഡ് താരം ആമിർ ഖാൻ തന്റെ അടുത്ത ചിത്രമായ സീതാരേ സമീൻ പറിന്റെ റിലീസിനായി തയ്യാറെടുക്കുകയാണ്. അതേ സമയം പുതിയ ചിത്രത്തിന്‍റെ പ്രമോഷനിടെ തന്റെ സിനിമാ ജീവിതത്തിലെ ഏറ്റവും പ്രധാനപ്പെട്ട അധ്യായമാകാൻ സാധ്യതയുള്ള ഒരു പദ്ധതി സംബന്ധിച്ച ചില വെളിപ്പെടുത്തലുകളും നടത്തി ആമിര്‍. 

സീതാരേ സമീൻ പറിന്റെ പ്രമോഷനും റിലീസിനും ശേഷം തന്‍റെ ദീർഘകാല സ്വപ്ന പദ്ധതിയായ മഹാഭാരതത്തിൽ പൂർണ്ണമായും ശ്രദ്ധ കേന്ദ്രീകരിക്കുമെന്ന് നടൻ പറഞ്ഞു. രാജ് ഷാമണിയുടെ പോഡ്‌കാസ്റ്റിലാണ് താരം തന്‍റെ സ്വപ്ന പദ്ധതി സംബന്ധിച്ച് വെളിപ്പെടുത്തിയത്.

ഇന്ത്യൻ ഇതിഹാസമായ മഹാഭാരതം തന്നിൽ എത്രത്തോളം ആഴത്തിൽ പ്രതിധ്വനിക്കുന്നു എന്ന് ആമിർ പറഞ്ഞു, ഈ ചിത്രം വളരെ വലുതായിരിക്കാമെന്നും അത് തന്റെ അവസാനത്തെ ചിത്രമായി മാറിയേക്കാമെന്നും താരം സൂചന നൽകി. 

"പല അടരുകളായി തിരിച്ചിരിക്കുന്നു കഥയാണ് ഇത്, അതിന് വികാരമുണ്ട്, അതിന് വലിപ്പമുണ്ട്, ലോകത്തിൽ നിങ്ങൾ കണ്ടെത്തിയ എന്തും മഹാഭാരതത്തിൽ നിങ്ങൾ കണ്ടെത്താന്‍ സാധിക്കും" കഥയുടെ ആഴത്തെയും സാർവത്രികതയെയും പ്രതിഫലിപ്പിച്ചുകൊണ്ട് അദ്ദേഹം പറഞ്ഞു.

വർഷങ്ങളായി ഈ പ്രോജക്റ്റ് തന്റെ ഹൃദയത്തിൽ കൊണ്ടുനടന്നതാണെന്ന് പോഡ്കാസ്റ്റില്‍ പറഞ്ഞു. തന്നോട് അടുത്തുനിൽക്കുന്ന ഒരു കൃതിയാണ് ഇത്. ബിഗ് സ്ക്രീനില്‍ കൊണ്ടുവരാൻ എപ്പോഴും താന്‍ വിഭാവനം ചെയ്തിട്ടുള്ള ഒന്നാണിതെന്നും ആമിര്‍ പറഞ്ഞു. മഹാഭാരതം അവസാന ചിത്രമായിരിക്കുമോ എന്ന് ചോദിച്ചപ്പോൾ, നടൻ ചിന്താപൂർവ്വം മറുപടി പറഞ്ഞു, "ഒരുപക്ഷേ ഇത് ചെയ്തതിനുശേഷം, എനിക്ക് ഒന്നും ചെയ്യാനില്ലെന്ന് തോന്നിയേക്കും. ഇതിനുശേഷം എനിക്ക് ഒന്നും ചെയ്യാൻ കഴിയില്ല, കാരണം ആ സിനിമയുടെ മെറ്റീരിയൽ അങ്ങനെയായിരിക്കും." ആമിര്‍ പറഞ്ഞു. 

ദി ഹോളിവുഡ് റിപ്പോർട്ടറുമായുള്ള മുന്‍ അഭിമുഖത്തില്‍ ആമിർ ഈ പദ്ധതിയുടെ ബൃഹത്തായതാണ് എന്ന് പറഞ്ഞിരുന്നു "അത് എന്റെ ഏറ്റവും വലിയ അഭിലാഷങ്ങളിലൊന്നാണ്." വിശദമായ ഒരു തിരക്കഥ വികസിപ്പിക്കുന്നത് പോലും വർഷങ്ങളോളം നീണ്ടുനിൽക്കുന്ന ഒരു പ്രക്രിയ ആയിരിക്കും എന്നാണ് താരം അന്ന് പറഞ്ഞത്.