ഐഫോൺ ക്യാമറയില്‍ മറഞ്ഞിരിക്കുന്ന ആറ് കിടിലൻ ഫീച്ചറുകൾ; ഇവ നിങ്ങളുടെ ഫോട്ടോഗ്രഫി വേറെ ലെവലാക്കും

ഐഫോൺ ക്യാമറ ഉപയോഗിച്ച് ഫോട്ടോ മോഡിൽ നിന്ന് നേരിട്ട് വീഡിയോ റെക്കോർഡ് ചെയ്യാനും, ടെക്സ്റ്റ് സ്കാൻ ചെയ്ത് ഉപയോഗിക്കാനും സാധിക്കും. കൂടാതെ, ലൈവ് ഫോട്ടോകളിൽ നിന്ന് ഏറ്റവും മികച്ച ഫ്രെയിം തിരഞ്ഞെടുത്ത് നിങ്ങളുടെ ചിത്രങ്ങൾ മനോഹരമാക്കാനും കഴിയും.

1. ഫോട്ടോ മോഡിൽ നിന്ന് നേരിട്ട് വീഡിയോ റെക്കോർഡ് ചെയ്യാം

ഐഫോണിൽ ഫോട്ടോ എടുക്കുന്നതിനിടയിൽ തന്നെ വീഡിയോ റെക്കോർഡ് ചെയ്യാൻ കഴിയുന്ന ഫീച്ചർ വളരെ ഉപകാരപ്രദമാണ്. ഷട്ടർ ബട്ടൺ ദീർഘനേരം അമർത്തിയാൽ വീഡിയോ റെക്കോർഡിംഗ് ആരംഭിക്കും. വിടുമ്പോൾ അത് റെക്കോര്‍ഡിംഗ് നിർത്തുകയും ചെയ്യും.

2. ലോക്ക് സൗകര്യവും കൂടുതൽ നിയന്ത്രണവും

കൂടുതൽ ദൈർഘ്യമുള്ള വീഡിയോ റെക്കോർഡിംഗിന്, ഷട്ടർ ബട്ടൺ അമർത്തി വലത്തോട്ട് സ്വൈപ്പ് ചെയ്‌താൽ ലോക്ക് ചെയ്യാം. ഇതിലൂടെ, ബട്ടൺ തുടർച്ചയായി അമർത്തിക്കൊണ്ടിരിക്കേണ്ട ആവശ്യകത ഒഴിവാക്കാം. അതേസമയം, ചെറിയ വെളുത്ത ബട്ടൺ ഉപയോഗിച്ച് വീഡിയോ എടുക്കുന്നതിനിടയിൽ തന്നെ ഫോട്ടോകളും പകർത്താം.

3. ക്യാമറ ഉപയോഗിച്ച് ടെക്സ്റ്റ് സ്‍കാൻ ചെയ്യാം

ഐഫോൺ ക്യാമറ ഉപയോഗിച്ച് ടെക്സ്റ്റ് നേരിട്ട് സ്‌കാൻ ചെയ്ത് ഉപയോഗിക്കാനുള്ള സൗകര്യം മറ്റൊരു ശ്രദ്ധേയമായ ഫീച്ചറാണ്. ഫോട്ടോ മോഡിൽ ക്യാമറ തുറന്ന് ഏതെങ്കിലും ടെക്സ്റ്റിലേക്ക് ഫോൺ പോയിന്‍റ് ചെയ്യുക. ഒരു നിമിഷത്തിനകം നിങ്ങളുടെ ഫോൺ ടെക്സ്റ്റ് കണ്ടെത്തുകയും സ്ക്രീനിന്‍റെ താഴെ-വലത് കോണിൽ ഒരു ലൈവ് ടെക്സ്റ്റ് ഐക്കൺ ദൃശ്യമാകുകയും ചെയ്യും.

4. ലൈവ് ടെക്സ്റ്റ് ഉപയോഗിച്ച് വേഗത്തിൽ പ്രവർത്തനം

ലൈവ് ടെക്സ്റ്റ് ഐക്കൺ അമർത്തിയാൽ വിവിധ ഓപ്ഷനുകൾ ലഭിക്കും. ഫോൺ നമ്പറുകൾ നേരിട്ട് വിളിക്കാനോ സേവ് ചെയ്യാനോ, വെബ് ലിങ്കുകൾ തുറക്കാനോ, സാധാരണ ടെക്സ്റ്റ് കോപ്പി ചെയ്യാനോ, ട്രാൻസിലേറ്റ് ചെയ്യാനോ കഴിയും. പേന പുറത്തെടുക്കുകയോ നോട്ട് ടൈപ്പ് ചെയ്യുകയോ ചെയ്യാതെ തന്നെ വിവരങ്ങൾ വേഗത്തിൽ പകർത്തുന്നതിന് ഈ സവിശേഷത പ്രത്യേകിച്ചും ഉപയോഗപ്രദമാണ്.

5. ലൈവ് ഫോട്ടോസിൽ നിന്ന് മികച്ച ചിത്രം തിരഞ്ഞെടുക്കാം

ലൈവ് ഫോട്ടോസ് ഉപയോഗിച്ച് പകർത്തിയ ചിത്രങ്ങളിൽ നിന്ന് മികച്ച ഫ്രെയിം തിരഞ്ഞെടുക്കാനുള്ള ഫീച്ചർ ഏറെ പ്രയോജനകരമാണ്. ഒരു ഫോട്ടോയിൽ ആരെങ്കിലും കണ്ണടച്ചാലോ, പോസ് ചെയ്‌ത രീതി ശരിയായില്ലെങ്കിലോ അതിന് പകരം മറ്റൊരു മികച്ച ഫ്രെയിം തിരഞ്ഞെടുക്കാം.

6. ഫോട്ടോ എഡിറ്റിംഗിൽ പുതിയ സാധ്യതകൾ

ഫോട്ടോസ് ആപ്പിലെ എഡിറ്റ് ഓപ്ഷൻ വഴി ലൈവ് ഫോട്ടോ തുറന്ന് ഫ്രെയിമുകൾ സ്ക്രോൾ ചെയ്ത് 'മെയ്ക്ക് കീ ഫോട്ടോ' തിരഞ്ഞെടുക്കാം. ഇതിലൂടെ പ്രധാന ചിത്രം മാറ്റാൻ സാധിക്കും. ഈ സവിശേഷതകൾ ഉപയോഗിച്ച് സാധാരണയായി ഒഴിവാക്കേണ്ട ഫോട്ടോകൾ പോലും മികച്ച ഓർമ്മകളാക്കി മാറ്റാൻ കഴിയും.