ഉത്കണ്ഠ എന്ന് തെറ്റിദ്ധരിക്കപ്പെടുന്ന 6 ശാരീരിക-മാനസിക ആരോഗ്യ പ്രശ്നങ്ങൾ; വിദഗ്ധർ പറയുന്നു

ചില ശാരീരിക രോഗങ്ങളും മാനസിക പ്രശ്നങ്ങളും ഉത്കണ്ഠയ്ക്ക് സമാനമായ ലക്ഷണങ്ങൾ കാണിക്കാറുണ്ട്.

വേഗത്തിലുള്ള നെഞ്ചിടിപ്പ്, അമിതമായ വിയർപ്പ്, തലകറക്കം, നെഞ്ചിൽ ഭാരം അനുഭവപ്പെടൽ, അസ്വസ്ഥത, അനാവശ്യമായ ഭയം എന്നിവ കണ്ടാൽ പലരും അതിനെ ഉത്കണ്ഠ ആയി കരുതുന്നു. എന്നാൽ ഈ ലക്ഷണങ്ങൾ ഉത്കണ്ഠ മൂലം മാത്രം ഉണ്ടാകുന്നതല്ലെന്ന് മാനസികാരോഗ്യ വിദഗ്ധർ മുന്നറിയിപ്പ് നൽകുന്നു. ചില ശാരീരിക രോഗങ്ങളും മാനസിക പ്രശ്നങ്ങളും ഉത്കണ്ഠയ്ക്ക് സമാനമായ ലക്ഷണങ്ങൾ കാണിക്കാറുണ്ട്. അതിനാൽ പാനിക് അറ്റാക്ക് ആണെന്ന് കരുതുന്ന പല രോഗ ലക്ഷണങ്ങൾക്കും പിന്നിൽ ഹൃദയം, തൈറോയ്ഡ്, രക്തത്തിലെ പഞ്ചസാരയുടെ അളവ്, ഹോർമോൺ വ്യതിയാനങ്ങൾ അല്ലെങ്കിൽ നാഡീവ്യൂഹപരമായ പ്രശ്നങ്ങൾ എന്നിവയാകാം. ലക്ഷണങ്ങൾ പെട്ടെന്നുണ്ടാകുകയോ തീവ്രമാകുകയോ ചെയ്യുമ്പോൾ സ്വയം രോഗനിർണ്ണയം നടത്താതെ കൃത്യമായ വൈദ്യപരിശോധന നടത്തേണ്ടത് അത്യാവശ്യമാണ്. ഉത്കണ്ഠയാണെന്ന് തെറ്റിദ്ധരിക്കപ്പെടാൻ സാധ്യതയുള്ള 10 ആരോഗ്യ സ്ഥിതികൾ ഇവയാണ്.

1. ഹൈപ്പർതൈറോയിഡിസം

തൈറോയ്ഡ് ഗ്രന്ഥി അമിതമായി പ്രവർത്തിച്ച് തൈറോയ്ഡ് ഹോർമോണുകൾ ഉത്പാദിപ്പിക്കുമ്പോൾ ശരീരത്തിന്റെ പ്രവർത്തനങ്ങൾ വേഗത്തിലാകുന്നു. ഇത് വേഗത്തിലുള്ള നെഞ്ചിടിപ്പ്, വിയർപ്പ്, ശരീരവിറയൽ, അസ്വസ്ഥത, ഉറക്കമില്ലായ്മ എന്നിവയ്ക്ക് കാരണമാകുന്നു.

2. ഹൈപ്പോഗ്ലൈസീമിയ

രക്തത്തിലെ പഞ്ചസാരയുടെ അളവ് പെട്ടെന്ന് താഴുന്നത് ശരീരം വിറയ്ക്കൽ, തലകറക്കം, ആശയക്കുഴപ്പം, വിയർപ്പ്, ക്ഷീണം, അമിതമായ ഭയം എന്നിവ ഉണ്ടാക്കാം. പ്രമേഹരോഗികളിലും കൃത്യസമയത്ത് ഭക്ഷണം കഴിക്കാത്തവരിലും ഇത് പാനിക് അറ്റാക്കിന് സമാനമായി അനുഭവപ്പെടാറുണ്ട്.

3. ആസ്ത്മ

ശ്വാസതടസ്സം, നെഞ്ചിലുണ്ടാകുന്ന ഇറുക്കം, ശ്വാസം മുട്ടുന്നതായി തോന്നുന്നത് എന്നിവ ആസ്ത്മയുടെ പ്രധാന ലക്ഷണങ്ങളാണ്. ഈ അവസ്ഥ ഉണ്ടാക്കുന്ന ശാരീരിക ബുദ്ധിമുട്ടുകൾ രോഗിയിൽ പാനിക് അറ്റാക്കിന് സമാനമായ ഭയത്തിന് കാരണമാകാം.

4. സ്ലീപ്പ് അപ്നിയ

ഉറക്കത്തിനിടയിൽ ശ്വാസോച്ഛ്വാസം തടസ്സപ്പെടുന്ന അവസ്ഥയാണ് സ്ലീപ്പ് അപ്നിയ. മോശം ഉറക്കം കാരണം പകൽ സമയത്ത് അമിത ക്ഷീണം, ദേഷ്യം, ഏകാഗ്രതക്കുറവ്, തലവേദന, ഉത്കണ്ഠ ലക്ഷണങ്ങൾ എന്നിവ അനുഭവപ്പെടാം.

5. ഇരുമ്പിന്റെ കുറവ് മൂലമുള്ള അനീമിയ

ശരീരത്തിൽ ഇരുമ്പിന്റെ അളവ് കുറയുമ്പോൾ രക്തക്കുറവ് ഉണ്ടാകുന്നു. ഇത് ക്ഷീണം, അമിത വിറയൽ, തലകറക്കം, വേഗത്തിലുള്ള നെഞ്ചിടിപ്പ്, ശ്വാസംമുട്ടൽ എന്നിവ ഉണ്ടാക്കാം. സ്ത്രീകളിൽ പൊതുവായി കാണപ്പെടുന്ന ഈ അവസ്ഥ ഉത്കണ്ഠയുടെ ശാരീരിക ലക്ഷണങ്ങൾക്ക് സമാനമാണ്.

6. ആർത്തവവിരാമം

ആർത്തവവിരാമ ഘട്ടത്തിൽ സ്ത്രീകളുടെ ശരീരത്തിലുണ്ടാകുന്ന ഹോർമോൺ വ്യതിയാനങ്ങൾ മൂലം മൂഡ് സ്വിങ്സ്, അമിത നെഞ്ചിടിപ്പ്, പെട്ടെന്ന് ശരീരം ചൂടാകുന്ന അവസ്ഥ, ഉറക്കമില്ലായ്മ, അസ്വസ്ഥത എന്നിവ ഉണ്ടാകുന്നു. പല സ്ത്രീകളിലും ഈ ഘട്ടത്തിലെ ശാരീരിക മാറ്റങ്ങൾ ഉത്കണ്ഠയായി തെറ്റിദ്ധരിക്കപ്പെടാറുണ്ട്.