ചുമയ്ക്കുമ്പോള് രക്തം വരുക, ശ്വസിക്കാനുളള ബുദ്ധിമുട്ട്; ഈ ലക്ഷണങ്ങളെ അവഗണിക്കരുതേ...
Synopsis
എപ്പോഴും ക്ഷീണം അനുഭവപ്പെടുന്നതും പെട്ടെന്ന് ശരീരഭാരം കുറയുന്നതും പല രോഗങ്ങളുടെയും സൂചനയാണെങ്കിലും അതും ചിലപ്പോള് ശ്വാസകോശാര്ബുദത്തിന്റെ ലക്ഷണം ആകാം. കൂടാതെ അസ്ഥികള്ക്ക് വേദന വരുന്നത്, തലവേദന, ശരീരത്തില് നീര് വെയ്ക്കുക തുടങ്ങിയവയും ശ്രദ്ധിക്കാതെ പോകരുത്.
ഇന്ന് ലോക ശ്വാസകോശാര്ബുദ ദിനമാണ്. ലോകത്ത് ശ്വാസകോശാര്ബുദത്തിന്റെ നിരക്ക് വര്ധിച്ചു വരികയാണ്. ഏറ്റവും അപകടകരമായ അര്ബുദങ്ങളിലൊന്നാണ് ലങ് ക്യാന്സര് അഥവാ ശ്വാസകോശത്തെ ബാധിക്കുന്ന ക്യാന്സര്. വായു മലിനീകരണം, പുകയിലയുമായുള്ള സമ്പര്ക്കം തുടങ്ങി പല ഘടകങ്ങളും ശ്വാസകോശ അര്ബുദത്തെ സ്വാധീനക്കുന്ന ഘടകങ്ങളാണ്. ശ്വാസകോശാര്ബുദത്തിന്റെ ആദ്യ ഘട്ടത്തില് ഒരിക്കലും ലക്ഷണങ്ങള് ഒന്നും പ്രകടമാകണമെന്നില്ല.
വിട്ടുമാറാത്ത ചുമ തന്നെയാണ് ശ്വാസകോശാര്ബുദത്തിന്റെ പ്രധാന ലക്ഷണം. നിര്ത്താതെയുളള അതിഭയങ്കരമായ ചുമ ചിലപ്പോള് ശ്വാസകോശ അര്ബുദത്തിന്റെയാവാം. രണ്ടാഴ്ചയില് കൂടുതലായി ഇത്തരത്തില് ചുമ തുടരുന്നുണ്ടെങ്കില്, ഒരു ഡോക്ടറെ കാണണം എന്നാണ് വിദഗ്ധര് പറയുന്നത്. ചുമയ്ക്കുമ്പോള് രക്തം വരുന്നതും പ്രത്യേകം ശ്രദ്ധിക്കണം. തുപ്പുമ്പോള് നിറവ്യത്യാസം ഉണ്ടെങ്കിലും ഒരു ഡോക്ടറെ കണ്ട് പരിശോധന നടത്തണം. കഫത്തില് ചോരയുടെയോ തുരുമ്പിന്റെയോ നിറം പ്രത്യേകം ശ്രദ്ധിക്കണം.
ശ്വസിക്കാനുളള ബുദ്ധിമുട്ടാണ് മറ്റൊരു ലക്ഷണം. ശ്വസിക്കുമ്പോള് ശബ്ദം വരുക, ചെറുതായിട്ട് ഒന്ന് നടക്കുമ്പോള് പോലും ഉണ്ടാകുന്ന കിതപ്പ് തുടങ്ങിയവയും പ്രത്യേകം ശ്രദ്ധിക്കണം. നെഞ്ചുവേദനയും ചിലപ്പോള് ഒരു ലക്ഷണമാകും. അതായത് ശ്വാസതടസവും ചുമയും മൂലം നെഞ്ചുവേദന ഉണ്ടാകുന്നത് ശ്വാസകോശാര്ബുദത്തിന്റെ ഒരു ലക്ഷണമാകാം. ശബ്ദത്തിന് പെട്ടെന്ന് മാറ്റം വരുന്നതും ഒരു ലക്ഷണമാണ്. ബ്രോങ്കൈറ്റിസ്, ന്യുമോണിയ പോലുള്ള അണുബാധകള് വിട്ടുമാറാതെ തുടരുന്നതും ശ്രദ്ധിക്കണം. എപ്പോഴും ക്ഷീണം അനുഭവപ്പെടുന്നതും പെട്ടെന്ന് ശരീരഭാരം കുറയുന്നതും പല രോഗങ്ങളുടെയും സൂചനയാണെങ്കിലും അതും ചിലപ്പോള് ശ്വാസകോശാര്ബുദത്തിന്റെ ലക്ഷണം ആകാം. കൂടാതെ അസ്ഥികള്ക്ക് വേദന വരുന്നത്, തലവേദന, ശരീരത്തില് നീര് വെയ്ക്കുക തുടങ്ങിയവയും ശ്രദ്ധിക്കാതെ പോകരുത്.
ശ്രദ്ധിക്കുക: മേൽപ്പറഞ്ഞ ലക്ഷണങ്ങൾ കാണുന്നപക്ഷം സ്വയം രോഗ നിർണയത്തിന് ശ്രമിക്കാതെ നിർബന്ധമായും ഡോക്ടറെ 'കൺസൾട്ട്' ചെയ്യുക. ഇതിന് ശേഷം മാത്രം രോഗം സ്ഥിരീകരിക്കുക.
Also Read: രക്തത്തിലെ പഞ്ചസാരയുടെ അളവിനെ നിയന്ത്രിക്കാന് പതിവായി കഴിക്കാം ഈ പച്ചക്കറി...