World Breastfeeding Week : മുലപ്പാൽ വർദ്ധിപ്പിക്കാൻ സഹായിക്കുന്ന 8 ഭക്ഷണങ്ങൾ

നാരുകൾ, ഇരുമ്പ്, കോംപ്ലക്സ് കാർബോഹൈഡ്രേറ്റുകൾ എന്നിവ അടങ്ങിയ ഭക്ഷണമാണ് ഓട്സ്. ഇരുമ്പ് ധാരാളമടങ്ങിയ ഭക്ഷണങ്ങൾ കഴിക്കുന്നത് അമ്മയുടെ ആരോഗ്യത്തെ മൊത്തത്തിൽ മെച്ചപ്പെടുത്തുന്നു.

നവജാത ശിശുവിന് അമ്മയുടെ മുലപ്പാൽ നൽകുന്നത് കുട്ടിയുടെ ആരോഗ്യത്തിനും വളർച്ചയ്ക്കും ഏറ്റവും പ്രധാനപ്പെട്ട കാര്യമാണ്. ഇത് കുഞ്ഞിന് ആവശ്യമായ പോഷകങ്ങളും രോഗപ്രതിരോധ ശേഷിയും നൽകുന്നു. അമ്മമാരുടെയും കുഞ്ഞുങ്ങളുടെയും ആരോഗ്യത്തിന് മുലയൂട്ടൽ എത്രത്തോളം പ്രധാനമാണെന്നതിനെക്കുറിച്ച് അവബോധം വളർത്തുന്നതിനായി എല്ലാ വർഷവും ഓഗസ്റ്റ് 1 മുതൽ 7 വരെ 'ലോക മുലയൂട്ടൽ വാരം' ആചരിക്കുന്നു.

പതിവായുള്ള മുലയൂട്ടലിനും ശരീരത്തിൽ ആവശ്യമായ ജലാംശം നിലനിർത്തുന്നതിനും ഒപ്പം, സമീകൃതാഹാരവും അമ്മയുടെ ആരോഗ്യത്തെയും മുലയൂട്ടൽ പ്രക്രിയയെയും പിന്തുണയ്ക്കുന്നതിൽ നിർണായക പങ്ക് വഹിക്കുന്നു. മുലയൂട്ടുന്ന അമ്മമാരുടെ ഭക്ഷണക്രമത്തിൽ ഉൾപ്പെടുത്താവുന്ന എട്ട് പോഷകസമൃദ്ധമായ ഭക്ഷണങ്ങൾ താഴെ നൽകുന്നു...

ഓട്സ്

നാരുകൾ, ഇരുമ്പ്, കോംപ്ലക്സ് കാർബോഹൈഡ്രേറ്റുകൾ എന്നിവ അടങ്ങിയ ഭക്ഷണമാണ് ഓട്സ്. ഇരുമ്പ് ധാരാളമടങ്ങിയ ഭക്ഷണങ്ങൾ കഴിക്കുന്നത് അമ്മയുടെ ആരോഗ്യത്തെ മൊത്തത്തിൽ മെച്ചപ്പെടുത്തുന്നു. അതേസമയം, മുലയൂട്ടുന്ന സമയത്ത് വർദ്ധിക്കുന്ന പോഷകാഹാര ആവശ്യങ്ങൾ നിറവേറ്റാനും ശരീരത്തിന് ദീർഘനേരം ഊർജ്ജം നൽകാനും ഓട്സ് അടങ്ങിയ സമീകൃതാഹാരം സഹായിക്കുന്നു. (

ഉലുവ

ഉലുവ മുലപ്പാൽ ഉൽപ്പാദനം വർദ്ധിപ്പിക്കാൻ സഹായിക്കും. മുലയൂട്ടുന്ന അമ്മമാർക്ക് മിതമായ അളവിൽ ഉലുവ ഉപയോഗിക്കുന്നത് പൊതുവെ സുരക്ഷിതമായി കണക്കാക്കപ്പെടുന്നു. മുലപ്പാൽ വർദ്ധിപ്പിക്കുന്നതിനായുള്ള പരമ്പരാഗത ഭക്ഷണക്രമങ്ങളിൽ ഇത് വ്യാപകമായി ഉപയോഗിച്ചുവരുന്നു.

പെരുംജീരകം

മുലപ്പാൽ കൂട്ടാൻ പെരുംജീരകം മികച്ചതാണ്. ഇത് പെരുംജീരക ചായയോ അല്ലെങ്കിൽ ഭക്ഷണങ്ങളിൽ ചേർത്തോ കഴിക്കാം. ദഹനത്തെ സഹായിക്കാൻ പെരുംജീരകത്തിന് സാധിച്ചേക്കാം.

ഇലക്കറി

ചീര, ഉലുവയില, മുരിങ്ങയില തുടങ്ങിയ ഇലക്കറികളിൽ കാൽസ്യം, ഫോളേറ്റ്, ഇരുമ്പ്, വിവിധ വിറ്റാമിനുകൾ എന്നിവ ധാരാളമായി അടങ്ങിയിട്ടുണ്ട്. മുലയൂട്ടുന്ന സമയത്ത് അമ്മയ്ക്കുണ്ടാകുന്ന അധിക പോഷകാഹാര ആവശ്യങ്ങൾ നിറവേറ്റാനും മൊത്തത്തിലുള്ള ആരോഗ്യം നിലനിർത്താനും ഈ പോഷകങ്ങൾ സഹായിക്കുന്നു.

മുരിങ്ങയില

മുരിങ്ങയിലയിൽ വിറ്റാമിനുകൾ A, C, കാൽസ്യം, പൊട്ടാസ്യം, ആന്റിഓക്‌സിഡന്റുകൾ എന്നിവ സ്വാഭാവികമായി അടങ്ങിയിട്ടുണ്ട്. ചില അമ്മമാരിൽ മുലപ്പാൽ ഉൽപ്പാദനം വർദ്ധിപ്പിക്കാൻ മുരിങ്ങ സഹായിച്ചേക്കാമെന്ന് ചില ക്ലിനിക്കൽ പഠനങ്ങൾ സൂചിപ്പിക്കുന്നു.

നട്സുകളും സീഡും

ബദാം, വാൽനട്ട്, എള്ള്, ഫ്ലാക്സ് സീഡ്സ്, ചിയാ സീഡ്സ് എന്നിവ മുലയൂട്ടുന്ന അമ്മമാർക്ക് പോഷകസമൃദ്ധമായ ഭക്ഷണക്രമത്തിന് ആവശ്യമായ ആരോഗ്യകരമായ കൊഴുപ്പ്, പ്രോട്ടീൻ, ധാതുക്കൾ എന്നിവ നൽകുന്നു.

മുട്ട

മതിയായ അളവിൽ പ്രോട്ടീൻ കഴിക്കുന്നത് പ്രസവശേഷം ശരീരകലകളുടെ പുനരുജ്ജീവനത്തെ സഹായിക്കുന്നതിനൊപ്പം മുലയൂട്ടൽ കാലയളവിലെ പോഷകാഹാര ആവശ്യങ്ങൾ നിറവേറ്റാനും സഹായിക്കുന്നു.