നായയുടെ ജീവന്‍ രക്ഷിക്കുന്നതിനിടെ പൊള്ളലേറ്റു; മേജറിന് ദാരുണാന്ത്യം

പ്രദേശത്ത് ആര്‍മി ഓഫീസര്‍മാര്‍ താമസിക്കുന്ന സ്ഥലത്ത് ശനിയാഴ്ച രാത്രിയിലാണ് തീപിടിത്തമുണ്ടായത്. തീ പടര്‍ന്നപ്പോള്‍ തന്‍റെ ഭാര്യയും മറ്റൊരു നായയെയും മേജര്‍ അങ്കിത് ബുദ്രാജ ആദ്യം രക്ഷപെടുത്തി

കശ്മീര്‍: തന്‍റെ നായയുടെ ജീവന്‍ രക്ഷിക്കുന്നതിനിടെ പൊള്ളലേറ്റ ആര്‍മി മേജര്‍ മരിച്ചു. ജമ്മു കശ്മീരിലെ ബാരാമുള്ള ജില്ലയിലെ ഗുല്‍മാര്‍ഗിലാണ് സംഭവം. പ്രദേശത്ത് ആര്‍മി ഓഫീസര്‍മാര്‍ താമസിക്കുന്ന സ്ഥലത്ത് ശനിയാഴ്ച രാത്രിയിലാണ് തീപിടിത്തമുണ്ടായത്. തീ പടര്‍ന്നപ്പോള്‍ തന്‍റെ ഭാര്യയും വളര്‍ത്തു നായയെയും  മേജര്‍ അങ്കിത് ബുദ്രാജ ആദ്യം രക്ഷപെടുത്തി.

മറ്റൊരു വളര്‍ത്തു നായയെ രക്ഷിക്കാനുള്ള ശ്രമത്തിനിടെ അങ്കിത്തിന് 90 ശതമാനം പൊള്ളലേല്‍ക്കുകയും അപ്പോള്‍ തന്നെ മരണം സംഭവിക്കുകയുമായിരുന്നുവെന്ന് പൊലീസ് അറിയിച്ചു. ലോക്കല്‍ പൊലീസിന്‍റെയും അഗ്നിശമന സേനയുടെയും സഹായത്തോടെയാണ് തീയണച്ചത്. അങ്കിത്തിന്‍റെ മൃതദേഹം നടപടിക്രമങ്ങള്‍ക്കായി സബ് ജില്ലാ അശുപത്രിയിലേക്ക് മാറ്റി.