ബംബിളിലൂടെ പരിചയപ്പെട്ടു, യുവാവിനൊപ്പം അപ്പാർട്ട്മെന്‍റിൽ ഡേറ്റിന് പോയി, വർഷങ്ങൾക്ക് ശേഷം പുറത്തുവന്ന വീഡിയോ കണ്ട് യുവതി ഞെട്ടി; പൊലീസിൽ പരാതി

ഓൺലൈൻ ഡേറ്റിങ് ആപ്പിലൂടെ പരിചയപ്പെട്ട യുവാവിനൊപ്പം സമയം ചിലവഴിച്ച യുവതി, വർഷങ്ങൾക്ക് ശേഷം തങ്ങളുടെ സ്വകാര്യ ദൃശ്യങ്ങൾ ഇന്‍റർനെറ്റിൽ പ്രചരിക്കുന്നതായി കണ്ടെത്തി

ബെംഗളൂരു: ഓൺലൈൻ ഡേറ്റിങ് ആപ്പിലൂടെ പരിചയപ്പെട്ട യുവാവിനൊപ്പം സമയം ചിലവഴിച്ച യുവതി, വർഷങ്ങൾക്ക് ശേഷം തങ്ങളുടെ സ്വകാര്യ ദൃശ്യങ്ങൾ ഇന്‍റർനെറ്റിൽ പ്രചരിക്കുന്നതായി കണ്ടെത്തി. ബെംഗളൂരു സ്വദേശിയായ 28-കാരിയാണ് തനിക്ക് നേരിടേണ്ടി വന്ന ക്രൂരമായ ചതിക്കെതിരെ പോലീസിൽ പരാതി നൽകിയത്. 2022 നവംബറിലാണ് യുവതി 'ബംബിൾ' എന്ന ഡേറ്റിങ് ആപ്പിലൂടെ ഒരു യുവാവിനെ പരിചയപ്പെടുന്നത്. ആപ്പിലെ ചാറ്റിങ്ങിന് ശേഷം ഇരുവരും തങ്ങളുടെ ഇൻസ്റ്റാഗ്രാം പ്രൊഫൈലുകൾ കൈമാറുകയും പരസ്പരം തുടർന്ന് യുവാവിന്‍റെ അപ്പാർട്ട്മെന്‍റിൽ വെച്ച് നേരിട്ട് കാണാൻ തീരുമാനിക്കുകയും ചെയ്തു.

അപ്പാർട്ട്മെന്‍റിൽ എത്തിയ യുവതിക്ക് ഇയാൾ കുടിക്കാൻ ജ്യൂസ് നൽകുകയും, തുടർന്ന് ഇരുവരും പരസ്പര സമ്മതത്തോടെ ലൈംഗികമായി ബന്ധപ്പെടുകയും ചെയ്തു. എന്നാൽ ഈ കൂടിക്കാഴ്ചയ്ക്ക് ശേഷം യുവാവ് യുവതിയോടുള്ള ആശയവിനിമയം പടിപടിയായി കുറയ്ക്കുകയും, പിന്നീട് ഇൻസ്റ്റാഗ്രാം ഉൾപ്പെടെയുള്ള എല്ലാ സോഷ്യൽ മീഡിയ പ്ലാറ്റ്‌ഫോമുകളിലും യുവതിയെ ബ്ലോക്ക് ചെയ്യുകയും ചെയ്തു. ഇതോടെ യുവാവിനെ ബന്ധപ്പെടാൻ യുവതിക്ക് മറ്റ് വഴികളില്ലാതായി. എന്നാൽ, ഏകദേശം നാല് വർഷങ്ങൾക്ക് ശേഷം, തങ്ങളുടെ സ്വകാര്യ നിമിഷങ്ങളുടെ ദൃശ്യങ്ങൾ റെഡ്ഡിറ്റിലും മറ്റൊരു അശ്ലീല വെബ്‌സൈറ്റിലും പ്രചരിക്കുന്നതായി യുവതി കണ്ടെത്തുകയായിരുന്നു. യുവതിയുടെ അറിവോ സമ്മതമോ ഇല്ലാതെയാണ് ഈ ദൃശ്യങ്ങൾ രഹസ്യമായി പകർത്തി ഇന്റർനെറ്റിൽ അപ്‌ലോഡ് ചെയ്തത്.

തന്‍റെ സ്വകാര്യ ദൃശ്യങ്ങൾ നിയമവിരുദ്ധമായി പ്രചരിപ്പിച്ചതിനെതിരെ ജൂൺ 19-നാണ് യുവതി പോലീസിനെ സമീപിച്ചത്. പ്രതിക്കെതിരെ കർശന നടപടി സ്വീകരിക്കണമെന്ന് യുവതി പരാതിയിൽ ആവശ്യപ്പെട്ടു. യുവതിയുടെ പരാതിയിൽ പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്. ദൃശ്യങ്ങൾ എങ്ങനെയാണ് റെക്കോർഡ് ചെയ്തതെന്നും ആരാണ് ഇത് ഇന്റർനെറ്റിൽ അപ്‌ലോഡ് ചെയ്തതെന്നും കണ്ടെത്താനുള്ള ശ്രമത്തിലാണ് പോലീസ്. നിലവിൽ വെബ്‌സൈറ്റുകളിൽ നിന്ന് ഈ ദൃശ്യങ്ങൾ അധികൃതർ നീക്കം ചെയ്തിട്ടുണ്ട്.