'ബിജെപി എംപി ട്രംപിന്റെ മക്കളെയും കുടുംബാം​ഗങ്ങളെയും കണ്ട് പ്രത്യേകം ചർച്ച നടത്തി'; പ്രോട്ടോക്കോൾ ലംഘനം ആയുധമാക്കാൻ കോൺ​ഗ്രസ്

ശശി തരൂരിന്റെ നേതൃത്വത്തിലുള്ള പ്രതിനിധി സംഘത്തിന്റെ യുഎസ് സന്ദർശനത്തിനിടെയുണ്ടായ പ്രോട്ടോക്കോൾ ലംഘനം പാർലമെന്റിൽ ഉന്നയിക്കാൻ കോൺഗ്രസ്. യുവ ബിജെപി എംപി ഡൊണാൾഡ് ട്രംപിനെ കണ്ടത് വിവാദമാകുന്നു.

ദില്ലി: ശശിതരൂരിന്റെ പ്രതിനിധി സം​ഘാം​ഗങ്ങൾ യുഎസ് സന്ദർശനത്തിനിടെ പ്രോട്ടോക്കോൾ ലംഘനം നടത്തിയത് പാർലമെന്റിൽ ആയുധമാക്കാൻ കോൺ​ഗ്രസ്. ബിജെപിയുടെ യുവ എംപിയോട് അമേരിക്കൻ പ്രസിഡന്റ് ഡോണൾഡ് ട്രംപ് രോഷത്തോടെ സംസാരിച്ചെന്ന വാർത്തകൾ പുറത്തുവന്ന സാഹചര്യത്തിലാണിത്. ബിജെപി നേതൃത്വവും സംഭവത്തിൽ കടുത്ത അതൃപ്തിയിലാണ്.

ഓപ്പറേഷൻ സിന്ദൂറിനെ കുറിച്ച് വിശദീകരിക്കാൻ ശശി തരൂരിന്റെ നേതൃത്വത്തിലുള്ള പ്രതിനിധി സംഘം ജൂൺ 3 നാണ് അമേരിക്കയിലെത്തിയത്. അമേരിക്കൻ ഉപരാഷ്ട്രപതി ജെഡി വാൻസിനെയാണ് പ്രതിനിധി സംഘം ഔദ്യോ​ഗികമായി കണ്ടത്. ഡോണൾഡ് ട്രംപുമായി നേരിട്ട് സംഘം കൂടികാഴ്ച നടത്തിയിരുന്നില്ല. എന്നാൽ സം​ഘത്തിലെ അം​​ഗമായ മഹരാഷ്ട്രയിൽ നിന്നുള്ള ബിജെപി എംപി മിലിന്ദ് ദിയോറ ഡൊണാൾഡ് ട്രംപിന്റെ മക്കളെയും കുടുംബാം​ഗങ്ങളെയും കണ്ട് പ്രത്യേകം ചർച്ച നടത്തി. ഒരു യുവ ബിജെപി എംപി ഫ്ലോറിഡയിലെ ഡൊണാൾഡ് ട്രംപിന്റെ വസതിയിലെത്തി കൂടികാഴ്ച നടത്തിയെന്ന റിപ്പോർട്ടുകളും വന്നു. അമേരിക്കയിലെ ചില ബന്ധങ്ങൾ ഉപയോഗിച്ചാണ് ഈ കൂടിക്കാഴ്ച സംഘടിപ്പിച്ചത്. പ്രധാനമന്ത്രി നരേന്ദ്രമോദിയുമായി അടുപ്പമുള്ള എംപിയെന്നാണ് ട്രംപിനെ അദ്ദേഹത്തോട് അടുപ്പമുള്ളവർ അറിയിച്ചത്.

കൂടികാഴ്ച ഒട്ടും സൗഹൃദപരമായിരുന്നില്ലെന്നും, ട്രംപ് എംപിയെ ശകാരിച്ചെന്നും റിപ്പോർട്ടുകൾ വന്നു. ഈ യുവ എംപി തേജസ്വി സൂര്യയാണെന്നാണ് സമൂഹമാധ്യമങ്ങളിൽ പ്രചരിക്കുന്നത്. കോൺ​ഗ്രസ് അധ്യക്ഷൻ മല്ലികാർജുൻ ഖർ​ഗെയുടെ മകനും കർണാടക മന്ത്രിയുമായ പ്രിയങ്ക് ഖർ​ഗെ ഇക്കാര്യത്തിൽ രൂക്ഷ വിമർശനമുന്നയിച്ചുകൊണ്ട് പ്രസ്താവന എക്സിൽ പോസ്റ്റ് ചെയ്തിരുന്നു. ഈമാസം 21 ന് പാർലമെന്റ് സമ്മേളനം നടക്കാനിരിക്കെ വിഷയം ആയുധമാക്കാനാണ് കോൺ​ഗ്രസ് തീരുമാനം. വിദേശ കാര്യ മന്ത്രാലയം പ്രോട്ടോക്കോൾ ലംഘനത്തിൽ അന്വേഷണം നടത്തണമെന്ന് കോൺ​ഗ്രസ് സഭയിൽ ആവശ്യപ്പെടും. തുടർച്ചയായ വിവാദ പരാമർശങ്ങളിലൂടെ കോൺ​ഗ്രസിനെ വെട്ടിലാക്കുന്ന ശശി തരൂർ എംപിയും പ്രതിനിധി സംഘാം​ഗങ്ങളുടെ പ്രോട്ടോക്കോൾ ലംഘനം പാർട്ടിയെ അറിയിച്ചിട്ടില്ല. പ്രോട്ടോക്കോൾ ലംഘനത്തിൽ ബിജെപി ദേശീയ നേതൃത്വം എംപിമാരെ കടുത്ത അതൃപ്തി അറിയിച്ചു എന്നാണ് സൂചന.