രാജ്യത്ത് 396 പേർക്ക് കൊവിഡ്; സംസ്ഥാനത്ത് രണ്ടിടത്ത് നിരോധനാജ്ഞ, കടകൾ തുറക്കാമെന്ന് മുഖ്യമന്ത്രി | LIVE

ഇറ്റലിയിൽ ഇന്നും 651 പേർക്ക് കൊവിഡ് വൈറസ് ബാധയെ തുടർന്ന് ജീവൻ നഷ്ടമായി. ഇതോടെ ഇറ്റലിയിലാകെ മരണം 5476 ആയി.

രാജ്യത്ത് 396 പേർക്ക് കൊവിഡ് രോഗബാധയെന്ന് വിവരം. ഐസിഎംആർ പുറത്തുവിട്ട കണക്ക് പ്രകാരമാണ് ഇത്രയും പേർക്ക് രോഗം സ്ഥിരീകരിച്ചത്.

തമിഴ്‌നാട്ടിൽ രണ്ട് പേർക്ക് കൂടി കൊവിഡ് വൈറസ് ബാധ സ്ഥിരീകരിച്ചു. അമേരിക്കയിലെ കാലിഫോർണിയയിൽ നിന്ന് മടങ്ങിയെത്തിയ 64 വയസുള്ള സ്ത്രീ, ദുബായിൽ നിന്ന് കഴിഞ്ഞ ആഴ്ച എത്തിയ 43 വയസുള്ള പുരുഷൻ എന്നിവർക്കാണ് രോഗം സ്ഥിരീകരിച്ചത്.

കൊവിഡ് വൈറസ് ബാധിച്ച് സംസ്ഥാനത്ത് ഒരാൾ മരിച്ചുവെന്ന് വ്യാജ പ്രചാരണം നടത്തിയ ഒരാളെ ഫോർട്ട് പൊലീസ് അറസ്റ്റ് ചെയ്തു. ഹോം ക്വാറൻ്റയിനിൽ കഴിയാൻ നൽകിയ നിർദേശം ലംഘിച്ചതിന് കാഞ്ഞിരപ്പള്ളിയിൽ 2 പേർക്കെതിരെ പോലീസ് കേസെടുത്തു. വിഴിക്കത്തോട് സ്വദേശികളായ സുരേന്ദ്രൻ ( 53) ഭാര്യ സരള (49) എന്നിവർക്കെതിരെയാണ് കേസെടുത്തത്. സരള ഖത്തറിൽ നിന്ന് ഈ മാസം 16 നാണ് നാട്ടിലെത്തിയത്.

നാളെ കടകൾ തുറന്നു പ്രവർത്തിക്കും. കടകൾ തുറന്ന് പ്രവർത്തിക്കുന്നതിൽ തടസ്സമില്ല. അവശ്യസർവീസുകൾ ഉണ്ടാകും. മുഖ്യമന്ത്രിയുടെ ഓഫീസിന്റേതാണ് അറിയിപ്പ്

തിരുവനന്തപുരം: കൊവിഡ് വ്യാപനത്തിന്റെ പശ്ചാത്തലത്തിൽ സംസ്ഥാനത്തെ ഹാർബറുകളിലും ലാന്റിങ് സെൻറുകളിലും നിലവിലുള്ള മത്സ്യ ലേലത്തിന് നിരോധനം. മന്ത്രി ജെ. മേഴ്സിക്കുട്ടിയമ്മയാണ് ഇക്കാര്യം പറഞ്ഞത്. കൊവിഡ് 19 രോഗ ബാധയുടെ പശ്ചാത്തലത്തിൽ ആൾക്കൂട്ടം ഒഴിവാക്കുന്നതിന് പകരം സംവിധാനം ഏർപ്പെടുത്തി...
Read more

സർക്കാർ നിർദ്ദേശം ലംഘിച്ച് പള്ളികളിൽ പ്രാർത്ഥന നടത്തി. കണ്ണൂരിലും തിരുവനന്തപുരത്തുമാണ് സംഭവം. കണ്ണൂരിൽ 22 പേർക്കെതിരെ കേസെടുത്തു. കൂടുതൽ വായിക്കാം

മുംബൈയിൽ മലയാളിക്ക് കൊവിഡ് 19 സ്ഥിരീകരിച്ചു. ബെൽജിയത്തിൽ നിന്നെത്തിയ 30കാരനാണ് രോഗം സ്ഥിരീകരിച്ചത്. നവി മുംബൈയിലെ ഐരോളിയിലായിരുന്നു ഇയാൾ താമസിച്ചത്. ഇപ്പോൾ കസ്തൂർബാ ആശുപത്രിയിൽ ചികിത്സയിലാണ്. പുണെയിലെ ഭാര്യയെയും മകനെയും കാണാൻ പോയിരുന്നെന്ന് പൊലീസ് പറഞ്ഞു. ഇവരും നിരീക്ഷണത്തിലാണ്.

കൊവിഡ് 19 ന് മരുന്ന് കണ്ടു പിടിച്ചെന്ന് വ്യാജ പ്രചരണം നടത്തിയ കേസിൽ കൊല്ലം പട്ടാഴിയിൽ ഒരാളെ പൊലീസ് അറസ്റ്റുചെയ്തു. പട്ടാഴി സ്വദേശി ശ്യാംകുമാറിനെയാണ് കുന്നിക്കോട് പൊലീസ് അറസ്റ്റു ചെയ്തത്.

ഇന്ന് ജില്ലയില്‍ പുതുതായി 747 പേര്‍ കൊവിഡ് 19 നിരീക്ഷണത്തിലായതായി ആരോഗ്യവകുപ്പ്. ഇതോടെ ജില്ലയില്‍ 4923 പേര്‍ വീടുകളില്‍ കരുതല്‍ നിരീക്ഷണത്തിലുണ്ട്. രോഗലക്ഷണങ്ങളോടെ 11 പേരെ ആശുപത്രിയില്‍ പ്രവേശിപ്പിച്ചു. തിരുവനന്തപുരം മെഡിക്കല്‍ കോളേജില്‍ 31 പേരും ജനറല്‍ ആശുപത്രിയില്‍ 16 പേരും എസ്എറ്റി ആശുപത്രിയില്‍ മൂന്നുപേരും കിംസ് ആശുപത്രിയില്‍ മൂന്നുപേരും ഉള്‍പ്പെടെ 53 പേര്‍ ജില്ലയില്‍ ആശുപത്രികളില്‍ ചികിത്സയിലുണ്ട്. പരിശോധനയ്ക്കായി അയച്ച 689 സാമ്പിളുകളില്‍ 535 പരിശോധനാഫലം ലഭിച്ചു. ഇന്ന് ലഭിച്ച 67 പരിശോധനാഫലവും നെഗറ്റീവാണ്. 35 സാമ്പിളുകളുടെ ഫലം ലഭിക്കാനുണ്ട്.

Read more 

കോഴിക്കോട് പുതുപ്പാടി സ്വദേശിയായ നഴ്സിനെ കൊറോണ ബാധിച്ച് ഗുരുതരാവസ്ഥയിൽ  ഇസ്രായേലിലെ ജറുസലേമിൽ  വെൻറിലേറ്ററിൽ പ്രവേശിപ്പിച്ചു..രണ്ടു വർഷമായി ഇസ്രായേലിൽ ജോലി ചെയ്തുവരികയായിരുന്നു.. ആശുപത്രിയിലെ സേവനത്തിനിടെയാണ് ഇവർക്ക് കോവിഡ് 19 ബാധിച്ചത്.

"

കൊവിഡ് വൈറസ് വ്യാപനം തടയുന്നതിന്റെ ഭാഗമായി കേന്ദ്ര ഭരണ പ്രദേശമായ മാഹിയിൽ ബീവറേജസ് ഔട്‌ലെറ്റുകളും അടച്ചിടാൻ തീരുമാനം. ഈ മാസം 31 വരെയാണ് അടച്ചിടുക. നേരത്തെ ബാറുകളും അടച്ചിരുന്നു.

കണ്ണൂർ: കൊവിഡ് സ്ഥിരീകരിച്ച  ചെറുവാഞ്ചേരി സ്വദേശിയുമായി ബസപ്പെട്ട ഇരിട്ടി എസ് ഐ, എക്സൈസ് ഇൻസ്പെക്ടർ, മാധ്യമ പ്രവർത്തകർ അടക്കം നാൽപ്പതോളം പേർ നിരീക്ഷണത്തിൽ. ദുബായിൽ നിന്ന് ഇയാൾ ഉൾപ്പെടെ പന്ത്രണ്ട അംഗ സംഘം
ബെംഗളൂരു വിമാനത്താവളത്തിലിറങ്ങി  ഇരിട്ടി കൂട്ടുപുഴ ചെക്പോസ്റ്റ്  വഴിയാണ്  നാട്ടിലെത്തിയത്. കൂട്ടുപുഴ ചെക് പോസ്റ്റിൽ വച്ച്  സ്വകാര്യ ബസിൽ കയറിയ ഈ സംഘവും മറ്റ് യാത്രക്കാരും തമ്മിൽ തർക്കമുണ്ടായി. ഇതേ തുടർന്നാണ് പൊലീസും മാധ്യമ പ്രവർത്തകരുമടക്കം സ്ഥലത്ത് എത്തിയത്. സംഭവത്തിൽ സുരക്ഷാ വീഴ്ചയുണ്ടായെന്ന് പരാതി ഉയർന്നിട്ടുണ്ട്.

കൊറോണ പശ്ചാത്തലത്തിൽ വയനാട്ടിൽ പ്രവേശിക്കുന്നതിന് കർശന നിയന്ത്രണം ഏർപ്പെടുത്തി. വയനാട്ടിലേക്ക് ഇനി മുതൽ പ്രവേശനം തിരിച്ചറിയൽ കാർഡ് പരിശോധിച്ചതിനു ശേഷം മാത്രമായിരിക്കും. ചരക്ക് വാഹനം അടക്കം കടത്തി വിടുക കർശന പരിശോധനക്ക് ശേഷം മാത്രമെന്ന് എസ്പിയുടെ ഉത്തരവ്.

സൗദിയില്‍ 119 പേര്‍ക്ക് കൂടി കൊവിഡ് 19 വൈറസ് ബാധ സ്ഥിരീകരിച്ചു. ഖത്തറിൽ 481 പേർ ചികിത്സയിലുണ്ട്. ബഹ്‌റൈനില്‍ 332 ചികിത്സയിൽ കഴിയുകയാണ്. കുവൈത്തില്‍ 188 ചികിത്സയില്ലുണ്ട്. യുഎഇയില്‍ 153 പേരും ഒമാനില്‍ മൂന്ന് പുതിയ കേസുകള്‍ അടക്കം 55 പേർക്ക് രോഗം സ്ഥിരീകരിച്ചു.

എറണാകുളം ജില്ലയിലെ അഭിഭാഷകർ രണ്ടാഴ്ച കോടതികളിൽ നിന്നും വിട്ടു നിൽക്കും. കൊവിഡ് പടരുന്ന സാഹചര്യത്തിലാണ് എറണാകുളം  ബാർ അസോസിയേഷൻ തീരുമാനം. ബാർ അസോസിയേഷൻ ഓഫീസും രണ്ടാഴ്ചത്തേക്ക് അടക്കും. അഭിഭാഷകർ ഓഫീസുകൾ അടക്കണമെന്നും ആഹ്വാനം ചെയ്തിട്ടുണ്ട്.

ആന്ധ്ര പ്രദേശ് ലോക്ക് ഡൌൺ പ്രഖ്യാപിച്ചു. ദിവസ വേതനക്കാർക്ക് ആന്ധ്ര 1000 രൂപ അടിയന്തര സഹായം അനുവദിച്ചു. പൊതു ഗതാഗതം ഇല്ല . അതിർത്തികൾ അടച്ചു. സംസ്ഥാനത്തു ആകെ 6 പേർക്ക് കൊവിഡ് സ്ഥിരീകരിച്ചു.

കൊവിഡ് 19 വൈറസ് ബാധയുടെ പശ്ചാത്തലത്തിൽ എയർഫോഴ്സ് ആസ്ഥാനത്ത് ജീവനക്കാരുടെ എണ്ണം കുറക്കുന്നു. 50 ശതമാനം ജീവനക്കാർക്ക് അവധി നൽകും. 30 ശതമാനം ഓഫീസർമാർക്കും അവധി നൽകുമെന്ന് അറിയിച്ചിട്ടുണ്ട്.

പത്തനംതിട്ട മെഴുവേലിയിൽ അമേരിക്കയിൽ നിന്നെത്തി നിരീക്ഷണത്തിൽ കഴിഞ്ഞിരുന്ന രണ്ട് പേർ കടന്നു കളഞ്ഞു.

ദുബൈയിലെ എമിറേറ്റ്സ് എയൽലൈൻസ് മുഴുവൻ യാത്രാവിമാനങ്ങളും റദ്ദാക്കാൻ തീരുമാനിച്ചു. കൊവിഡ് 19 പ്രതിരോധ നടപടികളുടെ ഭാഗമായാണ് തീരുമാനം. ലോകത്തിന്റെ വിവിധ ഭാഗങ്ങളിലേക്ക് പറക്കുന്ന എമിറേറ്റ്സിന്റെ മുഴുവൻ പാസഞ്ചർ സർവീസുകളും ബുധനാഴ്ച മുതൽ നിർത്തുകയാണെന്ന് സിഇഒ ശൈഖ് അഹമ്മദ് ബിൻ സഈദ് അൽ മക്തൂം അറിയിച്ചു. രാജ്യങ്ങൾ അതിർത്തികൾ തുറന്ന് യാത്രക്കുള്ള ആത്മവിശ്വാസം വീണ്ടെടുക്കുന്നത് വരെ വിമാന സർവീസുകൾ നിർത്തി വെക്കാനാണ് തീരുമാനം. ലോകത്തെ 159 അന്താരാഷ്ട്ര വിമാനത്താവളങ്ങളിലേക്ക് സർവീസ് നടത്തുന്ന വിമാന കമ്പനിയാണ് എമിറേറ്റ്സ്.

കോഴിക്കോട് ജില്ലയിൽ രണ്ട് പേർക്ക് കൊവിഡ് ബാധ സ്ഥിരീകരിച്ചതിന് പിന്നാലെ നിരോധനാജ്ഞ പ്രഖ്യാപിച്ചു. രോഗബാധിതരിൽ ഒരാൾ ഇക്കഴിഞ്ഞ 20 ന് ദുബായിൽ നിന്ന് വന്നു. നേരിട്ട് ആശുപത്രിയിലെത്തി. മറ്റാരുമായും സമ്പർക്കം ഇല്ല. രണ്ടാമത്തെ ആൾ ഈ മാസം 13 നാണ് വന്നത്. 25 പേരുമായി സമ്പർക്കം ഉണ്ടെന്ന് വ്യക്തമായി.

ഇതോടെയാണ് കോഴിക്കോട് കടുത്ത നിയന്ത്രണം കൊണ്ടുവന്നത്. അഞ്ച് പേരിൽ കൂടുതൽ കൂടാൻ പാടില്ല. ഭക്ഷ്യവസ്തുക്കളും മരുന്നും ഉറപ്പാക്കുമെന്ന് കളക്ടർ അറിയിച്ചു. ഇത്തരം കടകൾ അടയ്ക്കാൻ സമ്മതിക്കില്ല. ഭക്ഷ്യധാന്യം വീട്ടിലെത്തിക്കാൻ സൗകര്യം ഒരുക്കും. കടകൾക്ക് മുന്നിൽ കൂട്ടം കൂടാൻ അനുവദിക്കില്ല. ബസുകളിൽ 50% സീറ്റുകളിലേ യാത്രക്കാരെ അനുവദിക്കൂ.

കാസർകോട് ജില്ലയിൽ ലോക് ഡൗണിന്റെ ഭാഗമായി നിരോധനാജ്ഞ പ്രഖ്യാപിച്ചു. പാൽ, പെട്രോൾ പമ്പ്, മെഡിക്കൽ സ്റ്റോറുകൾ റേഷൻ കട, ഭക്ഷ്യ വസ്ഥുക്കൾ വിൽക്കുന്ന കടകൾ എന്നിവക്ക് രാവിലെ 11 മണിമുതൽ 5 മണിവരെ പ്രവർത്തിക്കാം. കൂട്ടംകൂടാനോ അനാവശ്യ യാത്രകളോ പാടില്ല.

കൊവിഡ് നിരീക്ഷണം ലംഘിച്ചതിന്, കുളത്തൂപ്പുഴയിൽ രണ്ടുപേർക്ക് എതിരെ കേസ് എടുത്തു. ഓസ്‌ട്രേലിയയിൽ നിന്നു വന്ന
ഫെബ, റോബിൻ പൗലോസ് എന്നിവർക്ക് എതിരെ ആണ് കേസ്. ഇവർ കൂത്താട്ടുകുളം സ്വദേശികളാണ്.

പൊലീസിന്റെ നിർദ്ദേശം മറികടന്ന് പ്രാർത്ഥന സംഘടിപ്പിച്ച അട്ടക്കുളങ്ങര ജുമാ മസ്ജിദ് ഭാരവാഹികൾക്കെതിരെ ഫോർട്ട് പൊലീസും കേസെടുത്തു

ജില്ലയിലെ പാൽ, പത്രം വിതരണക്കാർ കൊറോണ പ്രതിരോധത്തിനായി ഗ്ലൗസ് ധരിക്കുകയും ആരോഗ്യ വകുപ്പ് നൽകുന്ന നിർദ്ദേശങ്ങൾ കർശനമായി പാലിക്കുകയും ചെയ്യണമെന്ന് ജില്ലാ കളക്ടർ കെ.ഗോപാലകൃഷ്ണൻ അറിയിച്ചു.

പത്തനംതിട്ട റാന്നി താലൂക്ക് ആശുപത്രിയില്‍ സന്ദര്‍ശന വിലക്ക്. കോവിഡ് 19 വൈറസ്ബാധ പ്രതിരോധ പ്രവര്‍ത്തനങ്ങളുടെ ഭാഗമായി റാന്നി താലൂക്ക് ആശുപത്രിയില്‍ ഒരു അറിയിപ്പ് ഉണ്ടാകുന്നത് വരെ സന്ദര്‍ശകരെ അനുവദിക്കില്ലെന്ന് റാന്നി താലൂക്ക് ആശുപത്രി സൂപ്രണ്ട് അറിയിച്ചു.  അടിയന്തിരമല്ലാത്ത എല്ലാ ശസ്ത്രക്രിയകളും മാറ്റിവച്ചിട്ടുണ്ട്. പത്തനംതിട്ടയിൽ ബാങ്കുകളിൽ ഒരേ സമയം 5 പേരിൽ കൂടുതൽ പേരെ അനുവദിക്കില്ല.

"

കൊവിഡ് രോഗബാധ സ്ഥിരീകരിച്ച മലപ്പുറം വേങ്ങര കൂരിയാട് സ്വദേശി മാർച്ച് 19 ന് പുലർച്ചെ 5 മണിക്ക് അബുദാബിയിൽ നിന്നും കരിപ്പൂർ എയർപോർട്ടിൽ എത്തി. എയർഇന്ത്യയുടെ  IX 348 നമ്പർ വിമാനത്തിലാണ് ഇയാൾ എത്തിയത്. സുരക്ഷാ മാനദണ്ഡങ്ങൾ പാലിച്ച് സ്വന്തം വീട്ടിൽ വീട്ടിൽ ഐസൊലേഷനിൽ കഴിയുകയായിരുന്ന ഇയാളെ ഇന്നലെ മഞ്ചേരി മെഡിക്കൽ കോളേജിൽ അഡ്മിറ്റ് ചെയ്തിട്ടുണ്ട് .

കൊവിഡ് രോഗം സ്ഥിരീകരിച്ച കടലുണ്ടി നഗരം സ്വദേശി മാർച്ച് 21 ന് പുലർച്ചെ 3 മണിക്ക്   എയർ അറേബ്യയുടെ G9  425 നമ്പർ വിമാനത്തിലാണ് നെടുമ്പാശ്ശേരി എയർപോർട്ടിലെത്തിയത്. അവിടെ നിന്നും ആംബുലൻസിൽ വീട്ടിലെത്തി. വീട്ടിൽ ഐസൊലേഷനിൽ കഴിയുകയായിരുന്നു. ഇവരെ മാർച്ച് 22ന് (ഇന്ന്) മഞ്ചേരി മെഡിക്കൽ കോളേജിൽ അഡ്മിറ്റ് ചെയ്തിട്ടുണ്ട്.

മാർച്ച് 19 ന് പുലർച്ചെ 5 മണിക്ക് അബുദാബി യിൽ നിന്നും കരിപ്പൂർ എയർപോർട്ടിൽ എത്തിയ എയർഇന്ത്യയുടെ  IX 348 നമ്പർ വിമാനത്തിലും, മാർച്ച് 21 ന് പുലർച്ചെ 3 മണിക്ക് നെടുമ്പാശ്ശേരി എയർപോർട്ടിലെത്തിയ എയർ അറേബ്യയുടെ G9  425 നമ്പർ വിമാനത്തിലും യാത്ര ചെയ്തവർ ജില്ലാ കൺട്രോൾ റൂം നമ്പറിൽ ബന്ധപ്പെടണം. ജില്ല മെഡിക്കൽ കൺട്രോൾ റൂം നമ്പർ 0483 2737858, 0483 2737857.

പത്തനംതിട്ടയിൽ ഐസൊലേഷന്‍ വ്യവസ്ഥകള്‍ ലംഘിച്ച 13 പേര്‍ക്കെതിരേ കേസെടുത്തു. ക്വാറന്റൈന്‍ വ്യവസ്ഥകള്‍ ലംഘിച്ചവര്‍ക്കെതിരേ 2009 ലെ കേരളാ പൊതുജനാരോഗ്യ നിയമ പ്രകാരവും 2011 ലെ കേരളാ പോലീസ് ആക്ട് പ്രകാരവുമാണ് കേസ് രജിസ്റ്റര്‍ ചെയ്തിട്ടുള്ളത്.

തമിഴ്നാട്ടിൽ ഇന്ന് കൊവിഡ് സ്ഥരീകരിച്ചത് കോയമ്പത്തൂർ സ്വദേശിക്ക്. സ്പെയിനിൽ നിന്ന് വിമാനമാർഗ്ഗം ബെംഗളൂരുവിൽ എത്തിയ യുവതി സഞ്ചരിച്ചത് ട്രെയിനിൽ. ബെംഗളൂരുവിൽ നിന്ന് ട്രെയിനിലാണ് കോയമ്പത്തൂരിലെത്തിയത്. ഈ സാഹചര്യത്തിൽ അതിർത്തി കടന്നുള്ള യാത്രകൾക്ക് നിയന്ത്രണം ഏർപ്പെടുത്തും

കൊവിഡ് വൈറസ് ബാധ സ്ഥിരീകരിച്ച നാല് കണ്ണൂർ സ്വദേശികൾക്കും അധികം സമ്പർക്കങ്ങളില്ലെന്ന് വ്യക്തമായി. വിമാനത്താവളങ്ങളിൽ നിന്ന് നേരെ ആശുപത്രിയിലേക്കോ വീട്ടിൽ ഐസൊലേഷനായി ഉടൻ ആശുപത്രിയിലേക്കോ എത്തിയവരാണ്. ഇവർ ചെറുവാഞ്ചേരി, കുഞ്ഞിമംഗലം, നാറാത്ത്, ചപ്പാരപ്പടവ് സ്വദേശികളാണ്. നാറാത്ത് സ്വദേശി ജില്ലാ ആശുപത്രിയിലും ചെറുവാഞ്ചേരി സ്വദേശി തലശ്ശേരി ജനറൽ ആശുപത്രിയിലും കുഞ്ഞിമംഗലം ചപ്പാരപ്പടവ് സ്വദേശികൾ പരിയാരത്തും ചികിത്സയിൽ കഴിയുകയാണ്. എല്ലാവരും ഗൾഫിൽ നിന്ന് എത്തിയവരാണ്. വിശദമായ റൂട്ട് മാപ്പ് തയ്യാറാക്കേണ്ട ആവശ്യമില്ലെന്നും കളക്ടർ.

ജനതാ കർഫ്യു ഇന്ന് രാത്രി ഒൻപത് മണിക്ക് അവസാനിക്കാനിരിക്കെ ഇത് ആഹ്ലാദിക്കാനുള്ള സമയമല്ലെന്ന് പ്രധാനമന്ത്രി നരേന്ദ്രമോദി. ലോക്ക് ഡൗൺ പ്രഖ്യാപിച്ച സംസ്ഥാനങ്ങളിൽ ജനങ്ങൾ വീട്ടിൽ തന്നെ തുടരണമെന്ന് അദ്ദേഹം ആവശ്യപ്പെട്ടു. മറ്റു സംസ്ഥാനങ്ങളിലും അത്യാവശ്യ കാര്യങ്ങളില്ലെങ്കിൽ ജനങ്ങൾ പുറത്തിറങ്ങരുതെന്ന് പ്രധാനമന്ത്രിയുടെ അഭ്യർത്ഥന. ഒരു നീണ്ട യുദ്ധത്തിന്റെ തുടക്കമായി ഈ സമയത്തെ കാണണമെന്നും അദ്ദേഹം പറഞ്ഞു.

തെലങ്കാനയിൽ ലോക്ക് ഡൗൺ പ്രഖ്യാപിച്ചു. സംസ്ഥാനത്തു അഞ്ച് പേർക്ക് കൂടി കൊവിഡ്. അതിർത്തികൾ അടച്ചു. പൊതുഗതാഗതം ഇല്ല. യാത്രാ വാഹനങ്ങൾക്കും വിലക്ക്. അവശ്യ സാധനങ്ങൾ വാങ്ങാൻ കുടുംബത്തിലെ ഒരാൾ മാത്രമേ പുറത്തിറങ്ങാവൂവെന്നും നിബന്ധന.

കാസർകോട് ജില്ലയിലെ കൊവിഡ് ബാധിതർ നെല്ലിക്കുന്ന്, വിദ്യാനഗർ, ചന്ദ്രഗിരി, മരക്കാപ്പ് കടപ്പുറം, ചെങ്കള സ്വദേശികളാണ്. ഇവർ അഞ്ചുപേരും ദുബായിൽ നിന്ന് വന്നവരാണ്.  ഒരാൾക്ക് 58ഉം ഒരാൾക്ക് 27ഉം ഒരാൾക്ക് 32ഉം  ഒരാൾക്ക് 41ഉം ഒരാൾക്ക് 33ഉം വയസാണ് പ്രായം. എല്ലാവരും പുരുഷൻമാരാണ്. 

തിരുവനന്തപുരം: സംസ്ഥാനത്ത് ഇന്ന് 15 പേര്‍ക്ക് കൂടി കോവിഡ് 19 രോഗം സ്ഥിരീകരിച്ചതായി ആരോഗ്യ വകുപ്പ് മന്ത്രി കെ.കെ. ശൈലജ ടീച്ചര്‍. ഇവരില്‍ രണ്ട് പേര്‍ എറണകുളം ജില്ലക്കാരും രണ്ട് പേര്‍ മലപ്പുറം ജില്ലക്കാരും രണ്ട് പേര്‍ കോഴിക്കോട് ജില്ലക്കാരും നാല് പേര്‍ കണ്ണൂര്‍ ജില്ലക്കാരും അഞ്ച് പേര്‍ കാസറഗോഡ് ജില്ലക്കാരുമാണ്. 

കൂടുതൽ വായിക്കാം

ദില്ലി: ദില്ലിയിലാകെ 27 കൊവിഡ് കേസുകൾ സ്ഥിരീകരിച്ചതായി മുഖ്യമന്ത്രി അരവിന്ദ് കെജ്രിവാൾ. രാജ്യതലസ്ഥാനം ലോക്ക്ഡൗൺ ചെയ്യു. 25 ശതമാനം ബസുകൾ മാത്രം സർവ്വീസ് നടത്തും കടകൾ അടച്ചിടും. ദില്ലിയിൽ അതിർത്തികൾ അവശ്യ സർവ്വീസിനൊഴികെ അടക്കും

തമിഴ്നാട്ടിൽ മൂന്ന് ജില്ലകൾ അടച്ചിടും.ചെന്നൈ, കാഞ്ചീപുരം ഈറോഡ് ജില്ലകൾ ലോക്ക് ഡൗൺ ചെയ്യും.

തിരുവനന്തപുരം: സംസ്ഥാനത്ത് ഏഴ് ജില്ലകളിൽ ലോക്ക് ഡൌൺ പ്രഖ്യാപിച്ച സാഹചര്യത്തിൽ പരിഭ്രമിക്കേണ്ട സാഹചര്യമില്ലെന്ന് ഭക്ഷ്യമന്ത്രി പി തിലോത്തമൻ. ഭക്ഷ്യധാന്യങ്ങൾ കേരളം വേണ്ടത്ര സംഭരിച്ചിട്ടുണ്ട്. സംസ്ഥാനത്ത് ഭക്ഷ്യക്ഷാമം ഉണ്ടാകില്ലെന്നും വിതരണത്തിൽ തടസ്സമുണ്ടാകില്ലെന്നും തിലോത്തമൻ പറഞ്ഞു.ചരക്ക് ഗതാഗതം സുഖമമായി നടക്കും. മൂന്നുമാസത്തെ ഭക്ഷ്യസാധനങ്ങൾ സ്റ്റോക്കുണ്ട് .റേഷൻകടകൾ വഴി കൃത്യമായി  ഭക്ഷ്യസാധനങ്ങൾ വിതരണംചെയ്യും. ആവശ്യമെങ്കിൽ സമയനിയന്ത്രണം കൊണ്ടുവരും.സപ്ലൈകോയുടെ കൂടുതൽ മൊബൈൽ വിതരണ യൂണിറ്റുകൾ തുടങ്ങും

Read more at: 'പരിഭ്രമിക്കരുത്, ഭക്ഷ്യധാന്യങ്ങൾ വേണ്ടത്ര സംഭരിച്ചിട്ടുണ്ട്'; റവന്യൂ മന്ത്രി ...

 

ഉത്തർ പ്രദേശിൽ 15 ജില്ലകൾ അടച്ചിടാൻ തീരുമാനം