മണിപ്പൂരിലെ ഉഖ്‌റുലില്‍ ഭൂചലനം

ചൊവ്വാഴ്‌ച പുലര്‍ച്ചെ 02.39നാണ് ഭൂചലനം റിപ്പോര്‍ട്ട് ചെയ്‌തത് എന്നാണ് റിപ്പോര്‍ട്ട്

ഇംഫാല്‍: മണിപ്പൂരിലെ ഉഖ്‌റുലിന് സമീപം 5.1 തീവ്രതയുള്ള ഭൂചലനം. ചൊവ്വാഴ്‌ച പുലര്‍ച്ചെ 02.39നാണ് ഭൂചലനം രേഖപ്പെടുത്തിയത്. നാശനഷ്‌ടങ്ങളൊന്നും ഇതുവരെ റിപ്പോര്‍ട്ട് ചെയ്യപ്പെട്ടിട്ടില്ല. ഉഖ്‌റുലില്‍ നിന്ന് 55 കിലോമീറ്റര്‍ അകലെയാണ് ഭൂചലനത്തിന്‍റെ പ്രഭവകേന്ദ്രം. കൂടുതല്‍ വിശദാംശങ്ങള്‍ പുറത്തുവരുന്നതേയുള്ളൂ. 

വടക്കുകിഴക്കന്‍ സംസ്ഥാനങ്ങളില്‍ ഭൂചലനം തുടര്‍ക്കഥയാവുകയാണ്. അയല്‍ സംസ്ഥാനമായ മിസോറമില്‍ ഇക്കഴിഞ്ഞ ഓഗസ്റ്റ് 27ന് തുടര്‍ച്ചയായ ചലനങ്ങള്‍ അനുഭവപ്പെട്ടിരുന്നു. 5.3, 3.6, 4.1 എന്നിങ്ങനെയാണ് റിക്‌ടര്‍ സ്‌കെയിലില്‍ രേഖപ്പെടുത്തിയ തീവ്രത. ഒരു മണിക്കൂറിനിടെയായിരുന്നു മൂന്ന് ചലനങ്ങളും.