വീട്ടുജോലിക്കാരിക്ക് മർദനം, മുടിയിൽ പിടിച്ചുവലിച്ചു, ഫോൺ കൊണ്ട് അടിച്ചു; വീട്ടുടമയായ 52-കാരി അറസ്റ്റിൽ

വീട്ടുടമയായ രുചിറ വീട്ടുജോലിക്കാരിയെ മർദിക്കുന്ന വീഡിയോ കഴിഞ്ഞദിവസങ്ങളിൽ സാമൂഹികമാധ്യമങ്ങളിൽ പ്രചരിച്ചിരുന്നു. ഇതിനുപിന്നാലെയാണ് പൊലീസ് അന്വേഷണം നടത്തി പ്രതിയെ പിടികൂടിയത്.

ഗുരു​ഗ്രാം: വീട്ടുജോലിക്കാരിയെ മർദിച്ചതിനും ഭീഷണിപ്പെടുത്തിയതിനും 52-കാരി അറസ്റ്റിൽ. ​ഗുരു​ഗ്രാം സെക്ടർ 42-ൽ ഡിഎൽഎഫ് ദി കമേലിയ അപ്പാർട്ട്മെന്റിൽ താമസിക്കുന്ന രുചിറ സച്ഛ്ദേവയെയാണ് പൊലീസ് അറസ്റ്റ് ചെയ്തത്. പ്രതിയെ പിന്നീട് ജാമ്യത്തിൽ വിട്ടയച്ചു.

വീട്ടുടമയായ രുചിറ വീട്ടുജോലിക്കാരിയെ മർദിക്കുന്ന വീഡിയോ കഴിഞ്ഞദിവസങ്ങളിൽ സാമൂഹികമാധ്യമങ്ങളിൽ പ്രചരിച്ചിരുന്നു. ഇതിനുപിന്നാലെയാണ് പൊലീസ് അന്വേഷണം നടത്തി പ്രതിയെ പിടികൂടിയത്.

ജൂലായ് 24-നാണ് കേസിനാസ്പദമായ സംഭവം നടന്നതെന്ന് പൊലീസ് പറഞ്ഞു. വീട്ടുജോലിക്കാരിയായ യുവതിയെ മുടിയിൽ പിടിച്ച് വലിക്കുന്നതും മൊബൈൽഫോൺ കൊണ്ട് മർദിക്കുന്നതുമാണ് ദൃശ്യങ്ങളിലുണ്ടായിരുന്നത്. ഇവരുടെ അയൽവാസിയാണ് ഈ വീഡിയോ പകർത്തിയത്. വീട്ടുജോലിക്കാരിയെ പിന്നീട് മുറിയിൽ പൂട്ടിയിട്ടതായും വീഡിയോ പകർത്തിയ ആൾ അവകാശപ്പെട്ടിരുന്നു. ഈ ​ദൃശ്യങ്ങൾ പിന്നീട് സാമൂഹികമാധ്യമങ്ങളിൽ വൈറലായതോടെയാണ് പൊലീസ് കേസെടുത്ത് പ്രതിയെ അറസ്റ്റ് ചെയ്തത്. ജോലിസംബന്ധമായ കാര്യങ്ങളെച്ചൊല്ലിയാണ് വീട്ടുടമ ജോലിക്കാരിയെ മർദിച്ചതെന്നാണ് പൊലീസിന്റെ വിശദീകരണം. മർദനത്തിനിരയായ യുവതി ജൂലായ് 27-ന് ഇവിടത്തെ ജോലിവിട്ട് പോയതായും പൊലീസ് പറഞ്ഞു.