‍യാത്രക്കാരില്ല, ഒരൊറ്റ വിമാന സർവീസുമില്ല...എങ്കിലും ഇന്ത്യയിലെ നമ്പർ വൺ എയർപോർട്ട്! വിചിത്ര നേട്ടവുമായി ഖജുരാഹോ വിമാനത്താവളം

എയർപോർട്ട് അതോറിറ്റി ഓഫ് ഇന്ത്യയുടെ പുതിയ ഉപഭോക്തൃ സംതൃപ്തി സൂചികയിൽ ഖജുരാഹോ വിമാനത്താവളം ഇന്ത്യയിൽ ഒന്നാം സ്ഥാനം സ്വന്തമാക്കി. ജൂലൈ 1 മുതൽ ഇവിടെ നിന്നുള്ള എല്ലാ കൊമേഴ്ഷ്യല്‍ വിമാന സർവീസുകളും താൽക്കാലികമായി നിർത്തിവെച്ചിരിക്കുകയായിരുന്നു.

ദില്ലി: ഒരൊറ്റ കൊമേഴ്ഷ്യല്‍ വിമാന സർവീസ് പോലുമില്ലാതിരുന്നിട്ടും എയർപോർട്ട് അതോറിറ്റി ഓഫ് ഇന്ത്യയുടെ പുതിയ ഉപഭോക്തൃ സംതൃപ്തി സൂചികയിൽ ഖജുരാഹോ വിമാനത്താവളം ഇന്ത്യയിൽ ഒന്നാം സ്ഥാനം സ്വന്തമാക്കി. ജൂലൈ മാസം മുതൽ ഇവിടെ നിന്ന് സർവീസുകൾ ഒന്നും തന്നെ ഉണ്ടായിരുന്നില്ല. വൃത്തി, സുരക്ഷ, ജീവനക്കാരുടെ പെരുമാറ്റം, യാത്രാ സൗകര്യങ്ങൾ തുടങ്ങി 33 മാനദണ്ഡങ്ങൾ മുൻനിർത്തി യാത്രക്കാരിൽ നിന്ന് ശേഖരിച്ച ഫീഡ്‌ബാക്കിന്റെ അടിസ്ഥാനത്തില്‍ ആണ് വിമാനത്താവളം ഒന്നാമതെത്തിയത്. 

യാത്രക്കാരുടെ എണ്ണം കുറഞ്ഞതിനെ തുടർന്ന് ജൂലൈ 1 മുതൽ ഇവിടെ നിന്നുള്ള എല്ലാ കൊമേഴ്ഷ്യല്‍ വിമാന സർവീസുകളും താൽക്കാലികമായി നിർത്തിവെച്ചിരിക്കുകയായിരുന്നു. ഇതിനുമുമ്പ് ദില്ലി, വാരണാസി എന്നീ നഗരങ്ങളിലേക്കാണ് ഇവിടെ നിന്ന് സർവീസുകൾ ഉണ്ടായിരുന്നത്. മൺസൂൺ കാലത്തെ താൽക്കാലിക ഇടവേളയ്ക്ക് ശേഷം ഒക്ടോബർ മാസം മുതൽ വിമാന സർവീസുകൾ പുനരാരംഭിക്കുമെന്ന് എയർപോർട്ട് ഡയറക്ടർ അറിയിച്ചു.