മുട്ടി, മുട്ടിയില്ല! ദേശീയ പാതയിലേക്ക് വീടിന്‍റെ ബാൽക്കണിയിൽ നിന്ന് ഇറങ്ങാലോ; ഇതാ വ്യത്യസ്തമായൊരു നിർമാണം

നാഗ്പൂരിൽ നിർമ്മാണത്തിലിരിക്കുന്ന ഒരു മേൽപ്പാലം റെസിഡൻഷ്യൽ കെട്ടിടത്തിന്‍റെ ബാൽക്കണിയിലൂടെ കടന്നുപോകുന്നതിന്‍റെ വീഡിയോ വൈറലായി. ബാൽക്കണി അനധികൃത കൈയേറ്റമാണെന്ന് എൻഎച്ച്എഐ അവകാശപ്പെടുമ്പോൾ, സുരക്ഷാ പ്രശ്നങ്ങളില്ലെന്ന് വീട്ടുടമസ്ഥൻ പറയുന്നു. 

നാഗ്പൂർ: നിർമ്മാണം നടന്നുകൊണ്ടിരിക്കുന്ന മേൽപ്പാലം ഒരു റെസിഡൻഷ്യൽ കെട്ടിടത്തിന്‍റെ ബാൽക്കണിയുടെ മധ്യത്തിലൂടെ പോകുന്ന വീഡിയോ വൈറലാകുന്നു. ഇത് നഗരത്തിലെ നഗരാസൂത്രണത്തെയും അടിസ്ഥാന സൗകര്യ വികസനത്തെയും കുറിച്ച് ഗൗരവമായ ചോദ്യങ്ങളാണ് ഉയർത്തുന്നത്. നാഷണൽ ഹൈവേ അതോറിറ്റി ഓഫ് ഇന്ത്യ (NHAI) വികസിപ്പിക്കുന്ന അശോക് നഗറിലെ ഇൻഡോറ-ദിഘോരി ഇടനാഴിയുടെ ഭാഗമാണ് ഈ ഫ്ലൈഓവർ.

ബാൽക്കണി നിർമ്മിച്ചിരിക്കുന്നത് അനധികൃതമായി കൈയേറിയ സ്ഥലത്താണെന്ന് ഈ വിഷയത്തിൽ പ്രതികരിച്ച എൻഎച്ച്എഐ ഉദ്യോഗസ്ഥൻ പിടിഐയോട് പറഞ്ഞു. "ഫ്ലൈഓവർ ബാൽക്കണിയുടെ പുറത്ത് കൂടിയല്ല പോകുന്നത്. ബാൽക്കണി കൈയേറിയ സ്ഥലത്താണ്. ഇത് നീക്കം ചെയ്യാൻ നാഗ്പൂർ മുനിസിപ്പൽ കോർപ്പറേഷന് (എൻഎംസി) കത്തെഴുതിയിട്ടുണ്ട്," ഉദ്യോഗസ്ഥൻ പറഞ്ഞു. കൈയേറ്റം ഉടൻ തന്നെ നീക്കം ചെയ്യുമെന്ന് പ്രതീക്ഷിക്കുന്നതായും അദ്ദേഹം കൂട്ടിച്ചേർത്തു.

വീട്ടുടമസ്ഥൻ പറയുന്നത്

എന്നാൽ, വീടിന്‍റെ ഉടമസ്ഥൻ ഈ വാദത്തെ എതിർത്തു. ഫ്ലൈഓവർ ബാൽക്കണിയുടെ ഭാഗത്തിലൂടെ കടന്നുപോകുന്നുണ്ടെങ്കിലും, കെട്ടിടത്തിൽ സ്പർശിക്കുന്നില്ലെന്ന് അദ്ദേഹം പറഞ്ഞു. "ഇത് ഉപയോഗമില്ലാത്ത ഭാഗത്ത് കൂടിയാണ് പോകുന്നത്. ഫ്ലൈഓവർ 14-15 അടി മുകളിലാണ്, അതുകൊണ്ട് സുരക്ഷാ പ്രശ്നങ്ങളൊന്നുമില്ല," വീട്ടുടമസ്ഥൻ പറഞ്ഞു.

ഈ സംഭവത്തിന്‍റെ വീഡിയോ ഓൺലൈനിൽ വലിയ ശ്രദ്ധ നേടി. ഇത് നിർമ്മാണ നിലവാരത്തെയും താമസക്കാരുടെ സുരക്ഷയെയും കുറിച്ചുള്ള ആശങ്കകൾ വർദ്ധിപ്പിക്കുന്നു. ഈ കെട്ടിടം ഭൂവുടമയ്ക്ക് പാട്ടത്തിന് നൽകിയിട്ടുള്ളതാണെന്ന് ഒരു മുതിർന്ന എൻഎംസി ഉദ്യോഗസ്ഥൻ സ്ഥിരീകരിച്ചു. പാട്ടക്കരാറിന്‍റെ നിബന്ധനകൾ മുനിസിപ്പൽ അധികൃതർ നിലവിൽ പരിശോധിച്ചുകൊണ്ടിരിക്കുകയാണ്. പാട്ടക്കരാർ പരിശോധിച്ച ശേഷം, ആവശ്യമായ നടപടിക്രമങ്ങൾ പാലിച്ച് കെട്ടിടം ഒഴിഞ്ഞുകൊടുപ്പിക്കാൻ നടപടി സ്വീകരിക്കുമെന്നും ഉദ്യോഗസ്ഥൻ പറഞ്ഞു.